Read Maru YOBA 22 Bible Online

YOBA 22 - Maru bible

YOBA 22

¹Mao"So qhid' mae" akyu" bo: ra" byu pha,jhi" bo: thao" ra" yaug lhao" dayaug yaug na: i?

³Nao kad' ra" jo: ra" mau" wa Mao"So re akyu" byid' i? mangad: lao"- nao gai: ru wa yao: re bao" thaug' byid' ra" i?

⁴Mao"So: yang nao re qeim mung: yung" do; ru wa- yao" qhid' kheim: mae nao gyaug: phug' yang: ye; jo; ra" mathao mae boe" ru mangad: i?

⁵Mangad: nae"- aiwa nao qobo saung" kad' shad' yang: ngad: ra". Nao kad' ra" makhyang: mashab: ru alhab' ra" mathao mae boe" ru ngad: ra".

⁶Ni" nho: mao:nhaung: pho" yang- nao re xe' ca" ra" ngaui jhin re dam: qo" xe' sho' ga:- nao wa yao" mai bau: jham re- yao: mae ve, nae" maqo" losho' yu: pye' byid' ra".

⁷Nao wa myaung: mo, re qid mabyid: jhaug'- vae: moe; mo, re zo:ve mabyid: zho: ngad: ra".

⁸Nao wa myidgaung geim" re qo" sham" yu sho' ga:- ni" kheim: so' we' ni" aya: re ci: ra".

⁹Nao wa cug' mo" qere mabao" thaug' ra" tho' mago"- cug' zonau" qere re: lhad' zo: mung: yao: bam re se' da: be, khyad' kad' ra".

¹⁰Aimung: ana" wa- ni" avai: ayae gam: sho' mae dung: gyan: jham byang" jo; ra". Aimung: nao wa- nyag din taung" gyaug ci" ru qhug' ava".

¹¹Mug: cad' saung" no, mung: nao mathe' myao lo:- aimung: qid je" ruyang nao re lheim" nhai" pye' va".

¹²Mao"So wa myhao: thao" mug: khaung mae na mung:- kyi jham re: amyhao mae jo; bam: ngadqere: yao" yang qu" khyo" ke' mangad: i?

¹³Ngad sho' qere:- nao wa Mao"So pe" ba: i? Yao: re jham thaui: jham: yang anghoe' to" ra". Yao: wa ngonhaung" re khoru: dao: ba: kho' byid: nae" i? ga: ata" na: ashi"-

¹⁴Mug:gaung khung" mae yao: su" lo" ra" au: re thau: ra" jham thaui: wa yao: mamyao sho' nghoe' to" ra" ga: nao myid: jho: ra".

¹⁵Makhyang: mashab mo, khonhae" re: lhaung" cao" ye" ra" khyo mae nao re: su: nae" ein: myid: phyid' to: va" i?

¹⁶Yao: bam: ayo, lhao" majoe" shire- qid je" li" ruyang yao: bam re pyaung" khyad' tai: lo" li" nae".

¹⁷Ce: byu qe wa- Mao"So re ngag: ha: pye' mung: yao: bam re Mao"So pe" maqo" kad' ga: myid mo, ngad: ako".

¹⁸Ngadqere: yao: bam re na: dai nhao: ru wa Mao"So yao: ngad:. Makhyang: mashab mo, myid: ru jham re ngo matho' ba: gyo: lo:-

¹⁹Makhyang: mashab mo, qobo dae byid' ru qhug' rure yao: bam myao lao" byugai qe ngaui bau: mung: qobo maqo" mo, qi: ako".

²⁰Makhyang: mashab yaug sang: ru alhab' wa phyo' qheim" pye' qhug' ra". Aimung: dang: ra" ja: khao: ngo" rere: myi" yang nga" pye' ra".

²¹Yoba we"- ana" nao Mao"So we' mang: dae wa, aimung: yao: re gyevo reru: zam" khug ra" khyo re to" pye' se,- nao airu: kad' re- yao: wa nao re shaman" byid' li" nae".

²²Yao: byid' ra" mho" shid' dao: re khae: yu wa, yao" dao: kheim: jham re ni" nhag' lam: mae zam" ci wa,.

²³Ngad va"- nao wa nyham: khyo" ru we'- Mao"So jhao" dam: tug' lo ca" ra"- aimung:- ni" yham khug mae kad' ra" makhyang: mashab: mau" alhab' re to" pye' ca" ra".

²⁴Ni" qhang re shapye' pye' wa,- gyang" thao" ra" ni" nho: qhang re kyaug' ho: ra" gyaung: zo: kao" mae tai: bam: pye' wa,-

²⁵Qam: so' bo: thao" ra" Mao"So wa ni" nho: qhang ngad vashao:- aimung: yao: wa- ni" qhid' mae" bam: zao: jo; ra" ngaui ngad vashao:-

²⁶Ailao" nao wa khonhae" re: Mao"So re lam khug: na mung: yao: wa ni" nho: ngaui bau: khyo ajhaung ngad: rure nao qhug' myao: li" nae".

²⁷Nao akyu" mho' re yao: wa nao re tau: byid' li" nae". Aimung: nao wa- nao to" to" ra" dao: thang" re phug' cao" li" nae".

²⁸Nao kad' ru alhab' mae nao aung doe; li" nae" aimung: ni" nho: khyo mae bo" bao bao byid' li" nae".

²⁹Mao"So wa ngad beim: mo, re lao" khyo" pye' mung:- nhag' lam: nyham: khyo" mo, re khyad' yu: ra".

³⁰Nao wa qobo maqo" ngad: re- nao kad' ru jo: ngad: re- yao" yang nao re khyad' khyui: yu: li" nae".