Read Maru YOBA 12 Bible Online

YOBA 12 - Maru bible

YOBA 12

¹Ngad va"- naonhaung" wa mo, byu qenho: dao: thoe ngad: ako". Naonhaung" shid: lo" re pha,jhi" re: naonhaung" we' daga" bo: shid: lo" li" genae".

³Ngadqere:- naonhaung" qhi" za: wa ngore: ba: myid: qu". Ngo wa khoshad' khyo" re: naonhaung" o mae mamyham: gyo"- naonhaung" ta" ru alhab' re yaug khao: ngo" ba: ako".

⁴Ana" nga" ba nam qelhao" re: ngore qi: jung" pye' ako". Ngo wa din:man: yaug we' qobo vhin khyo pe" majo, ngadqere:- yao: bam ngore qi: jung" pye' ako". Ngadqere:- nga" akyu" mho' thoe jham re Mao"So tau: byid' ra" ayo, jo; ra".

⁵Naonhaung" wa qug: khai: maqhug' mung: ngore qinug tu" pye' ako". Naonhaung" wa gyang: lang" lo" na yaug re ceim" thaung" ako".

⁶Khug' hab' qe we' Mao"So mabo mo, wa- yao: bam yao" qam: wa yao: bam yao" so ngad sho' ngadqere: yaug yo cae tae" ru we' qo" na: ako".

⁷Ngho' jham we' gug'nyhug' jham lhao" re:- nao re mho" shid' nae" ru gyai qo" ako".

⁸Myidgaung we' panglai: mae phan" to" ra" gug'nyhug' jham re- yao: bam: pha,jhi" myid' yu wa,-

⁹ASANG: lo; yang yao: bam re phan" phaug' to" rure yao: bam alhab' ba: ako".

¹⁰Mao"So wa yao: phan" phaug' to" ra" daui nam alhab' re khyoshid' yaug ngad: ra". Yaug khao: ngo" nho: kao so' wa yao" qam: so' khug mae bo: jo; ra".

¹¹Ngadqere:- naonhaung" sho wa myho' ra" zoxeim: re o: ru we' dakhyo:- ni" nokhye' jham re: jhau dao: kheim: jham re gyo" o: ra".

¹²Phug' mao: qe wa- pha,jhi" bo: ako". Ngadqere: Mao"So wa pha,jhi" we' kheim: so' bo: ra". Phug' mao: qe wa- nhag' lam: sozo: du" ako". Mao"So wa nhag' lam: sozo: du" ru we' kad' boe" nae" kheim: so' bo: ra".

¹⁴Mao"So: yang phyo' pye' re khag' dam: qo" zhaug' to: nae" i? Aimung:- Mao"So yang thaung: lhaung" to" ru qhug' yaug re khag' yang qo" lhoe' ke' nae" i?

¹⁵Mao"So: yang mug: qu re tam" to: lao" myidgaung kyaug' ho: lo" ra"- yao" yang qid phung" thug' ke' re qid je" li" ra".

¹⁶Mao"So wa qam: bo mung: khonhae" re: aung doe; ra". Mhug' pyag' qhug' yaug we' mhug' pyag' yaug shid' zo" geim" Mao"So: kheim: so' khug mae ngad: ako".

¹⁷Yao: wa mung" eib zug: qenho: pha,jhi" re yu: pye' byid' ra". Aimung:- au: jhaung qere kopyad' jham we' dakhyo: ko" qin" nhao: ra".

¹⁸Yao: wa kho:kham jham re aya: khyo" pye' mung: kyam: byu boe" nhao: pye' ra".

¹⁹Yao: wa khinjaung qe we' kheim: so' qo" ra" mo, re deim" khyo" pye' ra".

²⁰Yao: wa- su: yang myid: lam: to" ra" mo, re sae za: tae" byaug nhao: ra". Aimung: phug' mao: qenho: pha,jhi" re yu: pye' byid' ra".

²¹Yao: wa kheim: so' qo" to: mo, re nga: yeim nhao: ra". Aimung: mung" eib zug: qe: qam: re thao" lo" nhao: ra".

²²Yao: wa shid: ru we' dakhyo: cad' no; ra" jo, qo jham khyo bo" bao re nhao: ke' byid' ra".

²³Yao: wa byumyu" mung"dan: jham re qam: bo mung: qi" qhang nhao: ra". Ngadqere: ai:thao yao: bam re seim" nhao mung: phyo' qheim" pye' ra".

²⁴Yao: wa yao: bam: au: jhaung qere kopyad' boe" nhao: ra". Aimung: yao: bam re athaui: anhaung" du" dae" lo" nhao: mung: byaug lo" nhao: ra".

²⁵Yao: bam wa mug: cad' yo mae soe' du" qin" mung: yhid yid mo, we' dakhyo: gyang: be; qin" ako".