Read Maru YOBA 20 Bible Online

YOBA 20 - Maru bible

YOBA 20

¹Yoba we" nao wa ngore myid myo: nhao: ra"- ana" ngo phaug' tau: nae" rure matho' zang" cilo:-

³Nao ta" lai: lo: ru wa roe" ru yao: ngad: ra". Ngadqere: nao re khoru: phaug' tau: nae" rure ngo ba:-

⁴Gaigai: yao: ganhae" gaco' myidgaung: dao mae byu re nha: qhid: to" au: mae"-

⁵Makhyang: mashab: ru khag' re: myao" sho' maqo" ngaui pyo" na: qu" rure nao ba: ra".

⁶Yao: wa jham thaui: jham mae yao" au: zao" tin: sho' mug:gaung dao khyo qi" qhang: lo" qere:-

⁷Yao: re phalhug badan we' dakhyo: mad: tao" pye' ru qhug' li" nae". Yao: re lhaung" ba mo, wa yao: khai: khyo lo" byaug: laug ga: mug' li" genae".

⁸Yao: wa- yabmo, we' dakhyo: myi" ayo, mae" qhu" lho daja: we' dakhyo: baui" lo" byaug mung:- khonhae" re: mathe' myao lo nae".

⁹Yao: wa- yao: lhaung" na: ra" jo, qo mae" byaug: byaug nae".

¹⁰Aimung: yao" yang myaung mo, mae" khug' yu: to" rure yao" yauggai zo: qeyang gai: ru dam: kad' li" genae".

¹¹Yao" nho: gaung khyao wa mag mag mung: qam: mo" lhaung" bo: ra". Ngadqere: mamyao" re aiwa phalhug boe" lo" li" nae".

¹²Yao" qhid' mae" makhyang: mashab: rure myho' thoe gyo" ra". Aimung: yao: wa zo" keim" nae" qhid' mae" yao" nhad' khug mae ke' ci: ra".

¹⁴Ngadqere: ai: zo:ve wa yao" vae: dug: khug mae kho" byaug: ra" khin cid' we' dakhyo: yao: kyid kyid kho" ra".

¹⁵Makhyang: mashab yaug wa yao: khug' yu: to" ra" jo,nho" re daug: phoe" pye' ra". Mao"So wa- aire yao" vae: dug: mae" lhao" re: tug' yu: pye' ra".

¹⁶Makhyang: mashab yaug myug: pye' ra" ja: wa khin cid' we' dakhyo: ngad: ra" aiwa daug thin: ra" lhao maui dadau: we' dakhyo: yao: re thoe" se' pye' ra".

¹⁷Yao: wa zhanlun xau qid gyaung: jham re the' myao sho' daui: na nae" mangad: nung: nug' we' byoyhid yug: ra" qid gyaung: zo: qe rere: myao co' nae" mangad:-

¹⁸Yao: wa- yao: mau" khao" yang: qo" yu: to" ru alhab' re to: co' ca" li" nae". Yao: wa yao" jo,nho" re myan myan qo" ci yhung: nae" mangad:-

¹⁹Pe"mung:ga"re- yao: wa myaung mo, re zag zo: mung: pe" shui manho kad' yang: gatau dayaug: yang zhaug' to" ra" yham jham re lhad' sang: pye' byid' ra".

²⁰Yao" nho: so' kho' myid wa khonhae" re: nhag' matho' dag ngad: ra".

²¹Yao: zo" au: pe" mazo" tang" ngad: ra". Ngadqere:- ana" wa yao" jo,nho" thao" byaug va".

²²Yao: nghau: nghau: aung doe; ra" au: re kaug' qhui: ra" qola: alhab' wa yao: re khyoe' kad' pye' li" nae".

²³Yao: o: ru alhab' zo: vashao: Mao"So wa nhag' jam: yo" ruyang yao: re qobo dae byid' li" nae".

²⁴Yao: wa jo, to' shae pyang: mae" phao: loe, nae" phin" re gyid: bo" lo,la: wa yao: re bag: lhang" ke' li" nae".

²⁵Myo: dakhe' wa yao" gaung re thug' kyao" pye' mung: ai: myo: nho: qhi qhi mung: ra" myo: au: wa yao" sa: mae jam yang: yao" kheim ce' mae gyaug: din: ru boe" lo: li" nae".

²⁶Yao: qaung" to" ru ja: khao: ngo" wa phyo' qheim" pye' ru qhug' mung: byu: yang mamad: te' ra" myi: wa yao: we' yao" yham byu qere nga" pye' li" nae".

²⁷Mug: khaung wa ceyaug: nho: qobo re pheim: qhu" byid: mung: myidgaung wa yao: re ngag: thaug' ra" sagse: kham byid' ra".

²⁸Yao" jo,nho" alhab' wa Mao"So: nhag' yo: daqid tham: mae phyo' qheim" pye' ru qhug' li" nae".

²⁹Ceru wa makhyang: mashab mo; nho: au: pa lo, kyo' ngad: ra". Mao"So yang yao: bam re kho' gae: to" ra" au: pa lo, kyo' ngad: ra".