Read Maru YOBA 27 Bible Online

YOBA 27 - Maru bible

YOBA 27

¹Ngo wa- ngore tarha" din: nyang: ru ngag: ha: pye' byid: mung: nga" pyad re kho: nhao: ra" kao so' daui: na: ra" qam: bo: thao" ra" Mao"So: mang lao: yang jham tang" ra".

³Mao"So: yang ngore so' ashe: na nhao nhao mae- nga" nhad' khyo" makhyang: mashab: ru khonhae" re: mata" nae". Nga" sho wa khonhae" re: mhug' dao: mata" nae".

⁵Byu naonhaung" wa jo: ako" ein: ngo khonhae" re: mata" nae". Ngo wa- ngo shid: lo" qid ba na joe" sho' ngo qobo maqo" ein: ta" na nae".

⁶Ngo jo: ra" ein: ta" rure ngo khonhae" re: mathang: pye' nae". Nga" aung khug nhag' lam: mae sho' sho' za: angad:-

⁷Ngore ngag: thaug' mo, we' ngore khe' zin: mo, alhab' mo, wa makhyang: mashab mo, we' madin: man: mo, re we' dakhyo: qobo dae byid' ru qhug' vageshao:-

⁸Mao"So: yang- Mao"So maba mo, re yao: bam kao so' mho' ra" yo, khyin: mae yao: bam myid: lao" nae" pe" jo; ra" i?

⁹Qug: khai: joe" li" re yao: bam: hug' yao thoe re Mao"So gyo: byid: nae" i?

¹⁰Yao: bam wa yao" yang byid' to" ra" ngaui bau: khyo re qo" kham zo: ca" ru ngad: ako". Yao: bam wa yao: re abang mabyid lo: akyu" mho' ca" ru ngad: ako".

¹¹Mao"So: kheim: so' khonho" qi" qhang: rure nao re ngo mho" byid: shive- aimung: qam: so' qi" thao" ra" Mao"So wa pe" myid: kyae: to: va" ru sho' kyo: nae".

¹²Ngadqere:- airu: mangad: nae"- lo" thao" mae naoyao: qu" myao: ava". Aire nao pe"mung: lajheim: mabo: ru ta" ra" i?

¹³Ceru wa- Qam: so' bo: thao" ra" Mao"So: yang makhyang: mashab: ra" aqan alan byu qere qobo dae byid' ru ngad: ra".

¹⁴Yao: bam wa yauggai zo: myo: sho' qo" qere: gye poe mae alhab' mo, se' pye' qhug' li" genae". Yao: bam: zoshao qe wa khonhae" re: gyi: sho' maqo" zo: genae".

¹⁵Mashid na: dang mo, re: no aja: ja" yang shid: lo" li" genae". Aimung: yao: bam: cug' mo" qe lhao" re yao: bam shid: au: re makaug' ngug genae".

¹⁶Makhyang: mashab mo, wa ngaui matho' nghe' losho' qo" ako". Amung: qo ca" ra" tho' mai bau: je: gai: qo" ako".

¹⁷Ngadqere: byugai dayaug: yang ai: mai bau: jham re ve; pye' byid' li" nae"- amung: din:man" ra" yaug wa ai: ngaui re qo" yu: pye' li" nae".

¹⁸Makhyang: mashab yaug wa yham zhaug' qere: phyogao: yham we' dakhyo: mangad: lao"- yothaung: lhaug' ra" jeim okaung: nho: zaung khyae: we' dakhyo: ngad: ra".

¹⁹Lo" thao" dalhang za: yao: bam jo,nho" qo" mung: lang" jo; li" genae". Amung: yao: bam so" li" re yao: bam: jo,nho" baui" byaug: ru the' myao: li" genae".

²⁰Gyaug: din ja: wa yao: bam re qid je" li" ru we' dakhyo: li" nhai" mung: myi" ayo, mae" la hug' wa yao: bam re mad: tao" pye' li" nae".

²¹Ba thug' shad' mae" la wa yao: bam re yao: bam: yham mae" jhad' za: hug' paui" pye' li" nae".

²²Yao: bam phao: loe, nae" gai: boe" qhi" qam: phin" na: au: re ai: la yang nhag' makhyag' losho' yao: bam: dao mae hug' byid' li" nae".

²³Yao: bam tao" phao: lo" ra" au: re la wa yao: bam: thao cao" hug' mung: byo; qeim nhao: ra" kheim: so' yang yao: bam re cao" kyaug' li" nae".