Read Maru YOBA 1 Bible Online

YOBA 1 - Maru bible

YOBA 1

¹Uza mug: mae Mao"So re caung:pa" mung: yao: re jhaug' zaug taung" na: ra" Yoba mang: ru dayaug na: ra". Yao: wa byugai ngad mung: makhyang: mashab: mau" pe" re: makad' sho' lha" yang na: ra".

²Yao: wa yauggai zo: nhad' yaug we' myiqe: zo: sam yaug qo" ra".

³Aimung: yao nhad' taung- gola:u sam taung- nung: dataung we' loze ngo" yo dau: qo" ra". Yao: wa daui daui okaung re: myo: sho' qo" mung: ba thug' shad' mung" mae alhab' tho' jo,nho" qo" thao" yaug ngad: ra".

⁴Yoba nho: yauggai zo: qe wa dayaug dalhang poe kad' mung: mao:nhaung: gayaug qere: li" boleim: ko" ru we' yao: nhae: mo" sam zo: re lhaung" bokhai: ako".

⁵Poe kad' bin khao: ngo" thao: ba ne,kao Yoba wa no' mae" yab so: to" mung: yao: zo: qe yaug khao: ngo" re kyang" san byid: nae" qhid' mae" xeim: lhaung" ngaui" byid' ra". Yao: khonhae" re: ceru: pe"mung: lhaung" kad' ga" re yao: zo: qemae" dayaug yaug qe thaug makad' lo: Mao"So re maphug' makhyad' ra" khyo" qobo shad' genae" laug ga: myid: yang: ngad: ra".

⁶Mug:gaung mae na mo, ASANG jhao" li" na: qhu" nae" ayo, joe" lo lao" yao: bam: phaung gaung: mae Satan re: ye: bona: jo; ra".

⁷ASANG wa yao: re- Nao pe" lhaung" kad' qin" i? ga: myid' ra". Satan wa- ngo wa cekhyo thoekhyo du" qin" mung: mug:myid kam" qin" ga: tau" ra".

⁸ASANG wa- Nga" daui daui yaug Yoba re qhug' myao: i? ga: myid' ra". Mug: myid dao mae yao: qhi" jhaug' zaug mung: gai ru dayaug re: mana. Yao: wa ngore caung:pa" na mung: makhyang: mashab: ru daja: re: makad' sho' lha" na: ra"- ga: ta" ra".

⁹Satan wa- Yoba wa pe" akyu" mathe' yu lo: nao re caung:pa" li" nae" i?

¹⁰Nao wa yao: we' yao" yham byu qere khonhae" re: gug:gam byid: mung: yao: qo" sang: to" ru alhab' re gug:gam byid' ra". Yao: kad' ru ja: khao: ngo" mae nao shaman" byid: mung: damungdan: geim" re qo" da" zho: nae" nung: jham yao: re byid' to" ava".

¹¹Yao: qo" ru alhab' re nao qe sham" yu: pye' byid' ngad: re- yao: wa nao re ni" myo, khung: mae yao: nhang" li" nae"- ga: ta" ra".

¹²ASANG wa Satan re- gai va"- yao: qo" ru ja: khao: ngo" wa ni" kheim: so' khug mae ngad: jo; ra". Ngadqere: Yoba re wa nao dae magai: te' nae" lhe"- ga: ta" ra". Aimung: Satan wa to" lo" byaug: ra".

¹³Daba: ba na mae Yoba nho: yao: zo: qe wa yao: bam: mao: mo" nho: yham mae poe kad' na ko" au: re-

¹⁴Lagyo: dayaug Yoba jhao" tao" li" ra". Yao: wa- ngonhaung" wa- nung: lo: jham: yang yothaung: phaug' na: au: re loze jham re: avai: ayae mae" mhin: gyo, jao: jham mae na: bam: ako".

¹⁵Sheba byu qe nyang din taung" li" khe' zin: mung: aijham alhab' re lhad' yu: pye' avako". Yao: bam wa ngo mae" je yang ni" daui daui mo, alhab' re se' pye' ako". Nao re lau dao: ta" kyo: nae" ngo dayaug za: aphao: loe; lo:- ga: ta" ra".

¹⁶Yao" dao: thao mazo, shire daui daui okaung dayaug dam: joe" lo mung:- yao jham we' yao zam: mo, alhab' re mug: geim: se' pye' va". Nao re lau dao: lota" kyo: nae" ngo dayaug za: aphao: loe; lo:- ga: ta" ra".

¹⁷Yao" dao: thao mazo, shire daui daui: ru gatau dayaug dam: joe" lo mung:- Khalde byu sam phung: ngonhaung" re li" khe' zin: mung:- gola:u jham re lhad' yu: pye' byid' ako". Ngo mae" lai yang: ni" daui daui okaung geje alhab' rere: se' pye' ako". Nao re lau dao: lota" kyo: nae" ngo dayaug za: aphao: loe; lo:- ga: ta" ra".

¹⁸Yao" dao: thao mazo, shire daui daui okaung gatau dayaug dam: joe" lo mung:- ni" zo: bam wa yao: bam: mao: mo" nho: yham mae poe kad' na ko" au: re-

¹⁹Din" pyad' yo khyo" thin ra" aug' la hug' lo: ra". Ai: la qam" yang yham re lahug' khyoe' pye' mung: yao: bam alhab' mo; re nhai" se' pye' ava". Nao re lau dao: lota" kyo: nae" ngo dayaug za: aphao: loe; lo:- ga: ta" ra".

²⁰Ailao" Yoba wa to" ye; li" mung: yao" mai bau: re lao" cad' pye' ru we' kaug' ngug: na: ra". Yao: wa au: myhaug' pye' mung: myidgaung mae lamhaung: lagoe, goe; jo; ra".

²¹Yao: wa- ngo pe" maci lo: khau: li" mung: pe" maci lo: shid: lo" nae". ASANG: yang byid' ra"- ana" yao: dam: yu: pye' byid' ra". Yao" mang a re caung:khin" byid: vageshao: wo"- ga: ta" ra".

²²Yoba wa boe" lo: ru ja: khao: ngo" qhug' qere: Mao"So re qobo vhin: ra" khyo" qobo mashad' ngad: ra".