Read Maru YOBA 39 Bible Online

YOBA 39 - Maru bible

YOBA 39

¹Yo: jham xao" ayo, re nao ba: i? Shocid jham yao: zo: xao" ru nao lhaung" myao: qu" i?

²Yao: bam khomyhao" myao" sho' zo: vin: ru nao ba: i? Yao: bam anau" xao" ra" ayo, re nao ba: i?

³Yao: bam goe; gam" mung: yao: zo: qe re ce: mug: myid khyo khonhae" xao" ke' rure nao ba: i?

⁴Yao: bam: yao: zo: qe wa seyo mae na: qi" li" ako". Yao: bam na: du" lo" mung: madam: tug' lo ngad: ako".

⁵Loze lae" jham re yao: bam: loe; beim: ru khag' byid' ra" i? Yao: bam re khag' yang pheim: ke' mung: na: lae" qin" nhao: ra" i?

⁶Ngo wa yao: bam: na yham qhid' mae" yao: bam re din"pyad' yo byid' to: va". Aimung: yao: bam re xo: jao: gyu" mae na nhao va".

⁷Yao: bam wa thoe yhau: ra" vomo" jham mae" va: va: khyo na: ako". Aimung: khag' yang re: yao: bam re mai" sho' kad' mung: mau" maqo" zaui: nhao ngad: ra".

⁸Bam jham wa yao: bam: mhin: qho zo" ra" mhin: gyo, jham ngad: ako". Ai: jo, qo mae yao: bam wa zo: nae" mhin: nyhug re qho zo" ako".

⁹Nung: lae" wa ni" qhid' mae" mau" zaui: byid' li" nae" i? Yao: wa ni" nung: yham mae damyi nug: yab nae" i?

¹⁰Nung: lae" dadau: re nao taui" yang taui: mung: yo qo" phaug' nhao nae" i? mangad: lao" yao: re ni" yothaung: jham mae yo phyi" lakya the: qo" she nhao nae" i?

¹¹Nao wa yao" qam: qi: re ngha mung: ni" qhid' mae" mau" mo" kad' byid: nae" gai: myid: lao" i?

¹²Nao wa yao: re gaug yad: tai nhao mung: ni" gaug be, jao mae" gaug jham re qo" sham" zhang nhao nae" i?

¹³Ngho' gola:u nho: daung wa khonho" phyad sho' lab: ra" i? Ngadqere:- ngho' gola:u khodau: re: qid ngho' we' dakhyo: maqo" dao: ngad: ra".

¹⁴Ngho' gola:u wa yao" au" re myidgaung mae khyo" to: co' mung: myid xau mae" la laung: yang yao" au" jham re lam nhao: ra".

¹⁵Yao: wa aijham re dayaug yaug: yang zab: khyoe' pye' nae" ru we' seyo gug'nyhug' dadau: dau" yang kho' pye' byid: nae" rure mabeim: ngad: ra".

¹⁶Yao: wa ai: au" jham re yao" au" mangad: nhohab kad' ra". Aimung: yao: qam: ke' pye' ru aje amyid mung: byaug nae" sang: makho: ngad: ra".

¹⁷Yao: re nhag' magyang" nhao mung: yao: re pha,jhi" mabyid: yaug wa ngo angad:

¹⁸Ngadqere:- yao: tao" phao: lo" re- yao: wa myao: khodau: we' myao: zaung yaug khag' re ngadqere: qo" qi: jung" pye' ra".

¹⁹Yoba we"- myao: jham re ai: qhi" qam: bo nhao mung:- myao: lang mug' byid' to: ru wa nao ngad: i?

²⁰Nao wa- ai myao: jham re yao: bam re khyag' phaung" jham we' dakhyo: thug' byae nhao mung: yao: bam: nhomyang thoe: yang: byu qere kyaug' tin" nhao: sho' qo" kad' i?

²¹Yao: bam wa lao:khaung: mae" myidgaung re lo, vo" yang gyin: yu mung:- gyekhe' jao: khyo yao: bam: qam: alhab' we' tao" ye" lo" ako".

²²Yao: bam wa gyaug re: maba: gyaug ngad: ako". pe" ru" she: yang re: yao: bam re maqo" khe' tug' ke' ngad: ra".

²³Myao: jui: mo, ci: ra" gyezai jham jho" ko' myhang" yang: ba zho mae qhi qhi mung: ako".

²⁴Ai: myao: jham wa la lo" mad: ke' lao" sae za: maqo" ye; jo, mung: nhag' lam: zhau: ru we' lab: nin" yang: qhid' khyo tao" thug' ye" lo" ako".

²⁵Labo" mad: myhang" ke' khao: ngo" yao: bam nhomyang myang: ako". Yao: bam wa majhao" li" shimae" mang: zin: nae" rure sheim qo" nae: ako". Aimung: yao: bam wa zug: qe amyin" hug' byid' na: rure the' gyo" ako".

²⁶Zeim kyao: wa mug: thao khyo yao" daung re phyid: lhu: khyo" ke' au:- nao mae" dao" mho" yu: ra" i?

²⁷Zeim baung: wa myhao: ra" bam jham mae yao" asad' sad' nae" qhid' mae" nao mae" amyin" re lao" yu: ra" i?

²⁸Yao: wa- myhao: thao" ra" laug bam mae yao" yham re kad' to: mung: ceim: ra" bam au: jham re yao" gye khug vang khyo" ci: ra".

²⁹Yao: wa ai: jo, qo mae"- jhao" mae we' va: mae se' zo: nae" daja: ja: re lhaug' qu" na: ra".

³⁰Zeim baung: jham wa maogaung jham mae zang" ham mung: zeim nau" jham wa sa: re shaug' ako".