Read Maru YOBA 19 Bible Online

YOBA 19 - Maru bible

YOBA 19

¹Naonhaung" wa pe"mung: ngore dao: kheim: jham: yang yhin" na ko" i?

³Dalhang bin dalhang naonhaung" wa ngore maphug' makhyad' cekad' mung:- naonhaung" yang ngore mangad nghaui" caung: ceim" kad' rure maba: qho' ko" i?

⁴Ngo qe shad' ru kad' sho' ngadqere:- aiwa naonhaung" re pe" no nhao: ra" i?

⁵Naonhaung" wa ngo tho' je: gai: ga: myid: ako". Aimung: ngo qhug' phau: zo" ra" qug: khai: re nga" nho: qobo: sagse: ngad: ga: jho: ako".

⁶Ceru re kad' ke' yaug wa Mao"So ngad: rure naonhaung" mathe' myao ko" i? Yao: yaug ngore myhi" nae" qhid' mae" lha" thaung: to" ra".

⁷Yao" nho: aqan alan mau" re ngo ngag: pye' ngadqere:- khag' matae" gyo: byid: gengad: ako". Tarha" ru qo" yu nae" qhid' mae" ngo hug' yao: rure khag' mathe' gyo: ko" ngad: ra".

⁸Mao"So: yang khyo jhid' to: mung: ngo maqo" lai: thug' lo"- yao: wa nga" khyo re cad' no; yang nyham" to" pye' ra".

⁹Yao: wa nga" jo,nho" alhab' re yu: pye' byid' ava". Aimung: nga" mang gai lahau: re phyo' qheim" pye' va".

¹⁰Yao: wa ngore shad' khao: ngo" khyo" be; khyad' ra". Yao: wa nga" myid: lao" khyo re phan" pye' byid: mung: ngore jhoe' mhai: shid: lo" nhao: ra".

¹¹Mao"So wa ngore nhag' jam: yo" ra". Yao: wa ngore yao" magai: thao" ra" gyevo we' dakhyo: kad' ava".

¹²Yao: wa ngore khe' zin: nae" qhid' mae" gyetab datab nhao: ke' byid' ra". Yao: bam wa gyab lhao: dau: mung: nga" nho: zaung re dau" lhang" kham" ako".

¹³Mao"So wa nga" mao:nhaung: bam: yang ngore shapye' to: genae" khyo: kad' ra". Ngo wa ngore ba mo; qhid' mae" taung bug lamai: boe" byaug va".

¹⁴Nga" ba nam sang: cao: qe we' ba nam qe byaug: byaug va".

¹⁵Nga" yham mae bang" lai: lo" mo, wa ngore to" myhid' pye' avako". Nga" daui daui okaung myhi" myiqe: nau" jham wa ngore taung bug lamai: we' dakhyo: to" ako".

¹⁶Nga" daui daui okaung re ngo yao: ke' re yao: matau: ngad: ra". Ngo re bao" yu nae" qhid' mae" yao: ke' re yao: matau: ngad: ra".

¹⁷Nga" yham sang myhi" wa nga" nhad' bab sheim nae matho' kham ngad: ra". Aimung: nga" mao: nga" nhaung: sang qe wa nga" nhae khyo mate' li" genae".

¹⁸Zoshao qe ngore maphug' makhyad' kad' mung: yao: bam wa ngore myao lao" qi: ako".

¹⁹Nga" sang: tin: ba nam qe wa ngore qu" ca' ra" khyo" qu" ako". Ngo jhid'de; thao" ra" mo, wa ngore ngag: phaug' pye' ako".

²⁰Nga" shoqid jham wa nga" shoqug: jham mae pyan: gyo" jo; va". Ngo wa kao so' we' gaungcin loe; lo va".

²¹Naonhaung" wa nga" ba nam qe ngad: ako". Ngo re nhag' khyag' yu gela,- Mao"So: lo; yang ngore be; lhang" ke' va".

²²Naonhaung" wa pe"mung: ngore Mao"So: yang yhin" ruru: yhin" ko" i? Naonhaung" ngore ceim" yhin" ru maga" shiko" i?

²³Nga" dao: kheim: jham re dayaug yaug: yang xam" ci mung: mugsug' paug' mae tung" to" qa: we" ein: lhaung" taung" myid:-

²⁴Mangad: lao" nga" dao: kheim: jham re apyad ato dung: jo, sho' laug zang mae be, co' tung" te' to: byid' qa: we"-

²⁵Ngadqere: lo" thao" mae ngore gyevha gug:gam byid: nae" yaug mug:gaung mae na: ru ngo ba:.

²⁶Nga" shoqid re no bug: yang zo" pye' sho' ngadqere:- ce: gaung khyao mae adaui: na shi" au: Mao"So re ngo the' myao shinae".

²⁷Ngo wa yao: re ngoyao" myo,jid' yang the' myao nae"- aimung: yao: wa taung bug mangad: lo nae". pe"mung:ga"re ngo wa nhag' lam: thao" va". Naonhaung" wa-

²⁸Yao: re ngonhaung" khoru: yhin" nae"- ga: ta" geyang: naonhaung" wa ngore khe' zin: nae" ru pyi qho: na: ako".

²⁹Ngadqere: ana"- qobo qhid' mae" Mao"So: nhag' jam: yo" ru cili" byid' ra" shae ngad: ra" ai: shae re gyaug ge,. Ailao" dao: kho' ru dayaug na: rure naonhaung" ba: li" genae".