Read Maru PHAO: THUG' 37 Bible Online

PHAO: THUG' 37 - Maru bible

PHAO: THUG' 37

¹Bezale wa qhang phyao: shid' daung" dathu- lu phyao: dadaung" dathu- myhao phyao: dadaung" dathu bo: ra" Dao: Thang" Ban" re qhoje; sag' yang kad' ra".

²Yao: wa aire akhug shad'- adao shad' mae qhang: yang lham: mung: ayae cao" yang: qhang bug ke' ra".

³Yao: wa aire vo, nae" qhid' mae" qhang kheim" byid kheim" kad' mung: dashad' mae shid' kheim" kheim" byid khyid geim" mae te' ra".

⁴Yao: wa qhoje; sag' yang dao nae" gyang: yao: kad' mung: aire qhang: yang thab' pye' ra".

⁵Aimung: Ban" nho: shad' khao: ngo" mae" akheim" jham: mae gyang: yao: ke' to" ra".

⁶Yao: wa qhang gyang" yang- qhang phyao: shid' daung" dathu- lu phyao: dadaung" dathu bo: ra" apyid' kad' ra".

⁷Amung: yao: wa apyid' athao mae qhang: yang kherubin: dalam: lam: kad' te' ra".

⁸Yao: wa ai shid' lam: re apyid' we' dasho: za: boe" sho' kad' ra".

⁹Kherubin shid' lam: wa apyid' dao mae yao: cao: myo,nho jho" qang mung: ai shid' lam" nho: phyid: to" ra" daung jham wa ai: ban" re nghoe' to" ra".

¹⁰Yao: wa qhang phyao: shid' daung"- lu phyao: dadaung"- myhao phyao: dadaung" dathu bo: ra" jaung: re qhoje; sag' yang kad' ra".

¹¹Yao: wa aire qhang gyang" yang thab' mung: ayae lhang" gam: qhang bug ke' ra".

¹²Amung: yao: wa danghoe' bo: ra" anhad' re saboe" lhang" gam: kad' te' mung: ai: anhad' ayae re qhang bug ke' ra".

¹³Yao: wa aire dao nae" qhid' mae" qhang kheim" byid lam: kad' mung: jaung: khyid byid khyug geim" mae te' ra".

¹⁴Jaung: re dao nae" gyang: yao: jhoe" zaui nae" akheim" jham re ai: anhad' nhae mae te' ra".

¹⁵Yao: wa ai: gyang: yao: re qhoje; sag' yang kad' mung: aire qhang: yang thab' ra".

¹⁶Yao: wa jaung: qhid' mae" ban khug' jham ngad: ra" ban the"- keim- zhogam: qid kang: jham we' sabyi qang: qhaug' byid' rumae ci: nae" khug' jham re qhang gyang" yang kad' ra".

¹⁷Yao: wa myikaug' tao" re qhang gyang" yang kad' ra" myikaug' apan re we' alo, rere: qhang: yang kad' ra". Aire athaung: jham- bin: bu" jham bobo yang: shaung: te' to" ra" bin: jham re asho: dazo" za: kad' ra".

¹⁸Dashad' mae sam kaung kaung te' mung: khyaug' kaung kad' ra".

¹⁹Ai: khyaug' kaung mae" kaung khao: ngo" mae athaung: jham: abu" jham we' bu" jo; ra" almon bin: bu" pad' we' dau: ra" bin: pad' sam pad' shaung: te' ra".

²⁰Myikaug' lo, wa athaung: jham abu" jham we' bu" jo; ra" almon bin: bu" pad' we' dau: ra" bin: bu" pad' byid pad' shaung: te' ra".

²¹Akaung sam zam" mae" zam" khao: ngo" nho: aqao: mae athaung: dalam: lam: de; ra".

²²Athaung: jham- akaung jham we' myikaug' tao" wa qhang gyang" daje, mae" za: kad' to" ru ngad: ra".

²³Yao: wa myikaug' tao" qhid' mae" myikaug' nhad' lam: we' aijham nho: qhid' mae" nye, zai" jham- ban the" jham re qhang gyang" yang kad' ra".

²⁴Myikaug' tao" we' yao" zai kug alhab' re kad' nae" qhang gyang" shid' xe joe: re ci yang: kad' ra".

²⁵Yao: wa sheim nae ja: ngha" nae" qhid' mae" qhoje; sag' yang phan dalam: kad' ra". Aiwa byid khyug ngad mung:- qhang phyao:- dadaung"- lu phyao: dadaung"- myhao phyao: shid' daung" bo: ra". Byid khyug mae" khyug jham rere: sag' pye: dadau: za" yang za: kad' ra".

²⁶Yao: wa aire adao mae re:- ayae byid shad' alhab' mae re:- khyug jham mae re: qhang gyang" yang thab' pye' mung:- lhang" gam: yang: qhang bug ke' ra".

²⁷Amung: yao: wa dao nae" qhid' mae" gyang: yao: shid' yao: jhoe" zaui nae" qhang lo, zaui: akheim" shid' lam: re kad' mung:- ai: ayae kham" qhang bug o mae shid' shad' geim" mae te' ra".

²⁸Yao: wa gyang: yao: re qhoje; sag' yang kad' mung: aire qhang: yang thab' ra".

²⁹Yao: wa sheim nae pyo" ra" ja: gyad xau re we' dakhyo:- gyang" lho" ra" gyad xau re we' sheim nae pyo" ra" ja: agyang" rere: phaung: yu: ra".