Read Maru PHAO: THUG' 36 Bible Online

PHAO: THUG' 36 - Maru bible

PHAO: THUG' 36

¹Bezale- Oholiab we' ASANG: yang lo, mau" zaui: jhao nae" pha,jhi" we' ba: gyo" ru byid' to: qhug' ko" ra" gatau lo, mau" zaui: mo,- ai: gyang" lho" Zaung re kad' nae" qo ca" ra" gu: ja: khao: ngo" re khoru: kad' nae" ba: gyo" ra" mo, ASANG: yang amyin" byid' to" ru we' dakhyo:- ja: khao: ngo" re kad genae" ngad: ra"- ga: ta" ra".

²Moshe wa Bezale Oholiab tao we' Mao"So: yang: qam: o: byid' to: qhug' ra" lo, mau" zaui: jhao mo, gatau alhab' mo, mau" zo" mae bao" thaug' nug: ra" mo, re khai: yu mung:- mau" zaui" qhid nae" qhid' mae" yao: bam re ta" ra".

³Yao: bam wa gyang" lho" Zaung kad' nae" qhid' mae" Israel byu qe cili" ko" ra" jhaung qhu" jham alhab' re Moshe lo, mae" khae: yu: ako". Ngadqere: Israel byu qe wa xo' yang yao: bam: jhaung qhu" jham re Moshe jhao" ne, seim khao: ngo" cili" ako".

⁴Ai: thao zaung kad' ra" mau" jhao: ra" byu qe wa Moshe jhao" ye: mung:-

⁵Mo, byu qe wa ASANG: yang kad' nhao: ra" mau" qhid' mae" qo ca" ra" ja: qo: ra" tho' mae je sho' cili" na: ako"- ga: ta" ako".

⁶Ailao"- Moshe wa mo, byu qe jhaung qhu" ma cili" lo: genae" qhid' mae"- thang: na: ra" jamu jham khyo jao: sho' byu nhao: ke' mung: gyang" lho" Zaung qhid' mae" khag' re: jhaung qhu" ma cili" lo genae" qhid' mae" amyin" byid' ke' ra". Aimung: mo, byu qe wa pe" maci: li" loko" ngad: ra".

⁷Mo, byu qe li" cito: vako" ra" zai jham wa mau" zo" alhab' re bin sho' zaui: nae" qo ca" ra" tho' je: laug sho' ngad: ra".

⁸Mau" zo" mae zaui" na: ra" mo, mae" je: lo, mau" jhao: ra" mo, wa ASANG: qhid' kheim: Zaung re kad' ako". Yao: bam wa- anyug mung: ra" khyang- amo, mung: ra" khyang we' sug' gug ane: yang qo, mung: kherubin alho thu" nag: shaung: te' to" ra" jid: mo" pin: gai daxe lung" yang kad' ako".

⁹Lung: khao: ngo" wa dalu" daqang" za: ngad: mung:- qhang phyao: shid' xe: she' daung"- lu phyao: byid daung" daung" bo: ako".

¹⁰Yao: bam wa ngo" lung: re dakhye' khyo" khyab' mung: gatau ngo" lung: rere: dakhyo: za: kad' ako".

¹¹Yao: bam wa ai: pin: lung: khye' khao: ngo" re taung gaung shad' mae" pin: lung: athao thao mae anyug mung: ra" pin" yang akheim" jham kad' te' ako".

¹²Yao: bam wa sao qhid' khye' mae" sao qhid' lung: mae akheim" ngo" xe lam: te' mung: ai: jham we' jho" zhaung: yang: shid' zam" ein: zam" mae" lo" thao" lung: mae akheim" ngo" xe te' ako".

¹³Yao: bam wa ai: pin: lung: shid' khye' re dakhye' khyo" za: jho" xo' nae" qhid' mae" qhang nghoe: ngo" xe lam: kad' ako".

¹⁴Ai: thao yao: bam wa Zaung qhid' mae" mhao: mug: re cad' be, mug' yang qo; to" ra" mai daxe: dakhye' re kad' ako".

¹⁵Yao: bam wa aijham re dalu" daqang" za: kad' mung:- qhang phyao: sam xe daung"- lu phyao: byid daung" bo: ako".

¹⁶Yao: bam wa aire ngo" lung re dakhye' khyab te' mung: gatau khyaug' lung: re dakhye' kad' yang: khyab' te' ako".

¹⁷Dakhye' mae" lo" thao" lung: athao mae akheim" ngo" xe lam: te' mung: gatau dakhye' mae" athao mae akheim" ngo" xe lam: te' ako".

