Read Maru PHAO: THUG' 8 Bible Online

PHAO: THUG' 8 - Maru bible

PHAO: THUG' 8

¹Ai: thao Mao"So wa Moshe re- kho:kham pho" jhao" ye: mung:- yao: bam ngore qo" caung:pa" geshao: nga" byu qere nhao: ke' wa,-

²Nao ha: pye' re wa ngo wa- Pohaung jham: yang bam" nghoe' pye' ra" khyo" ni" mung"dan: re qobo dae byid: nae".

³Nila gyaung: wa Pohaung byang" li" mung:- ai: mae ni" kho:kham kho" mae ni" yab qe,- ni" yab jaung:- ni" zug: qenho: yham jham we' ni" mung" byu qe: yham jham ni" mug kad' ra" myikhyeim" we' mug kao: ra" ug' pye: khyo lhao" re: do, lo: li" genae".

⁴Yao: bam wa ni" dao khyo- ni" mung" byu qe: dao khyo- ni" zug: qe alhab' mo; dao khyo byae: do, lo: genae" ga: ASANG ta" ra" ein: yao: re yeta" wa,- ga: ta" ra".

⁵ASANG wa Moshe re Arun re- Pohaung jham thug' li" mung: Egutu mung" re bam" pye' nae" qhid' mae" yao" zaung: bao" re qid gyaung: jham qid khyo: jham qid naung" jham: dao khyo yheim" ke' wa, ein: ta" wa,- ga: ta" ra".

⁶Airumung: Arun wa zaung: bao" re qid alhab' dao khyo yheim" ke' ra". Ailao" Pohaung jham thug' li" mung: mung"dan: re nhai" bam" pye' ako".

⁷Ngadqere: mandan: sara qe wa mandan: pha,jhi" re ci yang yao: bam re: mung"dan: mae Pohaung kad' nha: ke' ako".

⁸Kho:kham pho" wa Moshe we' Arun re khai: yu mung: ce: Pohaung jham re yu: pye' nae" qhid' mae" ASANG re akyu" mho' ge,- yao: bam ASANG re xeim: qo" ngaui" byid: geshao:- naonhaung" byu qere ngo nhao: ke' byid: nae"- ga: ta" ra".

⁹Moshe wa ngo ni" qhid' mae" akyu" mho' nae" rure ngaui bau: nae". Ni" qhid' mae"- ni" zug: qe: qhid' mae"- ni" mung" byu qe qhid' mae" ngo khoyo, re akyu" mho' nae" rure yo, khyin: dang byid: la,- ailao" nao wa Pohaung jham re thug' lo" nhao: li" nae"- Nila gyaung: mae na: ra" gu: mae" je yang: dalam: re: madang lo nae" ga: phaug' tau" ra".

¹⁰Kho:kham pho" wa,- ne kao mho' byid: la,- ga: tau" ra". Moshe wa- nao mho' ru we' dakhyo: ngo kad' nae"- Ailao"- ngonhaung" Mao"So ASANG we' dau: ra" so gatau mana: rure nao ba: li" nae".

¹¹Nao we' ni" zug: qe- ni" mung" byu qe wa Pohaung jham re thug' lo" nhao: li" genae". Nila gyaung: mae na: ra" gu: mae" je yang: dadau: re: madang nae"- ga: ta" ra".

¹²Ai: thao Moshe we' Arun wa kho:kham pho" mae" to" mung:- kho:kham pho" dao khyo jhui" lo byid' ra" Pohaung jham re yu: pye' byid: nae" qhid' mae" Moshe wa ASANG re akyu" mho' ra".

¹³ASANG wa Moshe mho' ru we' dakhyo: kad' byid: mung:- yham jham yham vang jham- yothaung: jham mae na ko" ra" Pohaung jham shid: lo" ako".

¹⁴Egutu byu qe wa aijham re bam mo" zang gaug: zhang: bam: to: gemung: mung"dan: geim" bab: nae: ha" jo; ra".

¹⁵Kho:kham pho" wa Pohaung jham shid: byaug: rure myao lao"- ASANG ta" to" ru we' dakhyo: nhag' lam: dam: qao: li" mung:- Moshe we' Arun tao: dao: re manug: tae" gyo: ngad: ra".

¹⁶ASANG wa Moshe re Arun re- yao" zaung: bao" yang myid gaung re be, nae" ta" wa,- Egutu mung" geim" mae" badan jham wa mho' jham boe" lo" li" genae"- ga: ta" ra".

¹⁷Aimung: Arun wa yao" zaung: bao" yang myid gaung re be; ke' mung:- Egutu mung" mae" alhab' badan wa mho' jham boe" lo" ako". Ai: mho' jham wa byu qere we' gug'nyhug' jham re bam" pye' ako".

