Read Maru YOBA 30 Bible Online

YOBA 30 - Maru bible

YOBA 30

¹Ngadqere: ana" kam" wa ngo tho' je: ngai: ra" yauggai qeyang ngore qinug cetu" ako". Yao: bam: yao: pho" qe wa pe" akyu" mabo aphug' yao: made, mung: nga" yao zaung" lakha: jham re bao" nae" qhid' mae" lhao" re: yao: bam re malhaung" nhao: ru ngad:-

²Yao: bam wa qam: gan: byaug va" yauggai daphung: ngad mung: nga" qhid' mae" pe" mau" re: maqo" zaui: byid: lo:ngad: ako".

³Yao: bam wa saung" myaung mung: vae: saung" moe' ruyang myi" ayo, mae seyo sag' gae khaung: sag' gyi: kyaug' jham bin" phai" zo" lo: ako".

⁴Yao: bam wa din"pyad' yo mae" sag' gyi: jham re lao" phan" yu mung: zo" ako". Pe" min mabo: ra" sham: ban: gae agyi: jham lao" zo" ako".

⁵Yaug khao: ngo" wa- khug' hab' jham re zag: hug' tao" ke' ru we' dakhyo: yao: bam re hug' tao" pye' ako".

⁶Yao: bam wa laug aug' khaung:- laug byo, mae dau" to" ra" dungkhung: khaung: phao: laung" qin" ca" ako".

⁷Yao: bam wa seyo sag gae khaung: mae gug'nyhug' jham we' dakhyo: myang: qin" mung: thao" paung" qao: mae daga" ham: na: ako".

⁸Pe" aphug' made; ra"- kho khoru" ra" byulae" qe za: angad: ako". Yao: bam wa mug: myid mae" khe' thug' pye' qhug' ako".

⁹Ana" yao: bam wa ngore li" qi: jung" na: ako". Ngo wa yao: bam: qhid' mae" zonghin" nghin" keim" nae" za: angad lo".

¹⁰Yao: bam wa ngore qu" ca' ako". Yao: bam yao" gaung re ngo tho' je: gai: ga: myid mung: nga" myo,khung: mae khota: lao" li" phoe" sheim" ako".

¹¹Mao"So: yang ngore qam: nang: mung: ngo pe" maqo" kad' masho: majhin boe" nhao: ra" mathao mae- Yao: bam wa lo" thao" sho' nhag' yo" ru we' ngo re gye kad' ako".

¹²Ce: byuthaui: wa ngo we' vang" vang" khe' zin" lo mung: yao: bam wa ngore tao" phao nhao: ako". Yao: bam wa ngore se' pin" pye' nae" ga: nyhang" seim" ci: ako".

¹³Yao: bam wa ngo phao: loe, nae" khyo re jui" phyo' qheim" pye' nae" ga: phin" na: ako". Amung:- yao: bam re tam" pye' nae" byu khag' mana ngad: ra".

¹⁴Yao: bam wa- nga" gyelham jo, qo mae" dungkhung: khug khyo yan" vao lo mung: nga" dao mae mageim: gyo" zag: nhai" lo: ako".

¹⁵Ngo wa gyai yao: gyaug: din: pye' va"- nga" myo,nho nga: lao: wa- la dalhang damad we' dakhyo: baui" byaug va". Aimung:- nga" jo,nho" re: jham thaui: we' dakhyo: byaug: byaug va".

¹⁶Ana" wa ngo shid: lo" na va"- nga" dayin dayo: no mae" dajhid' yo nae" khyo majo,-

¹⁷Myi" ayo,mae nga" shoqug: jham alhab' khai" na: ra"- ngore khai" nho: ra" no wa khonhae" re: mayo: byaug ngad: ra".

¹⁸Mao"So wa ngore- lang ku: mae yao: kya' mung: nga" mai bau: jham re nai: sham" pye' byid' ra".

¹⁹Yao: wa ngore tham: bab: bam" mae shapye' khyo" ke' ra". Ngo wa phalhug tho' pe" maje: gai-

²⁰O" Mao"So we"- ngo nao re khai: yao ngadqere:- nao wa khonhae" re matau: byid:- aimung: ngo akyu" mho' ra" au: re nao pe" xan: masun: byid: ngad: ra".

²¹Nao wa ngore manug makhyad' kad' ra"- ni" kheim: so' alhab' yang ngore yhin" ava".

²²Nao wa ngore la: yang hug' lhaui" pye' nhao: ra". Nao wa ngore- thin: ra" la qam" khug mae aphaug' ase hug' lhaui" qin" nhao: ra".

²³Nao wa ngore yaug khao: ngo" qhid' mae" nyhang" to" ra". shid: ru khyo jhui" lo" na: rure ngo ba: ra".

²⁴Nao wa pe"mung:- nhag' khyag' yu nae" ru mho' nae" za: aba: kad' lo" ra"- byo; qeim: jo; va" byu dayaug re khe' zin" na: i?

²⁵Ngo wa- qug: khai: qhug' mo, we' daga" kaug' ngug: mangad: i? myaung sho: mo; qhid' mae" nhag' kaug' byid' mangad: i?

²⁶Ngo wa ngaui bau: khyo we' bo" bao re myid: lao" ra". Ngadqere: ai: atha" qug: khai: we' mug: cad' ru joe" li" ra".

²⁷Ngo wa myid myo" ru we' dae no: ruyang nhag' lam: byo; lo" va". Ngo wa daba: mae" daba xo' yang: qug: khai: qhug' zo" na: ra".

²⁸Ngo wa- ba zho mazao" ra" cad' no, khug mae su" dae" qin" ra". Ngo wa- byuphaung gaung: mae to" ye, mung: bao" yu nae" mho' ra".

²⁹Ngo hug' yao: ra" thoe wa- zag ne dadau: myang thoe mangad: lao"- Qo,-gola:u myang thoe ru: kaug' thoe thug' ra".

³⁰Nga" nho: shoqid wa no; lo" va"- ngo wa nojam" jam" na va".

³¹Ganhae" dalhang- ngaui bau: nghaui" thoe ngo lhaung" the' gyo" ra" jo, qo mae ana" ngo wa kaug' thoe we' ngug thoe za: athe' gyo: lo"-