Read Maru YOBA 11 Bible Online

YOBA 11 - Maru bible

YOBA 11

¹Ce: lajheim: mabo: rure khag' maphaug' tau: genae" i? Ai qhi" jhau: ruyang byu dayaug re qo" dangman" nhao: ra" i?

³Yoba we"- nao re ngonhaung" maqo" phaug' tau: ein: myid: i? Ni" jung" dao: jham: yang ngonhaung" re majhau lo: qo" tae" jo, nhao nae" i?

⁴Nao ta" ru dang: ga: nao phug: ra". Nao wa Mao"So: myo,khung: mae dangman" ga: nao phug: ta" ra".

⁵Mao"So: yang nao re phaug' tau: byid' qa: we"- ein: ngo lhaung" myid:-

⁶Yao: wa nao re- pha,jhi" myo: sho' va: jo, rure ta" kyo" li" nae". Xao su byu: qhid' mae" saung" no; ra" khyo jham jo; ra". Mao"So wa nao re- nao leim zo: nae" man: qi" ra" tho' yeim" yang: qobo dae byid' na: ra".

⁷Mao"So nho: qi" qhang: ru we' kheim: so' atu" aka" we' kyo: re nao qo" qho: myao byid: nae" i?

⁸Mug:gaung wa Mao"So: qhid' mae" thao" ga" ru majo, ngad: ra". Ngadqere: aiwa nao matho' myhi: ra" mae jo; ra". Mao"So wa movo: mug: re ba: ra". Ngadqere: nao wa aire maba ngad: ra".

⁹Mao"So nho: qi" qhang: ra" khyo wa myidgaung tho' je: lu: ra". Pang:lai:: tho' re: je: lae: ra".

¹⁰Mao"So: yang nao re taung" yu mung: tarha" yung" gau" to" re yao: re tam" pye' nae" khag' na: i?

¹¹Mao"So wa byu khoyaug aphug' made; rure ba: ra". Yao: wa yao: bam: makhyang" ra" lo,mau" alhab' re myao: ra".

¹²Loze lae" jham asham" khyo" khau: li" lao" she,- nhag' magyang: mo, pha,jhi" bo: qhid' li" genae".

¹³Yoba we"- ni" nhag' lam: re jo jo kad' to: wa,- Mao"So jhao" myhi: joe" ye: wa,-

¹⁴Ni" yham mae" makhyang: mashab: ru we' shad' rure yu: pye' wa,-

¹⁵Ai: thao mug: myid re thaug' qhao" yang: kao so' dam: daui wa,- nhag' lam: tang mung: vae" ra" myid bo wa,-

¹⁶Ailao" ni" qug: khai: jham alhab' wa yug: lai: lo" mung: mamyid: beim: lo" ra" qid joe" ru we' dakhyo: ni" xam: myid mae sham: baui" lo" byaug nae".

¹⁷Ni" apyad wa- na" gaung ba tho' je yang: bao: li" nae". Aimung: kao so' gyaung: khyo: nho: cad' no; thao" ra" yo, khyin: wa ne,seim mug: bo" zo" we' dakhyo: bao: li" nae".

¹⁸Nao wa- gug:gam: ru we' myid: lao" ru byang" sho' daui: na: li" nae". Mao"So wa nao re gye vha byid: mung: dugno: qo" yu nhao nae".

¹⁹Nao wa ni" gyevo jham re magyaug ca" nae". Byu myo: sho' mo, wa nao mae" bao" thaug' ru li" mho' li" genae".

²⁰Ngadqere: makhyang: mashab: nhag' lam: kaui mo, wa nhag' lam: thao" ru we' qu" qin" mung: phao: loe, nae" khyo maqhug' myao genae". Yao: bam: myid: lao" jo, qo ein nae" ru wa shid: ru joe" li" nae" ru za: ngad: ra".