Read Maru YOBA 24 Bible Online

YOBA 24 - Maru bible

YOBA 24

¹Mao"So wa pe"mung: yao: re caung da" byid: mo; qhid' mae" dao: kho' nae" ayo,- tarha" din: nyang: ru daba na madang: to: byid' laug i?

²Byu qe wa- myidgaung je: qo" yu sho' ga: mug: kyo: re qhui" ako". Yao: bam wa yao jham re khug' yu mung: yao: bam: yao kyaung" khug mae boke' to" ako".

³Yao: bam wa- cug' zonau" qe sang: ra" loze jham re lhad' yu: pye' byid: mung:- cug' mo" myhi" nho: nung: lo: re- yao" jhin bin: xe' sho' zam" ci: to" ako".

⁴Yao: bam wa myaung mo, qo" yu ang: ra" akho: akhang" re maqo" yu sho' jhid' pye' ako". Aimung: jo,nho" maqo" mo, re tao" phao: vho' qin" naekhyo: jhan" ako".

⁵Aimung: myaung mo, wa- yao: bam: yao: zo: qe: qhid' mae" zo:ve re gatau khai: mae" maba: qho: myao ngad: ako". Loze lae" jham we' dakhyo: kyaug' ho: ra" din"pyad' yo mae zo:ve qho: qin" ako".

⁶Yao: bam wa- yao: bam masang: ra" yo jham mae" gaug zo yad ca" ako". Aimung: makhyang: mashab mo; nho: sabyi khyae jham mae" sabyi shi: jham re phyo' zhang ca" ako".

⁷Myi" ayo, mae yao: bam wa pe" mave, lo: yab: ako". Gyo; rure tam" pye' nae" pe" maqo" ngad: ako".

⁸Yao: bam wa- bam jham: dao mae qu: khyo" ra" mug: qu qid: yang bab bab jhug' byaug: ako". Aimung: yao: bam wa laug bam jham: ayae mae mug: qu khug yang gyo; zhan: bam: ako".

⁹Makhyang: mashab mo, wa yao: pho" maqo" ra" zoshao qere jeim kad' pye' ako". Aimung:- myaung yaug: nho: yao: zo: qere ngaui jhin khyo" sham" yu: pye' byid' ako".

¹⁰Ngadqere: myaung mo, wa yao: bam: gaung lam nhao nae" mai bau: mave, lo: thug' lo" ca" ako". Yao: bam jung: gaug yad: na: au: re vae: moe; phau: ca" ako".

¹¹Yao: bam wa zhanlun xau pyag' mung: sabyi qang: qo" nae" sabyi nao" thug' ngadqere:- yao: bam yao: wa qid shab' phau" ako".

¹²Vomo" khug mae dae de; mo, we' shid: lo" na mo, hug' yao: ako". Ngadqere: Mao"So wa yao: bam: akyu" mho' dao: re gyo" lhaui" pye' byid' ra".

¹³Bo" bao re ngag: ha: pye' mo, na: ako". Yao: bam wa airu re maba: gyo: mung:- aiwa khokhyo jhui" lo" rure maba ngad: ako".

¹⁴Byuse' yaug wa ne, kao ne,seim mae to" mung: myaung mo, re se' pye' nae" ga: thug' lo" ra". Aimung: yao: wa myi" ayo, mae khug' zo" ra".

¹⁵Su: myi: shad' yaug wa mug: sham" sham" cad' lo nae" rure lao" na: ra". Yao: re khag' yang mathe' myao sho' yao" myo,khung: re nghoe' ci: ra".

¹⁶Khug' hab' qe wa myi" ayo, mae yham jham: khug khyo phyo' cad' vao ye" ako". Ngadqere: na" gaung mae wa yao: bam vho' jo,mung: bo" bao re jao" pye' ako".

¹⁷Yao: bam wa na" gaung bo" bao re gyaug: ako". Ngadqere:- cad' no; ru wa yao: bam re gyaug din ja: maboe" nhao ngad: ra".

¹⁸Makhyang: mashab yaug wa qid gyui: yang sham" lo" ru qhug' ra". Aimung: yao: sang: ra" mug:myid wa Mao"So: nhang: kheim: zao" ra". Yao: wa yao" sabyi khyae jham mae mau" maye: zaui: lo:ngad: ra".

¹⁹Gyu: wa- ba laung we' kyaug' ho: rumae baui" byaug: ra" gyu: we' dakhyo: qobo byu re: daui: na mo; mug:myid dao mae" baui" lo" byaug: ra".

²⁰Ana" yao: myhi" yang lhao" re: yao: re mamyid: beim: lo:ngad: ra". Yao: re laug daung: jham: yang ceim" zo" pye' mung:- gyang: lang" jo; ra" sag' gae re we' dakhyo: phyo' qheim" pye' ru qhug' ra".

²¹Airu: boe" ru wa- cug' mo" qere yao" yang mangad mangung: kad' mung: bug daung: qere nhag' khyag' myid maqhu" byid: yang: ngad: ra".

²²Mao"So wa yao" qam: so' yang qam: mo" bo mo, re phyo' qheim" pye' ra". Mao"So lo,mau" zaui: mung:- makhyang: mashab yaug shid: lo" ra".

²³Mao"So wa yao: re gug:gam taung" na nhao ngadqere: yao" dao mae ayo, byang" sho' jo" qu" na: ra".

²⁴Makhyang: mashab yaug wa dazab daso' za: na: dai: ra". Ngadqere: ai:thao yao: wa myo, gae we' dakhyo: re: she' yu: pye' ra" gaug nhae we' dakhyo: jhoe' sham: lo" ra".

²⁵Ceru: mung: rure maboe" ein: khag' dayaug qo" ngag genae" i? Nga" dao: kheim: jham madang ein: khag' dayaug sagse: qo" qhu" byid: genae" i?