Read Maru PHAO: THUG' 38 Bible Online

PHAO: THUG' 38 - Maru bible

PHAO: THUG' 38

¹Yao: wa xeim: jham phad' ngaui" nae" qhid' mae" qhoje; sag' yang phan dalam: kad' ra". Ai: phan wa qhang phyao: ngo" daung"- lu phyao: ngo" daung"- byid khyug ngad: mung:- myhao phyao: sam daung" bo: ra".

²Yao: wa phan agaung we' dasho: za: ngad sho'- akhyug byid khyug aau: mae khyug jham kad' te' ra". Yao: wa ai gu: alhab' re gyid: bo" yang thab' ra".

³Amung: yao: wa phan qhid' mae" zai kug jham ngad: ra" ug' the" jham- ce' bao" jham- khug' jham- anghoe: jham- myi ug' the" jham alhab' rere: kad' ra".

⁴Yao: wa gyid: bo" kyao" dalam: kad' mung: phan anhad' qao: mae to" ra". Airulao" ai wa phan agaung: daqi" khyo myhi nae" ngad: ra".

⁵Yao: wa lo, zaui: akheim" byid lam kad' mung: akhyug byid khyug mae aijham re te' ra".

⁶Aimung: yao: wa qhoje; sag' yang dao nae" gyang: yao: shid' lam: kad' mung: gyid: bo" yang thab' ra".

⁷Amung: phan shad' khao: ngo" mae" lo, zaui: akheim" jham khug khyo jhoe" zaui: ra". Phan wa sag' pye: yang kad' mung: akhug akhaung: ngad: ra".

⁸Yao: wa ASANG: qhid' kheim: Zaung kham: dung: mae caung da" byid: ko" ra" myiqe: qe sang ko" ra" gyid: bo" bao tang" jham: yang gyid: bo" jarung: we' gyid: bo" tao" re kad' ra".

⁹Yao: wa ASANG: qhid' kheim: Zaung qhid' mae" jid: mo" pin: gai akyo pin: lung: jham: yang alhaung" kad' ra". Mug: thao shad' qhid' mae" akyo pin: lung: re qhang phyao: dayo daung" kad' mung:-

¹⁰Aire vin: ci nae" gyid: bo" zang shid' xe zang we' gyid: ne zang pan shid' xe pan we' anghoe: jham- ngaui qae khyao" jham re kad' ra".

¹¹Ai: akyo pin: lung: alhaung" wa mug: am: shad' mae re: daqi" daqang" ngad: ra".

¹²Ba vao shad' qhid' mae" akyo pin: lung: jham re qhang phyao: ngo" xe daung"- kad' mung: ai: qhid' mae" zang daxe zang we' zang pan daxe pan- angoe: jham we' ngaui qae khyao" jham kad' ra".

¹³Kham: dung: shad' ngad: ra" ba thug' shad' qhid' mae" alhaung" rere: lu phyao: ngo" xe daung" bo: ra".

¹⁴Kham: dung: thoe: shad' ce shad' qhid' mae" akyo pin: lung: jham wa daxe: ngo" daung" bo mung:- zang sam zang we' zang pan sam pan ngad: ra".

¹⁶Qae: lhaung" ra" akyo pin: lung: jham alhab' re jid: mo" pin: gai: yang khyab' to" ru ngad: ra".

¹⁷Zang jham: qhid' mae" zang pan jham re gyid: bo" yang kad' mung:- anghoe:- qae khyao"- zang au: anghoe' jham re wa ngaui: yang kad' ru ngad: ra". Alhaung" lhang" gam: mae" zang jham re ngaui qae khyao" yang jho" xo' to" ako".

¹⁸Alhaung" kham: qhid' mae" akyo pin: lung: re anyug mung: ra" khyang- amo, mung: ra" khyang- sug' gug khyang ne: yang qo, mung:- thug' nag: shaung: to" ra" jid: mo" pin: gai yang kad' ako". Airu wa qhang phyao: shid' xe daung"- myao: phyao: ngo" daung" bo mung: alhaung" akyo pin: lung: we' dakhyo: ngad: ra".

¹⁹Aire zang byid zang we' zang pan byid pan: yang vin: ci: ako". Aijham: nho: anghoe: zang au: mae" anghoe' we' qae khyao" jham re ngaui: yang kad' to" ako".

²⁰Zaung taui: daung" zang jham alhab' we' alhaung" lhang" gam: daung" zang jham alhab' re gyid: bo" yang kad' to" ako".

²¹Ceru wa kham" to" ra" Tarha" zang daxe re tung" te' to" ra" laug pye: shid' pye: re ke' to" ra" ASANG qhid' kheim: Zaung kad' rumae ci: ra" gyid: to' jham: nho: japhin: ngad: ra". Ai: japhin: re Moshe yang- amyin" byid: mung: ai: mau" re khinjaung Arun nho: yauggai zo: Ithama yang jhui" au: she: ra" qao: mau" zaui: ko" ra" Levi byu qeyang kad' ako".

²²Yuda kaung mae" ngad: ra" Hura nho: yao: myid:- Uri nho: yauggai zo: Bezale wa ASANG: yang byid' to" ra" amyin" ja: khao: ngo" re kad' ra".

²³Yao: re bao" thaug' yaug ngad: ra" Dan kaung mae" Ahisamag nho: yauggai zo: Oholiab wa kyaung" thung: yang: tung" yaug- azung kad' yaug- anyug mung: ra" khyang- amo, mung: ra" khyang sug' gug khyang ne we' jid: mo" pin: gai qo, yaug ngad: ra".

²⁴Gyang" Lho" Zaung qhid' mae" ASANG re qhaug' byid' to" ra" qhang alhab' re tarha" vao azhao" re cao" yang: lag: qu" re joe: 585 bo: ra".

²⁵Amung: byu japhin: bo: ra" mo, mae" qo" yu: ra" ngaui rere: tarha" vao azhao" re cao" yang: lag: re- joe: 2015 ko ngad: ra".

²⁶Cenho" jham wa byu japhin: mae mang bo: ra" mo, yaug khao: ngo" yang byid: ca" ra" nho" tarha" vao azhao" re cao" mung: lag byid' to" ru we' dano" za: ngad: ra". Shid' xe zin byang" mo, we' mangad: lao"- shid' xe zin je: ra" mo, japhin: mae mang bo: ra" yauggai 603,550 yaug ngad: ako".

²⁷Ngaui joe: 2000 gu: re wa Zaung qhid' mae" we' akyo pin: lung: jham: qhid' mae" zang dayo zang kad' re zang pan dapan qhid' mae" shid' xe joe: joe: ci: ako".

²⁸Bezale wa dang: ra" daxe: ngo" joe" gu: re wa qae khyao" jham- zang jham qhid' mae" anghoe: jham we' zang au: nghoe' jham re kad' ra".

²⁹ASANG re qhaug' byid' to" ra" gyid: bo" wa joe: 1420 bo: ra".

³⁰Yao: wa ai: yang ASANG: qhid' kheim: Zaung kham: dung: qhid' mae" zang pan jham- gyid: bo" phan we' ai nho: gyid: bo" kyao"- phan qhid' mae" zai kug alhab'-

³¹Alhaung" lhang" gam: qhid' mae" we' alhaung" nho: kham: dung: qhid' mae" zang pan jham- Zaung we' alhaung" lhang" gam: qhid' mae" daung" zang alhab' re kad' ra".