¹⁸Mandan sara qe wa yao: bam: mandan: pha,jhi" re ci yang: mho' boe" thug' li" nae" qam: ke' ako". Ngadqere: yao: bam geim" pye' ako".

¹⁹Mho' jham wa khyi" khao: ngo" mae byang" jo; ra". Man: dan: sara qe wa kho:kham pho" re- ce wa Mao"So kad' ru ngad:- ga: ta" ako". Ngadqere: kho:kham pho" wa ASANG ta" to" ru we' dakhyo: nhag' lam: qao mung:- yao: wa Moshe we' Arun tao dao: re manug: tae" gyo: ngad: ra".

²⁰ASANG wa Moshe re- ne, kao ne, seim no' mae" kho:kham pho" qid gyaung: khyo ye" ra" au: re yao: re ye qhug' mung:- yao: bam ngore qo" caung:pa" byid: geshao:- nga" byumyu" re nhao: ke' wa,-

²¹Nao ha: pye' ngad re ni" dao mae- ni" Zug: qe: dao mae- ni" mung" byu qe: dao mae yao khaung: jham re nhao: ke' yang: nao re qobo dae byid: nae" ein: rure ta" peim: byid: li"- Egutu byu qe: yham jham mae yao: khaung: byang" jo; li" nae". Aimung: myid gaung re aijham: yang bam" nghoe' pye' li" genae".

²²Ngadqere: nga" byumyu" qe na: ko" ra" Goshen mang: re wa ngo tang" to: nae"- Au: ai: mae yao khaung: dadau: re: mana nae"- ASANG ngo wa ce: mung"dan: mae mau" kad' na: rure nao ba nae" qhid' mae" ngo wa ceru re kad' nae".

²³Ngo wa nga" byumyu" qe we' ni" byumyu" qe: agyo: mae gakai: lai shai" ra" khyo re kad' nae". Ce: mug' pho: wa ne, kao boe" li" nae"- ga: Hebre qenho: Mao"So ASANG ta" ra" ein: kho:kham pho" re yeta" kyo: wa,- ga: ta" ra".

²⁴ASANG wa kho:kham pho" nho: kho" khyo we' yao" zug: qenho: yham jham khyo yao khaung: jham mo" zang nhao: ke' byid' ra". Egutu mung" geim" yao khaung: jham: yang phyo' qheim" pye' ako".

²⁵Ailao" kho:kham pho" wa Moshe we' Arun tao re khai: yu mung:- ce: mung"dan: mae naonhaung" Mao"So re xeim: ye ngaui" byid: ge,- ga: ta" ra".

²⁶Moshe wa airu magai: kad' nae" pe"mung:ga"re ngonhaung" Mao"So ASANG re qhaug' byid' ra"-ngonhaung" nho: gug'nyhug' jham re xeim: ngaui" byid' ruyang Egutu byu qe ngonhaung" re gye kad' li" genae". Ngonhaung" wa ai gug'nyhug' jham re ci mung: ai: jham re yao: bam myao: ra" tau re xeim: ngaui" byid' re wa- yao: bam ngonhaung" re laug baui: yang pye' se' pye' li" genae".

²⁷Ngonhaung" re yao" yang amyin" byid' to" ru we' dakhyo:- ngonhaung" nho: Mao"So ASANG re xeim: ngaui" byid: nae" qhid' mae" ngonhaung" wa din"pyad' yo khyo sam ba gyaung: su" ye: ca" ra"- ga: ta" ra".

²⁸Kho:kham pho" wa- Naonhaung" va: sho' maye: gere wa din"pyad' yo mae naonhaung" Mao"So ASANG re xeim: ye ngaui" byid: nae" qhid' mae" ngo naonhaung" re nhao: ke' nae". Nga" qhid' mae" akyu" mho' byid: la,- ga: ta" ra".

²⁹Moshe wa ngo cemae" thug' lo" we' ne, mo" ba yao khaung: jham wa nao mae" re: ni" zug: qe mae" re:- ni" mung" byu qemae" re: thug' lo" genae" qhid' mae" ASANG re ngo akyu" mho' nae". Ngadqere: nao wa ngonhaung" re madam: gai: mhug' pyag' ru we' ASANG re xeim: ngaui" byid: nae" ye" lo" na ko" ra" mo, byu qere magai: tam" pye' ngad: ra"- ga: ta" ra".

³⁰Moshe wa kho:kham mae" phao: lo" mung:- ASANG re akyu" mho' ra".

³¹ASANG wa Moshe mho' ru we' dakhyo: kad' ra". Yao khaung: jham wa kho:kham pho" mae" re:- yao" zug: qemae" re:- yao" mung" byu qemae" re:- dao: lo" byaug: ako". Dadau: re: madang: jo, lo:ngad: ra".

³²Ceru: ngad sho' ngadqere: kho:kham pho" wa nhag' lam: dam: qao: li" mung: byumyu" qere madam: nug: nhao: ke' ngad: ra".