Read Maru YOBA 41 Bible Online

YOBA 41 - Maru bible

YOBA 41

¹Nao wa maojaung: Levithan re ngomyhad' yang qo" myhad' yu nae" i? mangad: lao"- yao" sho re taui" yang qo" taui" yu nae" i?

²Nao wa yao" nho mae nhoyu qo" thung: nae" i? mangad: lao"- yao" ae cae: qug: mae anghoe: qo" te' byid: nae" i?

³Yao: wa- yao: re nhao: ke' nae" qhid' mae" nao re mho' nae" i? Yao: wa yao: re nao: yang nhag' khyag' yu nae" qhid' mae" nao re mho' yao nae" i?

⁴Yao: wa nao we' myid vang" khyo to: mung: nao re khonhae" re: caung da" byid: nae" ga: dao:so: to: byid' li" nae" i?

⁵Nao wa ni" daui daui myiqe: nau" qere go" keim" nhao nae" qhid' mae" yham mae khau: to" ra" ngho' nau" re we' dakhyo: yao: re taui" to: nae" i?

⁶Ngo: kung" zo: mo, wa- yao: re gau jho mho genae" i? Aung: zo: aung: shaug' phaga: byu qe wa yao: re phyo' aung" li" genae" i?

⁷Nao wa yao" asad' re ngo: thug' lhae tad' jham: yang qo" ke' pyang" to: nae" i? Mangad lao"- yao" au: lam: re ngo: thug' lakhyug: yang qo" geim: kyao" byid: nae" i?

⁸Yao: re nao dalhang qo" zao" tin: thao nao madam: nug:- tin: lo nae" nao wa ai jho" khe' se' rure khonhae" re: mato" myhid' lo nae".

⁹Maojaung: Levithan re myao yaug khag' ngadqere:- lhe: myid byaug: lo" mung: myidgaung khyo gyang: lang" lo" ako".

¹⁰Yao: re nhug' to" ke' lao" yao: gyai tin" li" ra". Yao" nho: qhid' kheim: mae khag' mavae" ye; jo, ngad: ako".

¹¹Yao: re khe' zin: mung: khag' qo" gug:gam: na: genae" i? Mug: myid byu khag' dayaug re: airu: maqo" kad' ngad: ako".

¹²Maojaung: Levithan nho: khyid jham: akhyo nao re ngo ta" kyo: mung: yao: khoqhi" qi" qhang: ru we' qam: bo: ru sho' kyo: li"-

¹³Yao" nho: gaung mae" akye' re khag' maqo" qhid' pye' byid:- yao: ve, ci: ra" gyemai gyebau: rere: khag' maqo" thug' kyao" byid: ngad: ra".

¹⁴Qu" gyaug taung" ra" zaui jham byang" sho' de; jo; ra" yao" aekhao: re khag' qo" ho" nhao genae" i?

¹⁵Yao" dao kao" mae wa laug zang ru: qao sho' xo' taui" to" ra" go jham ajin jin de; ra".

¹⁶Ai: go dakhye' we' dakhye' agyo: khyo" so' lhao" magai: vao losho' tang tang jid' jid' za: xo' taui" to" ra".

¹⁷Aijham alhab' wa pe" yang re: maqo" phyo' sin" pye' losho' tang za: taui" zham: to" ako".

¹⁸Yao: nho ag' ci" ci" ke' re bo" bao kyi: thug' li" ra" aimung: yao" myi,jid' jham wa ba thug' li" ru we' dakhyo: thaung: bao: ke' ra".

¹⁹Yao" nho: nhad' mae" myishae thug' ra". Aimung: myijhang: jham dao" thug' lo: ra".

²⁰Ug' khug mae nga" na: ra" myo, jham mae" myikhug' we' dakhyo: yao" nho khyo" myikhug' moe: thug' li" ra".

²¹Yao" nho: so' wa myi: re ngha" te' qhid: ke' ra". yao" nhad' khug mae" myishae thug' ra".

²²Yao" nho: lang zang: wa kheim: so' gyai qi: mung: yao: we' qhug' mo, alhab' mo, gyaug: din: ako".

²³Yao" nho: shoqid mae qam: nang" ru dakhyi" re: majo, aiwa jo, to' we' dakhyo: qao mung: pe" re: mazaug ngad: ra".

²⁴Laug zang ru: qao: ra" yao" nhag' lam: wa pe" rere: magyaug ngad: ra". Aiwa laug lhang we' dakhyo: pe" mazaug koe, koe, ga: gyai qao: jo; ra".

²⁵Yao: to" ye; li" re qam: bo: thao" mo, lhao" gyaug: din: ako". Yao: bam wa saung" gyaug mung: pe" maqo" kad' masho: majhin ngad: ako".

²⁶Yao: re dae qo" te' nae" shae pyang: majo, yao: re qo" no nhao: ra" lhae tad' ngad ngad- myo: ngad ngad- lhae daung ngad ngad majo, ngad: ra".

²⁷Jo,to' wa yao" qhid' mae" khovho we' dakhyo: au" ra"- aimung: gyid: bo" wa sag' qeim: we' dakhyo: nhae" ra".

²⁸Yao: re qo" tao" phao nhao: ra" myo: majo,- yao" adao mae pye' gyan" ra" laug zang jham wa khovho khe' jham we' dau: ako".

²⁹Thaung kang wa yao" qhid' mae" khovho re"ru: angad: ra". Aimung: byu jham lhae tad' geim: ke' re yao: qi: ra".

³⁰Yao" nho: vae: dug: mae" akye' jham wa asu: tho' ra" ug' je, we' dau: ako". Aijham wa tham: bab: myid mae gaug nao: the" yang ru: kyo' kho' pye' ra".

³¹Yao: wa panglai: re qid laung zhau: ru we' dakhyo: zhau: to' ke' ra". Aimung: xau ug' we' dakhyo: nyab thug' ke' ra".

³²Yao: wa yao" thao mae qhi qhi mung: ra" khu dung nhao co' mung: panglai: re nyab phyu boe" nhao: ra".

³³Yao: we' qo" tau" nae" ru myidgaung dao mae pe" mana- yao: wa maba: gyaug: ra" gug'nyhug' daja: ngad: ra".

³⁴Yao: wa- ngad beim" thao" ra" gug'nyhug' jham re lhao" re: qu" ngai: pye' ra". Yao: wa gug'nyhug' lhe: alhab' nho: kho:kham ngad: ra".