Read Maru PHAO: THUG' 31 Bible Online

PHAO: THUG' 31 - Maru bible

PHAO: THUG' 31

¹ASANG wa Moshe re-

²Ngo wa Yuda kaung mae" ngad: ra" Hura nho: yao: myid:- Uri nho: yauggai zo: Bezale re khyin: to: va".

³Ngo wa yao: re nga" qam: so' pyang" byid' to: va". Ngo wa yao: re lo, mau" ja: khao: ngo" qhid' mae" ba jhao: ru- qo" kad' ra" qam: o: jham byid' to: va".

⁴Lo, mau" jham wa- akhyao kad' thug' ra" lo, mau" qhang- ngaui- gyid: bo" jham we' kad' ra" lo, mau" jham-

⁵Laug sin we' phug' de; ja: ba: kho' ba: phyid' nae". Sag' sho: pyo' kyaung: jhao nae"- gatau lo, mau" ja: khao: ngo" mae jhao nae" qhid' mae"- qam: o: byid' to" ra".

⁶Yao: we' daga" mau" zaui: nae" qhid' mae" Dan kaung mae" ngad: ra" Ahisamag nho: yauggai zo: Oholiab rere: ngo khyin: to: va". Amyin" byid' to" ru ja: khao: ngo" qo" kad' genae" qhid' mae" lo, mau" de, jhao: ra" lo, mau" kad' mo, gatau alhab' rere: qi" qhang: ra" qam: o: ngo byid' to: va".

⁷Ngo kad' nhao: to" ra" mau" jham wa- nga" qhid' kheim: Zaung- Dao: Thang" Ban" we' ai: apyid' zaung re shaung: ra" zai alhab'-

⁸Saboe" we' yao" zai kug -Qhang gyang" myikaug' tao" we' yao" zai kug jham alhab'- sheim nae pyo" ja: ngha" nae" phan-

⁹Xeim jham re phad' ngaui" byid: nae" phan we' yao" zai kug alhab'- cid' nae" jarung: we' jarung: tao"-

¹⁰Khinjaung qekhyo" yao: bam caung da" ko" ra" au: re ve, nae" Arun we' yao" yauggai zo: qe: qhid' mae" gyag: ra" khinjaung mai bau: jham-

¹¹Gyadxau- Gyang" lho" jo, qo qhid' mae" sheim nae pyo" ra" ja: jham ngad: ra". Cejham alhab' re kad' rumae yao: bam wa ngo nao re amyin" byid' to" ru we' dakhyo: tab tab za: kad' ca" genae" ngad: ra".

¹²ASANG wa Moshe re-

¹³Nga" Dugno: Ba Na re phug' cao" ge,. Pe"mung:ga"re airu wa joe" lo nae" ayo, alhab' mae naonhaung" we' nga" agyo: mae ave, aso: ngad mung:- ASANG ngo wa naonhaung" re ngoyao" byumyu" kad' yu: ra" khyo re qhu" byid: nae" qhid' mae" ngad: ra".

¹⁴Naonhaung" wa Dugno: Ba re phug' cao" ge,- aiba na wa gyang" lho" yang: ngad: ra". Ai: ba re maphug' cao" lo: ai ba mae mau" kad' yaug khag' ngadqere: se' pye' ru qhug' ca" ra".

¹⁵Naonhaung" nho: mau" re zaui: nae" naonhaung" wa ba na khyaug' ba qo" ako". Ngadqere: nhad' ba ein: ba wa ngore qhaug' byid' to" ra" gyang" lho" ra" Dugno: Ba ngad: ra". Ai: ba na mae mau" kad' ra" yaug khag' ngadqere: se' pye' ru qhug' ca" ra".

¹⁶Israel byu qe wa ce: ba re dao: thang" nho: ave, aso: dalam: khyo" phug' cao" genae" ngad: ra".

¹⁷Aiwa Israel byu qe we' nga" agyo: mae apyad ato: ra" ave, aso: ngad: ra"- pe"mung:ga"re ASANG ngo wa- mug:gaung we' myid gaung re khyaug' ba gyo: mae phan" mung:- nhad' ba ein: ba mae ngo wa mau" zaui" ru thang: pye' mung:-dug no" na: ra" ein: Israel byu qere ta" wa,- ga: ta" ra".

¹⁸Mao"So wa Sina bam mae Moshe re dao: bin: jhau lao"- Mao"So yao: amyin" dao: jham tung" te' to"ra" laug pye: shid' pye: Moshe re byid' ra".