¹⁸Mhao: mug: dakhye' khyo" ngad nae" qhid' mae" yao: bam wa ai shid' khye' re xo' nae" gyid: bo" anghoe: ngo" xe lam: kad' ako".

¹⁹Yao: bam wa mhao: mug: shid' lam: je: yang: kad' ako". Taung gaung shad' mae" mhao: mug: khyo" mug: nae" qhid' mae" mhao: mug: dakhye' re ane nyhug yang xug' to" ra" yao lo: qid- gatau dakhye' re wa gai: ra" shoqid: yang kad' ako".

²⁰Yao: bam wa Zaung qhid' mae" khinqae re qhoje; sag' the" yang azhaung khyo" qae: ako".

²¹Sag' the: khye' khao: ngo" wa myhao phyao: daxe daung"- lu phyao: dadaung" dathu-

²²Sag' the: jham qo" jho" xo' nae" qhid' mae" jho" zhaung" ra" zang shid' zang zang te' ako". Sag' the: jham alhab' mae ai: zang thaug' jham de; ako".

²³Yao: bam wa mug: thao shad' qhid' mae" sag' the: shid' xe khao: kad' mung:-

²⁴Ai: sag' the: jham aqao: mae ngaui zang pan byid xe pan kad' ako". Zang thaug' shid' lam: re zaui" ci nae" qhid' mae" sag' the: da khao: qao: mae zang pan shid' pan ke' ako".

²⁵Yao: bam wa mug: am: shad' qhid' mae" sag' the: shid' xe khao: kad' mung:-

²⁶Sag' the: khao: ngo" aqao: mae" zang pan shid' lam: khyo" ngaui zang pan byid xe pan kad' ako".

²⁷Zaung nhaung thao" ba vao shad' qhid' mae" yao: bam wa sag' pye: khyaug' pye: kad' mung:-

²⁸Akhyug jham shid' khyug qhid' mae" sag' pye: shid' pye: kad' ako".

²⁹Ai: akhyug khyug mae" sag' the: shid' khao: wa athai: mae jho" xo' mung:- au: mae joe" sho' jho" xo' mung:- aau: mae joe" sho' jho" xo' to" ako". Akhyug shid' khyug mae sag the: shid' khao: re cekhyo" kad' to" ako".

³⁰Airumung: sag' the: she' khao: we' sag' the: dakhao: qao: mae zang pan shid' lam: khyo" ngaui zang pan daxe: khyaug' pan re kad' ako".

³¹Yao: bam akyao" daxe: ngo" khyaung: re qhoje; sag' yang kad' mung:-ngo" khyaung: re zang dashad' mae" sag' pye: jham: qhid' mae"-

³²Ngo" khyaung: re gatau dashad' qhid' mae"- ngo" khyaung: gu: re wa zaung nhaung thao" ba vao shad' sag' pye: jham: qhid' mae" kad' ako".

³³Agaung: mae" akyao" khyaung: wa akhyug ang ang- zaung jao: sho' sho' mung: re ngad: ra".

³⁴Yao: bam wa sag' pye: jham re qhang: yang thab' pye' mung:- akyao" jhoe" zaui nae" qhid' mae" qhang kheim" lo, zaui: te' ako". Ai: akyao" rere: qhang: yang thab' pye' ako".

³⁵Yao: bam wa anyug mung: ra" khyang- amo, mung: ra" khyang- sug' gug khyang ne: yang qo; to: mung:- kherubin alho jham thug' nag: shaung: te' to" ra" jid: mo" pin" yang akyo pin: lung: kad' ako".

³⁶Yao: bam wa ai: akyo pin: lung: lhao" to: nae" qhid' mae" qhoje; sag' yang zang byid zang kad' ako". Aijham re qhang: yang thab' pye' mung: qhang anghoe: jham te' ako". Ai: thao yao: bam wa ai: zang jham re zhaung nae" qhid' mae" ngaui zang pan byid pan kad' ako".

³⁷Yao: bam wa Zaung kham: dung: qhid' mae" anyug mung: ra" khyang- amo, mung: ra" khyang- sug' gug khyang ne: yang qo; mung: thug' nag: shaung: to" ra" jid: mo" pin" yang akyo pin: lung: dakhye' kad' ako".

³⁸Amung: yao: bam wa ce: akyo pin: lung: qhid' mae" zang ngo" zang mae anghoe: jham te' mung:- zang au: jham re we' qae kyao" jham re qhang thab' pye' ako". Zang jham qhid' mae" gyid: bo" zang pan ngo" pan kad' ako".