Read Maru YOBA 2 Bible Online

YOBA 2 - Maru bible

YOBA 2

¹Mug:gaung mae" mo, Mao"So: qhid' kheim: mae li" na: qhu" nae" ayo, dam: joe" lo lao"- yao: bam: phaung gaung: mae Satan li" bona: ra".

²ASANG wa yao: re- Nao khai: na: qin" i? ga: myid' ra". Satan wa- myidgaung: dao mae cekhyo thoekhyo du" kam" qin"- ga: tau" ra".

³ASANG wa nga" daui daui yaug Yoba re the' myao: i? ga: myid' ra". Myidgaung: dao mae yao: qhi" jhaug' zaug mung: gai: ru dayaug re: mana ngad: ra". Yao: wa ngore caung:pa" mung: makhyang: mashab: ru pe" re: makad' shad' sho' lha" na: ra". Nao wa- yao: re pe" si: mabo: mae phyo' qheim" nae" qhid' mae" ngore ju" phyo' ngadqere: Yoba wa genae" mae" we' dakhyo: za: jhaug' azaug: na shi" ra"- ga: ta" ra".

⁴Satan wa- Byu dayaug wa qo" daui: na nae" qhid' mae" ja: khao: ngo" re to: co' li" nae".

⁵Ana" nao qe- yao" gaung re dae te' re yao" yang nao re ni" myo, kheim: mae yao: nao re nhang" li" nae"- ga: ta" ra".

⁶Aimung: ASANG wa Satan re- Gai va"- yao: wa ni" kheim: so' khug mae ngad: ra". Ngadqere: yao: re nao magai: se' pye' nae" lhe"- ga: ta" ra".

⁷Ailao" Satan wa ASANG: qhid' kheim: mae" phao: lo" mung:- Yoba nho: gaung geim" mae byang myaug nhao: ra".

⁸Yoba wa basad bam nhae mae yezaung: jo, mung: ug' je, daje; yang yao" gaung re khyag' na: ra".

⁹Yao" yham sang myhi" wa yao: re- Nao wa ga-au: we' dakhyo: za: ajhaug' zaug: na: ashi" mangad: i? Mao"So re nhang: yang: shid: lo" wa, mhao"- ga: ta" ra".

¹⁰Yoba wa- nao pe" lajheim: mabo: ru ta" na: ra". Mao"So: yang ngonhaung" re gai: ru daja: ja: byid' ra" au: ngonhaung" aire lham: khae: yu: ra". Yao" yang qug: khai: boe" nhao: ke' re ngonhaung" khoru: gai: nyhung nae" i? ga: tau" ra". Yoba wa yao: dayin dayo: qug: khai: kham zo: ngadqere: Mao"So re ngag: thaug' ru daja: re: mata" ngad: ra".

¹¹Yoba nho: ba nam sam yaug wa Teman vomo" mae" Elipha- Shua mug: mae" Bildad we' Naama mug: mae" Zopha bam ngad: ako". Yoba khoqhi" khanho" dayin dayo: qug: khai: kham zo" na: rure yao: bam the' gyo: gelao"- yao: re nhag' yetang" byid: nae"- ga: myid: phyid' ako".

¹²Yao: bam gyai va" mae shi" joe" ye" lo" na: au: mae" yao: bam wa Yoba re the' myao: ako". Ngadqere: yao: re maba: qu" se" ngad: ako". Yao: bam ba: qu" se" ke' lao" kaug' qhui: mung: ngug yang: yao: bam: mai bau: re lao" cad' ru we' yao: bam: au: dao khyo phalhug gag: sin: mung: kaug' gyi: ngug: ke' ako".

¹³Yao: khonho" dayin dayo: qug: khai: qhug' kham zo" na: rure the' myao gemung:- yao: bam wa pe" dao: dakheim: re: majhau lo: nhad' myi nhad' ba yao: we' daga" yezaung: jo; ako".