Read Maru PHAO: THUG' 34 Bible Online

PHAO: THUG' 34 - Maru bible

PHAO: THUG' 34

¹ASANG wa Moshe re- sao qhid' mae" we' dakhyo: dau: ra" laug pye: shid' pye: kho' phyid' yu wa,- nao pye' kho' pye' ra" laug pye: dao mae tung" te' ra" dao: jham re ngo wa ai shid' pye: dao mae dam: tung" te' nae".

²Ne, mo" ba ne, seim no' mae" seim" jin" mung: bam au: mae ngore li" qhug' nae" qhid' mae" Sina bam khyo do, li" ri:-

³Nao we' daga" khag' re: dado, li" ge,- ai: bam mae" khojo, qo mae re: byu khag' magai: myao nae" ngad: ra". Yao we' nung: jham rere: bam khyid mae dalhae: zo: nhao ge,- ga: ta" ra".

⁴Ailao"- Moshe wa gatau laug pye: shid' pye: re kho' phyid' yu mung:- ASANG: yang amyin" byid' to" ru we' dakhyo:- yao: wa thao: ba ne, seim no' ai: laug shid' pye: re Sina bam dao khyo vo; do, ye" ra".

⁵ASANG wa jham thaui: khug mae gyo" li" mung: aitau yao: we' daga" li" ye; jo, mung: yang: yao" gyang" lho" mang wa ASANG ngad:- ga: ta" ra".

⁶Ai: thao ASANG wa Moshe nho: qhid' au: khyo" lai: lo" mung:- ngo wa nhag' khyag' shagu myid bo: ra" Mao"So- nhag' phyad maba: yo" ru we' qi" qhang: ra" jhid'de; myid bo mung: jhaug' zaug yaug ASANG ngo ga: yaug ngad:-

⁷Ngo wa nga" dao: so re byu qae: ataung joe" sho' dao:so: zaug yaug- qobo we' makhyang" rure qobo khyad' byid: yaug ngadqere:- ngo wa yao: bam: myhi" pho" qenho: shad' ra" qobo qhid' mae" qobo dae re yao: bam: yao: zo:- yao: bam: yao: myid:- byu qae: sam byid qae: joe" sho' qobo dae byid: nae" rure ma lhai" pye' nae"- ga: ta" ra".

⁸Ailao"- Moshe wa phyad za: goe; gyo" mung: caung:pa" byid' ra".

⁹Amung: yao: wa- ASANG we"- nao ngore o ngaui: ru dang: ngad: re wa- ngonhaung" we' daga" bocao nae" qhid' mae" ngo nao re mho' ra"- ga: ta" ra". Cebyu qe nhag' lam: qao: ako"- ngadqere: ngonhaung" nho: qobo we' makhyang" rure qobo khyad' pye' byid: mung:- nao yao" byumyu" khyo" ngonhaung" re khae: yu byid: la,- ga: ta" ra".

¹⁰ASANG wa Moshe re- ana" ngo wa Israel byu qe we' dao: thang" kad' ra". Yao: bam: qhid' kheim: mae ngo qi" qhang: ra" mau" kad' nae". Airu" ra" lo, mau" wa mug: myid dao mae khokhyi" re: kho: byumyu" phaung mae re: makad' qu" ra" mau" ngad: ra". ASANG ngo kad' ra" mau" jham re byumyu" alhab' myao: li" genae". Pe"mung:ga"re ngore naonhaung" qhid' mae" gyaug ja: kad' nae" ngad ruyang ngad: ra".

¹¹Ana" ba nao re ngo byid' ra" tarha" jham re phug' cao" wa,- ngo wa Amori byu- Khanan byu- Hiti byu- Perizi byu- Hivi byu- Yebusi byu qere naonhaung" khoru: jhin" ye: re khoru: yao: bam re khe' thug' pye' nae".

¹²Nao vao ye" nae" ra" mung"dan: mae" byu qe we' myid vang" khyo mugsug' pe" re: datung" wa,- pe"mung:ga"re ceru wa ni" qhid' mae" myi" shid nae" lha" ngad: li" nae".

¹³Ai: atha"- yao: bam nho: phan jham re phyo' pye'- yao: bam: gyang" lho" ra" zang baung: jham re phyo' khyang: pye' wa,- yao: bam nho: Ashe so myhi" alho jham re je; khyo" wa,.

¹⁴Gatau: so pe" rere: dacaung:pa" wa,- pe"mung:ga"re ASANG- ngo ga: yaug wa mai qhi" cao: qere maqo" zang: byid: ngad: ra".

¹⁵Ai: mung"dan: mae" byumyu" qe we' myid vang" khyo mugsug' rere: datung" wa,- pe"mung:ga"re yao: bam nho: taung bug so jham re caung:pa" byid: mung:- aijham re xeim: ngaui" byid: ko" au:- yao: bam we' li" leim nae" qhid' mae" naonhaung" re yao: bam khai: li" genae". Ailao" naonhaung" wa yao: bam: so jham re kug' byid' ra" zo:ve zo: nae" qhid' mae" ju" phyo' ru qhug' li" genae".

¹⁶Naonhaung" nho: yauggai zo: qe wa nga" dao mae dao: so mazaug nae" qhid' mae" yao: bam re khyonghung: jhui" nghung: mung:- yao: bam nho: taung bug so jham re caung:pa" nae" shad' khyo jhui" phaug' lo" nae" ngad ko" ra" ai: taung bug myiqe: qe we' lo, xo' xo' li" genae" ngad: ra".

