Read Maru YOBA 36 Bible Online

YOBA 36 - Maru bible

YOBA 36

¹Nhag' lam: qhang qhang to: mung: dazab zo: Mao"So: gaung tha" ngo ta" na: rure xo' yang tae" gyo: shi: wa,-

³Nga" laba lajhao wa qi" qhang: ra"- nga" nho: phan" ASANG Mao"So wa dangman" rure qhu" byid: nae" qhid' mae" ngo ba: rure ngo yhung: nae".

⁴Nao re ngo ta" ru pe" daja: re: mashad'- nao wa ni" nho: qhid' kheim: mae dang dang pha,jhi" bo yaug dayaug re the' myao: ra".

⁵Mao"So wa khoqhi" qam: bo: i? Yao: wa khag' rere: manug mamung- yao: maba: gyo" ru pe" daja: re: majo,-

⁶Yao: wa qobo byu qere xo' daui: na nae" akhang" mabyid: ngad: ra". Aimung: yao: wa- myaung mo, re tarha" dangman" ra" khyo" khonhae" re: zam" khug: ra".

⁷Yao: wa din:man: mo,re gug: gam byid' ra". Yao: wa yao: bam re kho:kham qe we' dakhyo: eib: zo: nae" akhang" byid' to" ra". Aimung: apyad ato mae nga: ye, nhao: ra".

⁸Ngadqere: byu qe wa yao: bam kad' lai: lo: ra" mathao mae dayin dayo: qhug' mung:- jao cao" yang taui" to" ru qhug' au:-

⁹Mao"So wa yao: bam re- yao: bam: qobo jham we' yao: bam: ngad beim" rure qhu" byid' ra".

¹⁰Yao: wa- yao: bam re makhyang: mashab: rumae" phaug' lhang: lo genae" qhid' mae" yao" ta" peim" rure tae" gyo: nhao: ra".

¹¹Yao: bam qe Mao"So re phug' cao" mung: yao: re caung da" byid: ko" ngad: re- yao: bam wa yaug yo cae: tae" ru we' na: dai: ra" khyo" qo" daui: na: li" genae".

¹²Ngadqere:- airu: mangad: gere wa- maba mabeim" rumae yao: bam shid mung: movo: mug: khyo qid zo: gyaung: re nag: de; ye" lo" li" genae".

¹³Mao"So re maba mo, wa xo' yang: nhag' yo" na: ako". Aimung: qobo dae byid' ru qhug' re lao" re:- yao: bam wa bao" yu: ru qhug' nae" qhid' mae" akyu" mamho' ngad: ako".

¹⁴Yao: bam wa ngai shi" au: mae" shid: lo" va"- yao: bam: apyad wa qho' phau" ru we' thao" lo" byaug: ako".

¹⁵Ngadqere: Mao"So wa- byu qere qug khai: dayin dayo: khyo" yang mho" shid' mung:- yao: bam: myo,jid' jham re phung" nae" qhid' mae" nhag' lam: thao" rure ci yhung" ra".

¹⁶Mao"So wa nao re- qug: khai: mae" jhui" thug' yu mung: nao re gug:gam taung" nha: to" ra". Ni" nho: zojaung: mae zo: byang" sho' bam: jo; ra".

¹⁷Ngadqere: ana" kam" wa- nao leim: zo: ang: ru we' dakhyo: qobo dae byid' ru qhug' na: ra".

¹⁸Khug vag: jhaung qhu" yang nao re maqo" mhug' pyag' nae" qhid' mae" lha" na wa,- mangad: lao"- jo,nho" yang nao re khyonghung: majhui" nghung" losho' lha" na wa,-

¹⁹Nao re bao" yu nae" qhid' mae" hug' yao qere: pe" akyu" bo nae" mangad: ni" qam: alhab' wa- ana" nao re maqo" bao" yu ngad: ra".

²⁰Myi" ayo, joe" lo: qa: we" ein: damyid: ngaui- byumyu" qe byo; qeim nae" ayo, re damyid: lao"-

²¹Makhyang: mashab: khyo maphaug' lhag' lo" sho' lha" na wa,- ni" dayin dayo: qug: khai: wa nao re ai: khyo malo" nae" qhid' mae" boe" ru ngad: ra".

²²Mao"So: kheim: so' khoqhi" qi" rure myid: beim: wa,- yao: wa alhab' mo, tho' qi" thao" ra" mho" pho" ngad: ra".

²³Mao"So re pe" kad' wa, ein: khag' maqo" ta"- mangad: lao"- yao: re makhyang: mashab: ru kad' ra" ga: khag' yang qobo maqo" zhaug' genae".

²⁴Yao: kad' ra" mau" zo" mathao mae yao: re khonhae" re: caung:khin" ru qhug' ra"- nao re: yao: re caung:khin" ca" ra".

²⁵Yao: kad' lai: lo va" rure yaug khao: ngo" the' myao: avako". Ngadqere: ngonhaung" wa va: mae" za: agai: lhaug' qu" ra".

²⁶Ngonhaung" wa yao" qi" qhang: ra" khyo re jab byang" sho' maqo" gai: ba ngad: ra". Yao" nho: zin na jham khonho" ngad: ga" rure: maqo" ba ngad: ra".

²⁷Myidgaung mae" qid phoe' thug' yu mung: mug: ce' jham tha" boe" lo" nhao ru wa Mao"So ngad: ra".

²⁸Yao: wa xao su byu alhab' mo; qhid' mae"- mug: qid re jham thaui: khyo" mug: ce' boe" yang: qu: gyo" nhao: ra".

²⁹Mao"So na: ra" mug:gaung khyo" jham thaui: jham khoru: su" lo" ru we' mug: gyug: khoru: myang: lai: lo" rure khag' maba ngad: ako".

³⁰Yao: wa lhe' cad' re mug:gaung alhab' gam: sho' khyo nhao: ke' ra". Ngadqere: panglai: tham: kao" wa acad' no; jo; ra".

³¹Ceru wa- yao" yang byu qere zo:ve khoru: zho" ru we'- zo:ve magan: mago" khoru: byid' ra" khyo ngad: ra".

³²Yao: wa lhe' cad' re yao" lo; yang taung" yu mung:- aire thao tae mae lo" zao" nae" qhid' mae" amyin" byid' ra".

³³Mug: gyug: wa la qam" joe" lo: na: rure ta" hau" ra"- aimung: ai: la qam" lo: na: rure nung: jham ba: ako".