Read Maru YOBA 28 Bible Online

YOBA 28 - Maru bible

YOBA 28

¹Ngaui re dau" yu: ra" ngaui khung: jham jo, ra" qhang re phad' kyang" san: ra" jo, qo jham jo; ra".

²Byu qe wa myidgaung khug mae" jo, to' re dau" thug' yu: ako". Amung: gyid: ne re laugbaui mae" phad' yhug' yu: ako".

³Byu qe wa no; thao" ra" mug: cad' re ca: qu" ako". yao: bam wa myidgaung khoqhi" no; rure qho: qu" ako". Aimung: mug: cad' khug mae laug zang jham re dau" qho: ako".

⁴Byu na: ra" jo, qo mae" va: va: mae- mangad: lao"- xao su byu: khyid yang khonhae" re: maye: zab: joe" qu" ra" jo, qo mae- byu qe wa byu qe wa dungkhung: dau: mung:- aimae yao: bam yao: za: dungkhung: mae" taui: re jui" lao" ci mung: mau" zaui" laung" jo; ako".

⁵Myidgaung khug mae" zo:ve yaug: thug' li" ra". Ngadqere:- ai: myidgaung khug mae yao: alhab' gyoe; byo; jo; ra".

⁶Myig gaung mae" laug zang jham mae phug' de; ra" laug ne bo: ra". Amung: ai: myid zhai: mae qhang bo: ra".

⁷Ai: mo: dungkhung: khyo vao ye" ra" khyo re zeim: yang mathe' myao amung:- ai: adao khyo" nangda khonhae" re: madao" lai ngad: ra".

⁸Khangkhyi mangad: lao" gatau: gug'nyhug' lhe: re: ai: cae: jhug tag: khyo jham khyo" masu" lai ngad: ako".

⁹Byu qe wa qao: thao" ra" laug bam jham re dau" pye' ako". Bam jham re bam khyid joe" sho' dau" pye' ako".

¹⁰Yao: bam wa laug bam khug khyo" dau" kyaung" phung" lo" au: re- yao: bam wa phug' de, ra" laug jham re qhug' myao: yu: ako".

¹¹Yao: bam wa qid gyaung: jham: nho: qid meim jhaung jham re dau" pye' mung: nyham" to" ra" ja: re bo" bao khyo cilo: ako".

¹²Ngadqere: pha,jhi" re khai: mae qhug' qho: yu nae" i? Laba lajhao re ngonhaung" khai: mae" mho" zhao: yu nae" i?

¹³Pha,jhi" re byu qe: phaung gaung: mae qo" the' qho: yu ja: mangad:- yao" dangman" ra" aphug' re khag' maba byid: ngad: ra".

¹⁴No; ra" nammugdara we' panglai: ta" ru wa- ai: jo, qo mae pha,jhi" re maqhug' qho ga: ta" ako".

¹⁵Aire ngaui we' qhang: yang maqo" vai: yu-

¹⁶Gai: thao" ra" qhang we' laug jham wa ainho: aphug' we' magai: tai" ngad: ra".

¹⁷Airu wa qhang tho' je: phug' de, mung: qhang yae: we' gai: thao" bao tang" laug tho' je: phug' ra".

¹⁸Pha,jhi" nho: aphug' wa panglai: laqhoe: tho' re: laug gyang: tho' re:- laug ne tho' re: je: phug' ra".

¹⁹Gai: thao" ra" Utaphya laug we' gyang" san: thao" ra" qhang wa pha,jhi" nho: aphug' we' matho' gai: tau" ngad: ra".

²⁰Airu: ngad: re- pha,jhi" nho: ajhaung wa khai: mae jo; ra" i? Laba lajhao re ngonhaung" khai: mae" qo" qho: yu nae" laug i?

²¹Kaoso' daui: ru pe" ja: re: aire mathe' myao dao" qin" ra" ngho' lhao" re maqhug' myao-

²²Shid: ru we' phyo' qheim" ru lhao" re: lau dao: za: agyo" qu" ga: mho: ako".

²³Mao"So yao: za: ai: khyo re aba: ra". Pha,jhi" re qhug' myao: yu nae" jo, qo re ba: ra".

²⁴Yao: wa myidgaung thao" sho' re myao yaug ngad ruyang mug:gaung gyid' mae" ja: khao: ngo" re the' myao: ra".

²⁵Mao"So wa la re kheim: so' byid' ra" au: we' panglai: khoqae: ngad nae" rure myid: phyid' ra" au: re-

²⁶Khai: mae mug: qu nhao nae" ga: Mao"So myid: phyid' ra" au: we' mug: gyug: we' lhe' cad' cad' ra" jham thaui: su" lo" nae" khyo re yaung: to" au:-

²⁷Yao: wa pha,jhi" re the' myao mung: ainho: aphug' re ca: qu" ra"- aire yao" myid: vang" ru jao dang byid' ra".

²⁸Mao"So wa xao su byu qere- pha,jhi" ba nae" qhid' mae" naonhaung" wa ASANG re gyaug phug' ca" ako". Ba: gyo: nae" qhid' mae" makhyang: mashab: rumae" naonhaung" lhang: lo ca" ako"- ga: ta" ra".