Read Maru YOBA 34 Bible Online

YOBA 34 - Maru bible

YOBA 34

¹Naonhaung" wa gyai pha,jhi" bo: ako"- gyai qag: ako". Ana" ngo pe" ta" na: rure tae" gyo: ge,.

³Zo: shaug' gai wa zo" qu" re myho' mamyho' ba: gyo: ngadqere:- pha,jhi" dao: re the' gyo" re airu: mangad:-

⁴Boe" ra" khyo re myid: phyid' ru wa ngonhaung" nho: mau" ngad: ra".

⁵Yoba wa yao: qobo maqo"- ga: ta" ra". Mao"So: yang yao: re tarha" din: nyang: khyo" makad' byid:- ga: ta" ra".

⁶Yao: wa- ngo wa mhug' yang: ngo shad' va" ein: khoru: ba: qo" ta" nae" i? Ngo wa shid dae de; ngadqere: ngo mae qobo maqo" ga: ta" na: ra".

⁷Ce: Yoba ru" ra" byu dayaug re naonhaung" lhaung" myao: qu" ko" i? Yao: wa Mao"So re gyaug phug' ra" khyo khonhae" re: maqhu" byid: ngad: ra".

⁸Yao: wa makhyang: mashab mo, we' zam" khug nug mung: qobo jab qe we' su" du" qin" ra".

⁹Yao: wa Mao"So o ngaui: ra" khyo" cao" yang: khonhae" pe" akyu" mabo- ga: ta" ra".

¹⁰Ba: gyo: mo, naonhaung" ngore tae" gyo" qu" shige,- Qam: so' bo: thao" ra" Mao"So wa shad' rure kad' li" nae" i?

¹¹Yao: wa- byu qere yao: bam kad' ru qhid' mae" aphug' jhaung qhu" byid' ra". Aimung: yao: bam kham zo: nae" man: qi" ra" khyo" kad' byid' ra".

¹²Qam: so' bo: thao" ra" Mao"So wa makhyang: mashab: ru makad'- yao: wa khag' rere: tarha" madin: nyang: khyo" khonhae" re: makad'-

¹³Mao"So wa yao" kheim: so' re gaje dayaug yaug mae" qo" yu: ra" i? Dayaug yaug: yang yao: re ai: mug:myid re qu" gun nhao: to" ra" i?

¹⁴Mao"So: yang kao so' re dam: yu: pye' byid' re-

¹⁵Kaoso' daui: na: ra" yaug khao: ngo" shid: lo" byaug mung: phalhug khyo dam: tug' lo" li" genae".

¹⁶Nao pha,jhi" bo: ngad: re ana" ngore tae" gyo: wa,-

¹⁷Nao wa din:man" ra" Mao"So re qobo vhin dao: phyid' na: i? Yao: wa tarha" din: nyang: rure nghang" ra" ein: nao myid: jho: i?

¹⁸Kho:kham qe we' mung" eib zug: qe byugao: boe" mung: makhyang: mashab gelao" Mao"So wa yao: bam re qobo vhin dao: kho' ra".

¹⁹Yao: wa mung" eib zug: qe: bo: made, myaung mo, re to: mung: qo" mo, shad' myo,nho byid' ru makad'- pe"mung:ga"re- yao: wa yaug khao: ngo" re phan" phaug' to" ra".

²⁰Byu dayaug wa- myi" mae nyag din taung" shid: lo" ba: ra" Mao"So: yang byu qe jham re be; lhang" ke' lao"- yao: bam shid: lo" ako". Yao: wa qam: qi: mo, re pe" qam: dajhid' re: make' lo: se' pye' ra".

²¹Yao: wa byu qenho: khyid bye khao: ngo" re lhaug' qu" na: ra".

²²Qobo byu dayaug re Mao"So: qhid' kheim: mae" qo" nghoe' naeqhi" no, sang: kyid no; ra" mug: cad' majo, ngad: ra".

²³Mao"So wa xao su byu qe yao: jhao" ye: mung: dao: kho' ru khae: yu nae" qhid' mae" yo, khyin: mhai" to: maca"-

²⁴Yao: wa- au: jhaung qere yu: pye' mung: gayaug re tha" ke' nae" qhid' mae" myid' ca: qu" ru makad' ca".

²⁵Yao: bam pe" kad' rure yao: ba: ra" mathao mae yao: wa- yao: bam re tau: khyo" pye' mung: myi" ayo, mae yao: bam re khyoe' pye' ra".

²⁶Yao: wa qobo jab qere alhab' mo; yang the' myao nae" jo, qo mae qobo dae byid' ra".

²⁷Pe"mung:ga"re yao: bam wa yao" thao cao" ru thang: pye' geyang: yao" amyin" alhab' re pe" xan: masun: lo: qu" lhaui" pye' yang: ngad: ako".

²⁸Yao: bam wa myaung mo, re Mao"So jhao" hug' yao genae" qhid' mae" maqad maqui" jhan" ako". Aimung: yao: wa yao: bam hug' yao: rure gyo: byid' ra".

²⁹Mao"So qe- pe" yao: makad' nae" myid: phyid' ngad: re- yao: re khag' yang pe" qobo maqo" zaug' genae". Yao" nho: myo,khung: re nyham" pye' ngad: re- byu qe wa pe" khoru: maqo" kad' masho: majhin ngad genae".

³⁰Byumyu" mung"dan: jham wa Mao"So maba: ra" zag zo: mo; yang yao: bam re eib zo" rure tam" pye' nae" qhid' mae" pe" maqo" kad' ngad: ako".

³¹Yoba we"- nao wa ni" nho: qobo jham re- Mao"So jhao" lhang: yu mung: qobo madam: shad' lo nae" ein: dao:so: byid: va" i?

³²Nao wa ni" nho: shad' ra" qobo jham re qhu" byid: nae" qhid' mae" Mao"So re mho' va" i? Amung: makhyang: mashab: rure kad' na: rumae" thang: pye' nae" myid vang" va" i?

³³Mao"So kad' rure ana" joe" sho' nao ngag: thaug' ra" mathao mae- nao o: ru yao: qo" kad' byid: nae" ein: nao qo" myid: lao" nae" i? Myid: phyid' nae" wa ni" mau" ngad: ra"- nga" mau" mangad: nao pe" ru: myid: ru ana" ngonhaung" re ta" kyo: la,-

³⁴Ba: myid: qu" ra" byu khag' ngadqere:- dang dang myid vang" li" genae". ngo ta" ru the' gyo" ra" pha,jhi" bo yaug wa,-

³⁵Yoba wa yao: pe" maba mung: ta" ra" amung: yao: ta" ru pe" re: lajheim: mabo ga: ta" li" nae".

³⁶Yoba ta" ru ja: khao: ngo" re myid: qu" ge,- yao: wa makhyang: yaug we' dakhyo: jhau: na: rure nao myao: li" nae".

³⁷Yao: wa yao: yao" qobo dao mae tau: lhan" ru dam: laung" ke' ra". Yao: wa ngonhaung" alhab' mo; qhid' kheim: mae Mao"So re maphug' makhyad' jung" ra" ga:- ta" li" genae".