Read Maru PHAO: THUG' 32 Bible Online

PHAO: THUG' 32 - Maru bible

PHAO: THUG' 32

¹Mo,byu qe wa ai: bam dao mae Moshe myao" sho' yena: jo, mung:- ai: bam mae" magyo" lo: lo" rure myao gelao"- yao: bam wa Arun lhang" gam: zang" ham: li" mung: yao: re- ngonhaung" re Egutu mung" mae" jhui" thug' lo yaug ce: byu Moshe pe" boe" byaug va" rure ngonhaung" maba lo:. Airumung: ngonhaung" re au: jhui: nae" so alho dalam: kad' byid: la,- ga: ta" ako".

²Arun wa yao: bam re- naonhaung" yham sang myhi" qe- naonhaung" yauggai zo: myiqe: zo: qe ve; ci ko" ra" qhang noxaui: kheim" jham re khyad' mung:- aijham re ngojhao" cilo geri:- ga: ta" ra".

³Airumung: mo,byu qe alhab' wa yao: bam: qhang noxaui: kheim" jham re khyad' yu mung:- aijham re Arun jhao" cilo: ako".

⁴Arun wa ai: noxaui: kheim" jham yu mung: aijham re phad yhug' mung:- ai: qhang re azung khug khyo vhe' zaui: ke' yang: qhang nung jaung lo: nau" alho kad' ra". Mo,byu qe wa Israel byumyu" qe we"- ce wa ngonhaung" re Egutu mung" mae" jhui" thug' lo: ra" yaug ngonhaung" nho: so ngad: ra"- ga: ta" ako".

⁵Ai: thao Arun wa ai: qhang nung: jaung lo: nau" lho qhid' au: mae phan dalam: kad' mung: ne, mo" ba ASANG re phug' te' nga: yhe' byid' ra" poe dalam: jo, nae"- ga: ta" hau" ke' ra".

⁶Thao: ba ne, seim no' yao: bam wa xeim: khyo" phad' ngaui" nae" gug'nyhug' daqhae: re she: li" mung:- zam" khug: ra" xeim: khyo" zo: nae" daqhae: cili" ako". Mo,byu qe wa ai: poe mae li" zaung: jo; mung: zo: poe shaug' poe pyo: poe yao: bam wa gintho' mau" kad' lo" ako".

⁷ASANG wa Moshe re phyad gyo" lo" wa,- pe"mung:ga"re nao: yang Egutu mung" mae" jhui" thug' lo: ra" ni" byumyu" wa qobo kad' mung: ngore ngag: ha: pye' avako".

⁸Yao: bam phug' cao" genae" qhid' mae" ngoyang amyin" byid' to" ra" khyo re to" pye' avako". Yao: bam wa qhang re phad' yhug' mung: nung: jaung lo: lho dalam: kad' yang:- ai: re caung:pa" mung:- aire xeim: ngaui" byid' avako". Yao: bam wa ce wa yao: bam re Egutu mung" mae" jhui" thug' lo: ra" yao: bam nho: so ngad:- ga: ta" na: ako".

⁹Ce: byumyu" khoqhi" nhag' lam: qao: rure ngo ba: ra".

¹⁰Ana"- ngore tam" nae" daseim" wa,- ngo wa yao: bam re nhag' yo" ra". Amung: ngo wa yao: bam re se' tam" pye' nae". Ai: thao ngo wa nao we' ni" myid:zo: qere qi" qhang: ra" byumyu" boe" nhao nae"- ga: ta" ra".

¹¹Ngadqere: Moshe wa ASANG yao" Mao"So re- ASANG we"- qam: so' mo" yang Egutu mae" nao khyad' yu: to" ra" ni" byumyu" re pe"mung: ai qhi" nao nhag' yo: ang: i?

¹²Nao wa yao: bam re bam khaung: mae se' pye' nae" we' yao: bam re bin sho' se' tam" pye' nae" seim" thug' lo: ru ngad: ra" ga:- Egutu byu qere pe"mung: qo" ta" nhao nae" ang: i? Nhag' yo: thang: pye' wa,- ni" myid re tha" pye' mung:- ce: kyi" khyag' ru ni" byumyu" dao mae daboe" nhao wa,-

¹³Ni" daui daui mo, ngad ko" ra" Abraham- Isag- Yaku bam re myid: beim: wa,- yao: bam re mug:gaung: kyi nho" myid:zo: qe myo: sho' byid: mung:- yao: bam: myid:zo: qere nao dao:so: byid' to" ra" mug: myid alhab' re apyad ato: yao: bam: mug: myid ngad nae" qhid' mae" yao: bam re nao dao:so: byid' to" rure re: myid: beim: wa,- ga: mho' ra".

¹⁴Airumung: ASANG wa yao" myid re lhai" pye' mung:- yao: ta" kyaug' to" ra" kyi" khyag' rure yao" byumyu" dao mae maboe" nhao ngad: ra".

¹⁵Moshe wa shad' khao: ngo" mae amyin" dao: tung" te' to" ra" laug pye: shid' lam: re vo, mung: bam khyid khyo dam: tug' gyo" lo: ra".

¹⁶Mao"So wa yao: yao:- ai: laug pye: shid' pye: re kad' mung: ai: dao mae amyin" dao: jham re kyaung" tung" ra".

¹⁷Yoshu wa mo,byu qe hug' yhai: na: rure the' gyo: mung:- Moshe re thang: na: ra" jo, qo mae gyekhe' poe thoe ru" ra" thoe re ngo the' gyo" ra"- ga: ta" ra".

