Read Maru YOBA 13 Bible Online

YOBA 13 - Maru bible

YOBA 13

¹Nao ta" ru ja: khao: ngo" re qhid' phyao: ngo gyo" qu" va". Aigu: alhab' re ngo ba: gyo" nao ba: qhi" za: wa ngore: ba: ra". Ngo wa ni" o mae manyham-

³Ngadqere:- ngo wa Mao"So we' jho" ngag: na: ru ngad: nao we' mangad:- ngo wa nga" si: re yao: we' ajho" ngag nug: ra".

⁴Nao wa nao maba: rure mhug' ra" dao" yang we' sai" nghoe' pye' ra". Nao wa khag' rere: no maqo" ya: gai: ra" mocid' zug: qe we' dau: ra".

⁵Pe" majhau lo: na wa, aire dayaug yaug: yang nao re pha,jhi" bo nhaung ga: myid: jho: li" nae".

⁶Nga" si: re ta" na: au: tae" gyo" qu" shi: wa,

⁷Nao pe"mung: mhug' na: i? Ni" nho: mhug' ta" ra" dao: jham wa Mao"So re akyu" byid: nae" ein: myid: jho: i?

⁸Nao wa yao: re can: nae" ein: seim" na: i? Nao wa yao" si: re tarha" yung" mae jho" ta" ngag nae" i?

⁹Mao"So: yang nao re te' te' mae" qe zhaug' qu" ngad: re yao: wa gai: ru daja: ja: re qhug' myao nae" laug i? Nao wa byu qere mhug' vhan" ru we' dakhyo: Mao"So re qo" mhug' vhan" nae" ein: myid: jho: i?

¹⁰Naonhaung" nho: myo,nho khyin: ru mamyao sho' nyham" to: ngad sho' ngadqere:- yao: wa nao re qeim: mho" li" nae".

¹¹Aimung:- yao" kheim: so' wa nao re gyaug: din: ru byang" nhao: li" nae".

¹²Ni" dao: zham" jham wa myimhab we' dakhyo: pe" akyu" mabo ngad: ako". Nao ngag: ru wa zhogam: we' dakhyo: gyoe; lo" li" nae".

¹³Sae za: tae" jo, mung: ngore dao: jhau nae" akhang" byid: la,- aimung: boe" thug' lo nae" rure boe" nhao lang:-

¹⁴Ngo wa nga" kao so' re dan: pye' nae" jin" va".

¹⁵Ngo wa myid: lao" jo, qo alhab' re ciphyaug' pye' va". Aimung: Mao"So: yang ngore se' pye' ngad: re pe"mung nae" i? Ngo wa nga" si: re yao: jhao" yeta" kyo: nae".

¹⁶Nga" vae" ra" myid: yang lhao" re: ngore qo" khyad' yu maba- Pe"mung:ga"re- nhag' lam: kaui: ra" byu khag' re: Mao"So jhao" mavae" yeqhug' ngad: ra".

¹⁷Ana" nga" nho: ta" sho' kyo" ra" dao: jham re tae" gyo: wa,-

¹⁸Ngo wa nga" si: re ta" kyo: nae" jin" jin" ngad: va". Pe"mung:ga"re ngo wa jo: rumae na: ein: rure ngo ba:-

¹⁹Mao"So we"- nao wa ngore qobo zhaug' nae" i? Nao qobo zhaug' ngad: re- ngo wa sae za: tae" to: mung: shid: lo" nae" jin" jin" ngad: va".

²⁰Ngo shid' ja: mho' li"- ai: gu: re myid vang" byid: la,- Aire ngo wa nao mae" maphao: vho' qin" nae".

²¹Ngore qobo dae byid' ru thang: pye' mung: ngore kyaug' tin" ruyang dakhyoe' pye' la,.

²²O" Mao"So we"- nao shi" qhid' jhau: qu" wa, ngo phaug' tau: nae". Mangad: lao" ngo re jhau nhao la, ngo nao re phaug' tau: nae".

²³Nga" qobo jham wa pe" pe" ngad: ako" i? Ngo pe" kad' shad' lai: lo va" i? Ngo re pe" yug: mau" mae qobo zhaug' i?

²⁴Nao pe"mung: ngore jao" pye' i? Nao wa pe"mung: ngore gyevo dayaug we' dakhyo: kad' i?

²⁵Nao wa ngore kyaug' nae" seim" na: i? Ngo wa sag' fo' dafo' za: angad:- Nao wa khavho kyaug' dakhyang re za: khe' zin" na: ra".

²⁶Nao wa- ngo ngai shi" au: kad' ru qhid' mae" lhao" re: ngore kyid kyid kho: sho' qobo zhaug' ra".

²⁷Nao wa nga" khyid mae jao co: vhe' to" ra" nao wa ngo ce" lo" ra" khyid bye khao: ngo" re lhaug' qu" na: ra". Aimung: nga" khyid khu jham re lhao" re: ca: qu" ra".

²⁸Ai: mathao khyo" yang- ngo wa sag' qeim: we' dakhyo: bab: lo" mung: nhug: yang zo" mhan" pye' ra" adao: bau: ru: man" lo" ra".