Read Maru YOBA 3 Bible Online

YOBA 3 - Maru bible

YOBA 3

¹Lo" thao" mae Yoba shi" jhau: thug' li" mung: yao: khau: li" ra" ba na re nhang" ra".

²O" Mao"So we"- ngo khau: ra" ba na re nhang: wa,- ngore de; qhid: ra" myi re nhang: wa,-

⁴Mao"So we"- ai: ba na re myi" boe" nhao wa,- ai: ba na re khonhae" re: dadam: beim: lo:- ai: ba re khonhae" re: dadam: bao: jo, nhao lo:-

⁵Ai: ba na re mug: dab mung: no, sang: kyid cad' na nhao wa, ai: ba na re jham thaui" jham: yang nghoe' pye' mung:- ba re sad' paui" pye' wa,-

⁶Dazin: khug mae" ai: myi re sad' paui" pye' wa,- aimung: ai: ba na re khonhae" re dadam: nghe' nhao lo:-

⁷Ai: myi re cae jhug tag ngaui bau: majo; ra" myi boe" nhao: pye' wa,-

⁸Ai: ba na re nhang: nae" qhid' mae" mandan: vha" mo, re ta" nhao wa,- Maojaung: Levithan re ba: khang" ba: eib mo, re ta" wa,-

⁹Bo" myhung re mabao lo: sho' kad' to: wa,- ai: myi re mug: bo" ru myid: lao" nae" dajo, nhao-

¹⁰Ai: myi mae ngore qug: khai: we' kaug' qhui: ru khyo khau: thug' ke' ra" mathao mae ai: myi re nhang: wa,-

¹¹Ngo wa nga" myhi" nho: aung mae pe"mung: mashid: laug i? Ngo khau: li" au: yao: pe"mung: mashid: byaug: laug i?

¹²Nga" myhi" wa pe"mung: ngore yao" pad' laug dao mae vo; ci: laug i? Ngo re pe"mung: yao" nug' cug jhaug' laug i?

¹³Ai: ayo, mae ngo shid: byaug: ngad: re ana" ngo wa dug no" na mung:-

¹⁴Ganhae" gaco' mae" kho:kham kho" jham re dam: zhaug' co' ra" kho:kham qe we'- mung" eib zug: qe we' dakhyo: qo" yab: jo, naeva".

¹⁵Ailao" ngo wa- yao: bam yao" yham mae qhang we' ngaui jham byang" sho' ke' pyang" to: co' ko" ra". kho:kham nau" qe we' dakhyo: mangad: lao"-

¹⁶Ashid khau: li" ra" zoshao we' dakhyo: qo" yab: jo; naeva".

¹⁷Lab khung: khug mae- makhyang: mashab mo, wa yao: bam: makhyang: mashab: mau" re thang: pye' ako". Ai: jo, qo mae mau" khao" zo" myaung: mo, wa- lo" thao" mae dugno: qhug' yu: ako".

¹⁸Kyam: byuqe lhao" re:- hug' yhau yang: mamyan: makhyad' amyin" byid' rumae" loe, mung:- yaug yo cae tae" ru kham zo" ako".

¹⁹Mang qi: mo, we' khag' yang maba mo, yaug khao: ngo" wa aimae joe" jo; ako". Aimung: jeim qe wa lo" thao" mae loe; beim: ako".

²⁰Xao su byu re pe"mung: nhag' kaug' nhag' ngai xo' daui: na nhao: i? Kaug' qhui: na mo, re pe" kad' yang: bo" bao ba: byid: nae" laug i?

²¹Yao: bam wa shid: rure lao" ngadqere: aiwa khonhae" re: majoe" li" ngad: ra". Yao: bam wa- phug' de; ra" jo,nho" pe" ja: tho' re: shid: rure aje: o: ako".

²²Yao: bam shid: byaug mung: nyhab' pye' ru za: maqhug' qhug' wa mangaui bau: ngad: ako".

²³Mao"So wa yao: bam: joe" lo nae" ayo, re nyham" to: mung: yao: bam re shad' khao: ngo" khyo" go: to: byid' ra".

²⁴Ngo wa zo: shaug' nae" atha" kaug' ngug: na mung:- nokyang: khonhae" re: maqo" thang-

²⁵Ngo gyaug mung: myid: ci" ru ja: khao: ngo" wa jo; boe" lo: avako".

²⁶Ngo mae yaug yo cae: tae" ru majo, dugno: maqo" yu- aimung: nga" qug: khai: wa khonhae" re: mathao" magan lo:ngad: ra".