¹⁸Ai: thoe wa gyekhe' aung thoe mangad: lao" gye seim" ra" thoe we' madau ngad: kyi:- ai: thoe wa nghaui" caung" ra" thoe ngad: kyi:- ga: ta" ra".

¹⁹Moshe wa thang: na: ra" jo, qo khyo te' lo mung:- nung: jaung nau" lho re we' mo,byu qe go" na ko" rure lomyao lao"- yao: nhag' jam: yo" li" ra". Moshe wa bam khyid mae yao: vo; ci: ra" laug pye: shid' pye: re pye' kho' khyo" pye' ra".

²⁰Yao: wa yao: bam sheim" to: ko" ra" nung: jaung lo: nau" lho re yu: yu mung:- phad' yhug' pye' yang: aire aphaui: boe" sho' gyag mhan" mung: qid: yang lhag' pye' ra". Ai: thao yao: wa Israel byu qere shaug' nhao: ra".

²¹Yao: wa Arun re- ce: mo,byu qe airu" ra" qu" gyaug qu" lhaung sho' ra" qobo re yao: bam re nao shad' lhoe" nhao sho' nao re pe" ru: kad' ako" i? ga: myid' ra".

²²Arun wa ngore nhag' dayo: la,- ce: byumyu" qe wa makhyang" ru kad' nae" khoru: myid: phyid' to: ko" rure nao ba: ra".

²³Yao: bam wa ngore- Egutu mung" mae" ngonhaung" re jhui" thug' lo: ra" Moshe- ceyaug pe" boe" byaug va" rure ngonhaung" maba lo:ngad: ra". Airumung: ngonhaung" re khyo qhid' au: she byid: nae" so alho dalam: ngonhaung" re kad' byid: la,- ga: ta" ako".

²⁴Ailao" ngo wa yao: bam re- naonhaung" qhang zai jham re ngo jho" cilo geri: ein: yao: bam re mho' mung:- qo" ra" mo, ngore khyad' byid' ako". Ngo wa ai: qhang zai jham re myi: khyo pye' zaui: mung: ce: nung: jaung lo: nau" alho thug' li" ra"- ga: ta" ra".

²⁵Arun wa mo, byu qere abyo, asin: boe" nhao mung:- yao: bam: gyevo qe: qhid' kheim: mae yao: bam yao" gaung re go: joe, nhao: pye' rure Moshe ba: qu" pye' ra".

²⁶Airumung: Moshe wa thang: na: ra" jo, qo kham: dung: mae ye; jo, mung:- ASANG shad' mae bo: de; ra" mo, yaug khao: ngo" cekhyo li" geri: ga: hug' ra". Aimung: Levi byu qe wa yao" lhang" gam: mae zang" ham: na: ako".

²⁷Moshe wa yao: bam re- naonhaung" yaug khao: ngo" naonhaung" shae re gaug: ci mung:- ce: tab kham: dung: mae" gatau tab kham: dung: khyo jao: sho' ye: mung:- naonhaung" yao: mao: yao: nhaung: ba nam- yham kyo: cao: qere se' pye' nae" qhid' mae" Israel nho: Mao"So ASANG amyin" byid' ra"- ga: ta" ra".

²⁸Levi qe wa aire tae" gyo: mung:- ai: ba mae yauggai sam taung zo: ko re se' pye' ako".

²⁹Moshe wa Levi qere- naonhaung" wa ana" ba- naonhaung" yauggai zo: qe- mao:nhaung: qere se' ra" khyo" yang- khinjaung qekhyo" ASANG: mau" zo" mae naonhaung" yao" gaung re qhaug' byid' avako". Airumung: ASANG wa yao" shaman" jeju naonhaung" re byid' ava"- ga: ta" ra".

³⁰Thao: ba Moshe wa mo, byu qere- naonhaung" wa qu" gyaug qu" lhaung sho' ra" qobo re shad' lhoe" avako". Ngadqere: naonhaung" qobo qhid' mae" qobo khyad' byid' ru qo" yu: re qo" yu maba- ngo wa bam dao khyo ASANG jhao" dam: do, ye: nae"- ga: ta" ra".

³¹Ai: thao Moshe wa ASANG jhao" dam: tug' lo mung: ce: byu qe wa qu" gyaug qu" lhaung sho' ra" qobo re shad' lhoe" avako". Yao: bam wa qhang we' so alho dalam: kad' thug' yu mung: aire caung:pa" byid' avako".

³²Jeju khyo" yao: bam: qobo re khyad' byid: wa,- nao qobo makhyad' byid: nae" lao" wa- ni" byumyu" qe: mang jham re nao tung" to" ra" mugsug' paug' mae" nga" mang re sad' pye' wa,- ga: ta" ra".

³³Ailao" ASANG wa ngore gye kad' yang: qobo shad' ra" mo; mang jham re nga" mugsug' paug' mae" ngo sad' pye' nae".

³⁴Ana" lo" mung: ngo ta" ra" jo, qo khyo mo,byu qere jhui" ye: wa,- nga" mug: lagyo: wa nao re khyo jhui" li" nae" rure myid: beim: wa,- ngadqere: yao: bam: qobo jham: qhid' mae" ai: byu qere qobo dae byid: nae" yo, khyin: wa joe" li" na: ra" ga: tau" ra".

³⁵Airumung: ASANG mo,byu qe: dao khyo no: phyao: qam" nhao: ke' ra". Pe"mung:ga"re yao: bam wa Arun re qhang nung: jaung lo: nau" alho kad' nae" akhyo boe" nhao geyang: ngad: ra".