Read Maru YOBA 33 Bible Online

YOBA 33 - Maru bible

YOBA 33

¹Ana" Yoba we"- Ana" ngo ta" ca" ru alhab' re jhaug' za: tae" gyo" yu wa,-

²Ngo wa- nga" myid mae bo: rure ta" ke' nae" jin" jin" ngad va".

³Nga" nho: dao: kheim: jham alhab' wa khyao khyao za: ngad: ra". Amung: ngo wa dangman" rure ta" na: ra".

⁴Mao"So: byo wa ngore phan" to: mung: ngore kao so' byid' ra".

⁵Nao qo" phaug' tau" ngad: re ngore phaug' tau: la, nao ngag nae" khyo re seim" ci wa,-

⁶Nao we' ngo wa- Mao"So: qhid' kheim: mae dakhyo: za: angad:- nga" shid' zo: shid' yaug: geim" re myid zhai" yang akhyao kad' to" ru ngad:-

⁷Nao: yang ngore gyaug nae" khyo pe" majo, ngo wa nao re ma- aung: pye' nae".

⁸Ana" ngo wa nao ceru: ga: ta" thoe the' gyo"-

⁹Ngo pe" qobo maqo" ngo pe" makad' shad' ngo mae qobo mabo mung: qobo we' masin:-

¹⁰Ngadqere: Mao"So wa pyi qho mung: ngore khe' zin" ra". Aimung: ngore gyevo we' dakhyo: to" ra".

¹¹Yao: wa nga" nho: khyid jham mae jao co: vhe' byid' ra". Yao: wa- ngo lab: qin" ru ja: khao: ngo" re lhaug' qu" na: ra"- ga: ta" ra".

¹²Ngadqere: Yoba we"- ngoyao: ta" kyo: shili"- nao shad' ra". Mao"So wa byu yaug khao: ngo" tho' re: je: qi: je: boe" doe; ra".

¹³Mao"So wa byu dayaug nyhung thoe re khonhae" re: maphaug' tau" ra" mathao mae nao pe"mung: Mao"So re qobo zhaug' i?

¹⁴Mao"So wa paug' yang: paug' yang: dam: jhau: sho' ngadqere:- yao: ta" rure khag' magyo: byid: ngad: ako".

¹⁵Myi" ayo, mae byu jham yab: myid' jo; re Mao"So wa yabmo, jham we' qhu" lho jham khyo" jhau: ra".

¹⁶Yao: wa yao: ta" rure tae" gyo: sho' kad' ra". Amung: yao: bam wa- yao" yang ta" peim" rure gyaug: din: ako".

¹⁷Mao"So wa yao: bam re qobo kad' ru thang: pye' genae" qhid' mae" jhau: ra". Aimung:- ngad beim" li" rumae" khyad' yu nae" qhid' mae" ta" ra".

¹⁸Yao: wa- yao: bam re phyo' qheim" pye' ru qhug' nhao nae" mangad:- Yao: wa yao: bam re shid: rumae" re: khyad' yu: ra".

¹⁹Mao"So wa byu dayaug re no phyo: qhug' nhao yang gaung khyao mae no: ru ke' byid: mung: re: mho" kyang" yu: ra".

²⁰Byuno wa nhad' mamyho' ngad: ra". Amung:- gai: thao" ra" zo: shaug' lhao" re: nhag' qu" no taung" ngad: ra".

²¹Yao" gaung dau: shokhyi" wa- ngaung" khyoe" lo" ra". Yao" shoqug: alhab' re qo" myao: ra".

²²Yao: wa- shid mo, na: ra" movo: mug: khyo lo" byaug nae" za: ngad: ava".

²³Mug: lagyo: dayaug yaug qe yao: re li" bao" yu maba- Byu jham re yao: bam zaui: ca" mau" ta" shid' ra" Mao"So: mug: lagyo: ataung atug qemae" dayaug yaug qe li" bao" yu maba-

²⁴Mug: lagyo: wa nhag' qu" khyag' mung: yao: re lhag' ke' ge,- yao: wa movo: mug: khyo gyo" lo" ca" nae" mangad:- Yao: re pheim: nhao: ke' nae" qhid' mae" khyad' ra" aphug' ngaui cemae ngad: ra"- ga: ta" maba-

²⁵Yao" gaung dau: wa qi" lag: li" mung: qam: mag dam: to" li" nae".

²⁶Yao: akyu" mho' lhao" Mao"So yao: re phaug' tau: byid' li" nae". Yao: wa Mao"So re ngaui bau: ngaui lho" caung:pa" byid' li" nae". Mao"So wa- yao" qhid' mae" dangman" ra" khyo" dam: nyhang" byid' li" nae".

²⁷Yao: wa byu phaung gaung: mae- ngo qobo shad' lai: lo va"- ngo wa jo: rure makad' lo: ngadqere:- Mao"So wa ngore tang" to" ra".

²⁸Yao: wa ngore movo: mug: khyo malo" sho' kham" to" ra"- aimung: ngo adaui: na shi"- ga: ta" li" nae".

²⁹Mao"So wa ceru alhab' re- paug' yang: paug' yang: dam: kad' ra".

³⁰Yao: wa byu dayaug: nho: kao so' re khyad' yu mung:- yao: re daui: na: ra" ngaui bau: khyo byid' ra".

³¹Yoba we"- ana" ngo ta" na: rure tae" gyo: wa, nao sae za: tae" to: mung: ngore jhau nhao la,-

³²Ngadqere: nao daja: ja: ta" nae" qo" re ngore gyo: nhao la,- nao jo: rure ngo ngaui bau: taung" khae: yu nae".

³³Airu: mangad: re- sae za: tae" to: wa,- ngore tae" gyo: byid: la,- Airu: ngo wa nao re- khoru: pha,jhi" bo nae" khyo mho" shid' byid: nae".