Read Maru YOBA 10 Bible Online

YOBA 10 - Maru bible

YOBA 10

¹Ngo wa na: ngau" va". Nga" alokho: yang: nyhung: ra" thoe re tae" gyo: byid: la,-

²Mao"So we"- ngore dao: daphyid' la,- ngore ta" kyo: la,- ngore qobo zhaug' ru pe" si: ngad: ra" i?

³Nao aiqhi" mamyan: makhyad' yhin" ru wa jo: ra" i? Nao yao: phan" phaug' to" rure nghang: gai: i? Aimung: nhag' khyag' myid mabo: ra" mau" re qinug sam: su qu" qi: ru gai: i?

⁴Boe" lo: ra" gu: re ngonhaung" myao: ruru: nao myao: i?

⁵Ni" apyad wa- ngonhaung" nho: apyad qhi" lang" ra" i?

⁶Aire pe"mung:- nao wa nga" qobo jham re cao" qu" yang: ngo shad' ra" qobo ja: khao: ngo" re cao" qho: qin" ra" i?

⁷Ngo qobo maqo" ru we' ngore khag' yang re: ni" lo, mae" maqo" khyad' yu: rure nao ba: ra".

⁸Ni" lo, yang ngore kad' mung: akhyao kad' to" ra". Ai: lo; yang yao: ngore phyo' qheim" pye' ra".

⁹Nao wa ngore zhogam: yang kad' to" rure myid: beim: wa,- Nao wa ngore phalhug khyo dam: tug' khyoe' mhan" pye' nae" i?

¹⁰Nao wa ngore myhung: ke' nae" qhid' mae" nga" pho" re qam: byid' ra". Nao wa ngore nga" myhi" nho: aung khug mae qi" li" nhao: ra".

¹¹Nao wa nga" shoqug: jham we' qug: khyao jham re akhyao kad' to" ra". Aimung: shoqug: jham re shomhaung" shogyi: jham we' shoqid: yang thab' to" ra".

¹²Nao wa ngore kao so' we' gang" tang: ra" jhid: de; myid ke' byid' ra". Aimung:- ni" gun caung: ruyang ngore daui: na: jo, nhao: ra".

¹³Ngadqere:- ai: ayo, alhab' gu: mae nao wa ngore dae te' nae" qhid' mae" sae za: khug' yaung: to" rure ngo ba va".

¹⁴Nao wa- ngore qobo khonhae" kad' nae" laug- ga: lhaug' qu" lai: lo: va". Airumung: nao ngore qobo maqo" khyad' byid: ngad: ra".

¹⁵Ngo qobo shad' lao" jao" ngo wa nao we' gyo: mae qug: va". Ngadqere: ngo jo: ru kad' re ra" au: re ngo mang gai pe" maqo" yu: Ngo wa myid myo: mung: qho' phau: va".

¹⁶Ngo qe aung doe; ru aqo" yu: ngad: re nao wa ngore khangkhyi we' dakhyo: kung" pye' ra". Nao wa ngore dae qo" te' sho' mug' pho: lo, mau" jham rere: kad' ra".

¹⁷Nao wa ngore ngag: thaug' nae" sagse: daja: ja: khonhae" re: aqo" ci: ra". Nao: yang ngore nhag' yo" ra" ni" nhag' yo: wa je: axo: li" ra". Nao wa khe' zin" ru asag' daja: ja: re khonhae" re: myid: kyae: na: ra".

¹⁸Mao"So we"- nao ngore pe"mung: khau: li" nhao: i? Ngo re khag' yang mathe' myao: shire ngo shid: byaug ang va" ru ngad: ra".

¹⁹Yao: myhi" aung mae" lab khug khyo khyao za: lo" nae" ein: ru wa- manhae" na: re gai ra".

²⁰Nga" apyad wa alaug thao" lo" va" mangad: i? Ngo yao: re za: nha: to: la, ngo phao: thug' lo" ra" ayo, re ngaui bau: taung" kham zo: nhao la,-

²¹Ngo wa mamyao" re lo" byaug mung: khonhae" re: madam: tug' lo lo nae". Cad no, mung: mug: dab: ra" mug: khyo lo" naeva".

²²Bo" bao yao: re: cad' no, boe" ra" jo, qo- mug: cad' mang:- aqab qab: ra" mang:- nhag' cad' nayaug mang: khyo lo" naeva".