Read Maru YOBA 15 Bible Online

YOBA 15 - Maru bible

YOBA 15

¹Elipha Yoba we"- dao: je dao: myid za: angad: dao: je dao: myid za: angad:-

³Pha,jhi" bo: ru khag' dayaug re: nao re" ru: maqo" jhau- airu" ru lajheim: mabo: dao: jham: yang re: yao: yao" gaung re khag' maqo" ta" vha: yu.

⁴Nao wa naoyao" khyo khyo" lo" re Mao"So re khag' magyaug phug' genae" khag' re: yao: re akyu" mamho' genae".

⁵Nao ta" rumae ni" nho: makhyang: mashab: ru de: de: myao: thug' jo; ra". Nao wa shab shab za; ta" ra" dao: kheim: jham: yang nghoe' pye' nae" seim" na: ra".

⁶Ngoyang nao re qobo zhaug' maca" naoyao: jhau: ke' ra" dao: kheim: khao: ngo" yang nao yao: dao: phyid' yu: ava".

⁷Nao wa sao qhid' khau: qhid: ra" byu ngad ein: myid: i? Mao"So yang bam jham re kad' to" au: re aimae nao na: i?

⁸Mao"So yaung: to" rure nao bothe' gyo" i? Xao su byu: pha,jhi" wa nao za: qo" i?

⁹Ngonhaung" maba: rure nao: yang ba: ga" ru pe" daja: re: majo,-

¹⁰Ngonhaung" wa- ni" pho" makhau shi:mae" na mo, ngad mung:- Ngonhaung" pha,jhi" re apyad qi: au: phyu mo, mae" mho" zhao: yu: va".

¹¹Mao"So wa nao re yaug yo za: na nae" akhang" byid' ava". Nao pe"mung: ngag: ha: na shi" i? Ngonhaung" wa yao" qhid' mae" dao: yo dao: myan khyo" ta" va".

¹²Ngadqere: nao wa nhag' lam: zhau mung: ngonhaung" re nhag' yo" ru we' zhaug' qu" ra".

¹³Nao wa Mao"So re nhag' yo: mung: yao: re ta" phoe: ra".

¹⁴Byu dayaug wa dang dang yao: qo" gyang" yaung" nae" laug i? Byu dayaug wa Mao"So we' dakhyo: qo" dangman" nae" i?

¹⁵Mao"So wa yao" mug: lagyo: jham re lhao" malam ngad: ra". Yao: bam yao" qhid' kheim: mae matho' gyang" yaung" ngad: ako".

¹⁶Aimung: byu wa makhyang: mashab: rure qid we' dakhyo: shaug' na: ra". Ngad: ra"- byu wa- byo; qeim: ra". Byu wa pe" aphug' yao: made, ngad: ra".

¹⁷Yoba we"- ana" ngo ba: ra" ja: re tae" gyo: wa,-

¹⁸Pha,jhi" bo mo; yang ngore yao: bam: phug' pho" qemae" mho" yu: ra" dangman" ru jham re ngore mho" shid' avako". Aimung: yao: bam wa pe" re: manghoe' nyham" to: ngad: ako".

¹⁹Yao: bam: mug: mae taungbug: byumyu" mana ngad: ako". Yao: bam re Mao"So mae" va: khyo jhui" phao: lo" nae" byu mana.

²⁰Gaje qere deim" zag zo" ra" makhyang: mashab yaug wa yao: adaui: na na mae dayin dayo: kham zo" na: li" nae".

²¹Gyaug: din yang: gyi: hug' thoe jham wa yao" notang: mae hug' myang thoe gyo" li" nae". Aimung: yao: gug:gam: na: ga: myid: lam: na: au: re damya, jham yao: re khe' zin" li" genae".

²²Yao: wa mug: cad' mae" phao: loe, nae" khyo maqo" ngad: ra". Pe"mung:ga"re- dajo, qo qo mae yao: re se' pye' nae" shae dakhyae: wa lao" na: ra".

²³Nangda jham wa yao" shid mao re zo: nae" ga: lao" na: ako". Yao" nho: joe" lo nae" ayo, wa mug: cad' cad' jo; rure yao: ba: ra".

²⁴Kyi" khyag' ru wa- kheim: so' qi" ra" kho:kham we' dakhyo: yao: re khe' zin: nae" ga: lao" na: ra".

²⁵Airu wa- Mao"So re lo, zhab' qhu" mung: qam: so' bo: thao" yaug re maphug' makhyad' jung" yaug: au: pa lo, kyo' ngad: ra".

²⁶Aiyaug wa ngad beim: mung: tau: lhan: myid bo: ra". Yao: wa sang: dang taung" yao" go re zaui" ci mung:- Mao"So re khe' zin: nae" ga: phin" ce' tao" ye" ra".

²⁸Aiyaug wa vomo" jham re lhad' sang: yu mung: yham sang qe phao cug' to: ko" ra" yham jham re sang: yu: ako". Ngadqere: gye poe wa- ai: vomo" jham we' yham jham re phyo' qheim" pye' li" nae".

²⁹Yao: wa myao" sho' jo,nho" qo" na nae" mangad:- yao: sang: to" ru pe" re: myao" sho' madang: jo, nae". Yao" nho: bao qab lhao" re: myao" sho' madang: jo, nae".

³⁰Aimung: yao: wa mug: cad' rumae" maqo" phao: loe, nae". Yao: wa- myi" yang sag' kaung jham nga" pye' mung: la: yang abu" jham hug' tao" lo" byaug ra" sag' gae we' dakhyo: dau: ra".

³¹Yao: wa nhag' magyang: yang: makhyang: mashab: rure lam mung: khug: ngha: ngad: re makhyang: mashab: ru wa yao" aphug' jhaung qhu" ngad: li" nae".

³²Yao: wa yao" ayo, madau shire jhoe' sham: byaug: li" nae". Sag' kaung dakaung we' dakhyo: jhoe' sham: byaug mung: khonhae" re: madam: nyug yaung" lo nae".

³³Yao: wa- maqao" shi" ra" sabyi shi: jham shu: gyo" byaug: ra" sabyi naui ru:- Abu" jham shu: gyo" byaug: ra" zhanlun gae ru: ngad: li" nae".

³⁴Mao"So re malam mo, wa myid:zo: maqo" nae". Aimung: khug vag: ngaui: yang zhaug' to" ra" yham jham re myi" yang nga" pye' li" nae".

³⁵Qug: khai: re kyae: to: mung: makhyang: mashab: rure kad' na: ra" byu daqhae: na: ako". Yao: bam: nhag' lam: wa khonhae" re: mhug' pyag' ru byang" jo; ako".