¹⁷Gyid' yang sheim" ra" so alho jham re dakad'- aijham re dacaung:pa" wa,.

¹⁸Man" make' mug poe re phug' cao" yang: kad' wa,- ngo amyin" byid' to" ru we' dakhyo:- Abib lho" khye' mae nhad' ba lam: lam: man" make' mug re zo: wa,- pe"mung:ga"re naonhaung" Egutu mung" mae" thug' lo: ko" ru wa ai: lho" khye' mae ngad: ra".

¹⁹Zoqhid' yauggai zo: yaug khao: ngo" we' myhung: to" ra" gug'nyhug' mae" sao qhid' xao" ra" gug'nyhug' lo: wa nga" mae" ngad:.

²⁰Ngadqere: sao qhid' xao" ra" loze lo: re wa- yao nau" dadau: atha" qhaug' byid: yang: nao wa aire qo" gai: tug' vai: yu: ra". Nao aire matug' vai: yu: ngad: re wa loze lo: nau" nho: lang zang: re khyug' pye' wa,- zoqhid' yauggai zo: yaug khao: ngo" re tug' vai: yu wa,. Nga" qhid' kheim: khyo jhaung qhu" xeim: maci lo: khag' re: dali" na: qhu" ge,.

²¹Naonhaung" yao" mau" zaui: nae" ba na khyaug' ba lam: lam: naonhaung" qo" ako". Ngadqere: nhad' ba ein: ba mae mau" dazaui: ge- yo phaug' yo- mangad: lao" yad yo, re ngad sho' ngadqere: ai ba mae mau" dazaui: ge,.

²²Jung: gaug laui yo: sao qhid' yad: qhid: gelao"- gaug yad poe re phug' cao" yang: kad' ge,- naonhaung" sag' shi: voshi: jham re phyo' zhang: yu: au:- xaung: thug' so' mae zaung poe re phug' cao" yang: kad' ge,.

²³Dazin mae sam lhang naonhaung" yauggai qe alhab' wa Israel nho: Mao"So ASANG ngore li" caung:pa" byid: ca" ako".

²⁴Ni" qhid' au: mae" byumyu" qe re ngo bin: khe' thug' pye' byid: mung:- ni" mug: myid re ce: byid: thao re- ai: poe sam lam" agyo: mae ni" mung"dan: re khag' yang re: qo" aung: pye' nae".

²⁵Gug'nyhug' xeim: ngore phad' ngaui" byid' ra" au:- Man" bo: ra" mug re dangaui" byid: la,- Lai co' poe mae se' ra" gug'nyhug' sho: dadau rere: ne, kao joe" sho' datang" to: wa,.

²⁶Zin khao: ngo" mae nao yad: yu: ra" gaug au: re ASANG: yham khyo cili" wa,. Yao nau"- mangad: lao"- cad' be, nau" re yao: myhi" nug' we' dakyug' wa,- ga: ta" ra".

²⁷ASANG wa Moshe re- ce: dao: jham re tung" to: wa,- pe"mung:ga"re ce dao: jham mae aqao: to: mung: nao we' Israel byu qe we' ngo dao: thang" kad' to: nae" ngad: ra"- ga: ta" ra".

²⁸Moshe wa pe" mazo: pe" mashaug' lo: ASANG we' daga" byid xe myi- byid xe ba aimae thang: na: jo; ra". ASANG wa ai: laug pye: shid' pye: dao mae dao: thang" mungdao: jham ngad: ra" kham" to" ra" Tarha" zang daxe re tung" ra".

²⁹Moshe wa kham" to" ra" Tarha" daxe re vo, yang: Sina bam mae" gyo" lo" au:- yao: wa ASANG we' dao: jho" jhau va" ruyang- yao" myo, khung: wa bao qhui: jo; ra". Ngadqere: ai: khyo re yao: maba ngad: ra".

³⁰Arun we' mo, byu qe alhab' mo, Moshe re qu" ko" re- yao" myo, khung bao qhui: jo; rere myao gemung: yao: bam wa yao: jhao" te' ye: nae" gyaug: ako".

³¹Ngadqere: Moshe wa yao: bam re khai: ke' mung:- Arun we' byu phung: mae" au: jhaung qe alhab' Moshe jhao" ye" ako". Moshe wa yao: bam re dao: jhau: ra".

³²Ai: thao Israel byu qe alhab' mo, yao" lhang" gam: mae zang" ham: li" ako". Moshe wa- Sina bam dao mae ASANG: yang yao: re byid' to" ra" tarha" jham alhab' yao: bam re byid' ra".

³³Moshe wa yao: bam we' dao: bin: jho" jhau lao" yao" myo, khung: re pha, jad po" yang nghoe' pye' ra".

³⁴Moshe wa ASANG re dao: ye jhau nae" qhid' mae" ASANG: qhid' kheim: Zaung khug khyo vao ye: khao: ngo" yao: wa ai: pha, jad po: re khyad' pye' ra". Yao: dam: thug' lo lao" ta" kyo: nae" qhid' mae" amyin" byid: qhug' ra" khyo ja: khao: ngo" re Israel byu qere yao: ta" kyo: byid' ra".

³⁵Amung: yao" myo, khung: bao: qhui: jo; rure yao: bam myao: ako". Ai: thao ASANG we' jho" jhau nae" qhid' mae" thao: lhang dam: joe" sho' yao: wa ai: pha, jad po: re dam nghoe' ci: ra".