Read Maru YOBA 23 Bible Online

YOBA 23 - Maru bible

YOBA 23

¹Ngo wa Mao"So re tau: lhan: mung: qobo vhin anyhung: na shi" ra". Ngo nokyang: kyang" rure maqo" zang" ci-

³Yao: re khai: mae qo" qho: qhug' nae" laug ein: ba nug: ra". Yao: na: ra" khyo khoru: ye: nae" rure: ba nug: ra".

⁴Ngo wa nga" si: re yao" qhid' kheim: mae pheim: qhu" mung: nga" shad' khyo ta" nug: ru alhab' re qo" ta" kyo: nae".

⁵Yao: khoru: ta" mung: ngore khokhyo: phaug' tau: byid: nae" ga" rure ngo ba nug: ra".

⁶Mao"So wa yao" qam: alhab' yang ngore ngag thaug' nae" laug i? Airu: mangad: nae"- yao: wa ngo jhau: rure tae" gyo: byid' li" nae".

⁷Ngo wa dangman" ra"- ngo wa Mao"So we' qo" jho" ta" nae" ngad: ra". Yao: wa ngore qobo maqo" ga: dalhang: dae bin sho' ta" byid' li" nae".

⁸Ngo wa ba thug' shad' khyo qho va" ngadqere: Mao"So wa aimae mana- ba vao shad' mae ngo qho: re aimae yao: re ngo maqhug' myao.

⁹Mao"So wa mug: am: we' mug: thao mae mau" zaui" lai: lo va". Ngadqere: yao: re ngo mathe' myao shi:-

¹⁰Ngadqere:- Mao"So wa ngo cae" ye" ra" khu byae khao: ngo" re ba byid' ra". Yao" yang ngore ca: qu" re ngo gyang" san: ru the' myao: li" nae".

¹¹Ngo wa yao: khyin: ra" khyodang mae jhaug' zaug taung" cao" ye" ra" aimung: lo, kaung: lo, yo khoshad' khyo re: madu" lae" lo"-

¹²Ngo wa Mao"So amyin" byid' rure khonhae" re" kad' cao" na:- Ngo wa yao" myid o: rure cao" mung: ngo yao: myid o: kao bau: ra" khyo" macao".

¹³Yao: wa khonhae" re: matha" malai: yao: re khag' yang maqo" ngag: thaug'- yao: kad' nug: rure maqo" kad' sho' khag' yang re: maqo" tam"-

¹⁴Yao: wa nga" qhid' mae" ga: yao: yaung: to" rure kad' pyang" li" nae". Ai: myid: yaung: to" ra" qo, kyae wa yao: yaung: to" ru myo: sho' mae" daja: ja: angad: ra".

¹⁵Ngo wa yao" qhid' kheim: mae gyaug yang: nin" na:-

¹⁶Qam: so' bo: thao" ra" Mao"So wa nga" sulhe: myid re phyo' qheim" pye' va". Mug: cad' ruyang ngore myo,jid nhao: re lao"- Ngo re gyaug nhao: ru wa no,sang kyid mug: cad' yang mangad:- aiwa Mao"So ngad: ra".