Read Maru PHAO: THUG' 7 Bible Online

PHAO: THUG' 7 - Maru bible

PHAO: THUG' 7

¹ASANG wa- ngo wa nao re kho:kham pho" qhid' kheim: mae Mao"So we' dakhyo: kad' nhao nae". Aimung: ni" nho: lapa khyo" ni" mao: Arun wa kho:kham pho" re jhau: li" nae".

²Ngo nao re amyin" byid' ra" gu: ja: khao: ngo" Arun re ta" kyo: wa,. Yao: wa kho:kham pho" re yao" mung"dan: mae" Israel byu qere nhao: thug' ke' nae" qhid' mae" ta" li" nae".

³Ngadqere: ngo wa kho:kham pho" re nhag' lam: qao nhao nae". Yao: wa Egutu mung" mae khonho" sho' qu" gyaug qu" lhaung: ra" ja: ngo kad' sho' ngadqere: ni" dao: re yao: matae" gyo: nae". Ailao"- ngo wa Egutu mung" re gyai xo: ra" qobo dae byid: mung:- nga" byumyu" re ai: mung"dan: mae" jhui" thug' lo" nae".

⁵Nga" lo, tau to' mung: yao: bam re gye kad' yaug: Israel byu qere yao: bam: mung" mae" jhui" thug' lo" lao"- ngo wa ASANG ngad: rure Egutu byu qe ba: li" genae".

⁶Moshe we' Arun tao wa ASANG amyin" byid' ru we' dakhyo: kad' ako".

⁷Yao: shid' tao kho:kham pho" re dao: ye jhau: ra" au: Moshe wa apyad she' xe zin ngad mung:- Arun wa she' xe: sam zin ngad: ra".

⁸ASANG wa Moshe we' Arun tao re-

⁹Kho:kham pho" wa mug' pho: kad' qhu" ra" khyo" naotao yao" gaung re sagse: qhu" byid: nae" mho' lao"- Arun re yao" zaung: bao" re yu: yu yang: kho:kham pho" nho: qhid' kheim: mae pye' khyo" ke' nae" ta" wa,- ai: zaung: bao" wa lhao maui boe" lo" li" nae"- ga: ta" ra".

¹⁰Airumung: Moshe we' Arun tao wa kho:kham jhao" ye: mung: ASANG amyin" byid' to" ru we' dakhyo: yekad' ako". Arun wa yao" zaung: bao" re kho:kham pho" we' yao" zug: qe: qhid' kheim: mae pye' ke' ra". Ai: zaung: bao" wa lhao maui boe" lo" ra".

¹¹Ailao" kho:kham pho" wa- yao" pha,jhi" bo mo, qe we' mandan: ba mo, re khai: yu mung:- yao: bam wa yao: bam yao" mandan: pha,jhi" yang ai we' dakhyo: kad' ako".

¹²Yao: bam wa yao: bam: zaung: bao" jham re pye' khyo" ke' ako". Ai: zaung: bao" jham wa lhao maui jham boe" lo" ako". Ngadqere: Arun nho: zaung: bao" wa yao: bam: zaung: bao" jham re myug: pye' ra".

¹³Ngadqere: kho:kham pho" wa xo' yang nhag' lam: qao: jo, mung:- ASANG ta" to" ru we' dakhyo:- kho:kham pho" wa Moshe we' Arun tao: dao: re manug: tae" gyo: ngad: ra".

¹⁴Ailao" ASANG wa Moshe re- kho:kham pho" wa gyai nhag' lam: qao mung: Israel byu qere nhao ke' nae" ha: pye' ra".

¹⁵Airumung: ne, seim re- kho:kham pho" Nila gyaung: khyo gyo" ye" ra" au:- yao: re ye qhug' wa,- lhao maui boe" ra" zaung: bao" re nao we' daga" yu ci mung: qid yae mae yao: re yelao" na wa,-

¹⁶Ai: thao kho:kham pho" re- Hebre qenho: Mao"So ASANG wa- yao: bam din"pyad' yo mae ngore qo" caung:pa" byid: geshao:- yao" byu qere nhao: ke' byid: nae" qhid' mae" nao re ta" nae" ngore nhao ke' ra". Ngadqere: ana" joe" sho' nao matae" gyo: byid: ngad: ra".

¹⁷Ana" kho:kham pho" we"- yao: pe" ja: kad' li" nae" ra" khyo" yang yao: khag' ngad: rure nao myao: li" nae"- ga: ASANG ta" ra". Qu" wa,- ngo wa ce: zaung: bao" yang ce: qid gyaung: dao: mae be; ke' nae"- ailao"- qid wa sa: boe" lo" li" nae".

¹⁸Ngo: jham shid: li" genae"- aimung: qid wa saung" bab: nae: ruyang Egutu byu qe wa aire maqo" shaug' genae" ein: yeta" wa,- ga: ta" ra".

¹⁹ASANG wa Moshe re- Arun re- yao" zaung: bao" re yu mung: aire Egutu mung" mae" qid gyaung: jham- Qid khyo: jham- qid naung" jham: dao khyo yheim" ke' wa, ein: ta" wa,- qid wa sa: boe" lo" li" nae". Mung" geim" mae sa: boe" lo" mung: sag' kang: we' laug yae: jham mae bo: ra" qid re: sa: boe" lo" li" genae" ga: ein: ta" wa,- ga: ta" ra".

²⁰Moshe we' Arun tao wa ASANG amyin" byid' ru we' dakhyo: kad' ako". Arun wa kho:kham pho" we' yao" nhao: zug: qe qhid' kheim: mae yao" zaung: bao" re tau: to' ke' mung:- qid gyaung: dao mae be; ke' ra". Ai: mae" qid alhab' wa sa: boe" lo" ako".

²¹Qid gyaung: mae ngo jham shid: lo" gemung:- ngo bab sheim saung" nae yang: Egutu byu qe qid re maqo" shaug' ko" ngad: ra". Egutu mung" mae sa: boe" jo; ra".

²²Ailao" kho:kham pho" nho: mandan: sara qe wa yao: bam: man: dan pha,jhi" yang ai we' daja: za: kad' ako". Kho:kham pho" wa genae" we' dakhyo: nhag' lam: qao: jo; ra". ASANG ta" to" ru we' dakhyo:- Kho:kham pho" wa Moshe we' Arun tao: nho: dao: re magyo: lo: ha: pye' ra".

²³Ai: atha"- yao: wa lhang: lo" mung:- yao" kho:kham kho" khyo phao: lo" mung: ceru re pe" shui re: manho lo: na: ra".

²⁴Egutu byu qe alhab wa shaug' qid qo" nae" qhid' mae" qid yae cao" yang: dau" ako". Pe"mung:ga"re yao: bam wa ai qid gyaung: mae qid maqo" shaug' geyang: ngad: ako".

²⁵ASANG ai: qid gyaung: re be; thao nhad' ba lai sho' ngad: ra".