Read Maru YOBA 42 Bible Online

YOBA 42 - Maru bible

YOBA 42

¹Ailao" ASANG re Yoba phaug' tau" ra".

²ASANG we"- nao wa kheim: so' qi" thao" mung: nao kad' nug: ru alhab' re qo" kad' yaug ngad: rure ngo ba: ra".

³Ngo pe" yao: maba: ru- ni" nho: pha,jhi" re khoru: mung: vae" myid' i? ga: nao myid' ra". Ngo wa ngo maba: gyo" ra" khyo re jhau mung:- ngo matho' gai: ba: ra" mug' pho: jham: khyo re ta" va".

⁴Nao wa ngore- nao jhau: na: au: tae" gyo: mung: ni" nho: dao: myid: jham re phaug' tau: nae" qhid' mae" ta" ava".

⁵Lai: lo" va" ayo, gu: mae ngo wa- su gaje: yang ni" nho: khyo re ta" kyo: ko" ru za: alhaung" gyo" qu"- Ngadqere:- ana" kam" wa- nao re nga" myo; yang yao: the' myao va".

⁶Aimung: ngo wa- ngo ta" lai: lo: ru alhab' mathao mae myid: qho' mung:- phalhug we' myimhab bam mae nhag' lam: tha" pye' va".

⁷ASANG wa Yoba we' bin: jho" jhau lao" Elipha re- ngo wa nao we' ni" ba nam shid' yaug re nhag' yo" ra"- pe"mung:ga"re naonhaung" wa nga" khyo re nga" daui daui yaug Yoba we' dakhyo: dangman" ra" khyo" mata" gengad: ako".

⁸Ana" Yoba jhao" nung: jaung lo: nhad' dau: we' yao lo: nhad' dau: she: ye: mung:- aijham re naonhaung" yao" qhid' mae" xeim: phad' ngaui" ge,- Yoba wa naonhaung" qhid' mae" akyu" mho' byid' li" nae". Aimung: ngo wa yao" akyu" mho' dao: re phaug' tau: byid: mung:- naonhaung" leim zo: nae" man: qi" ra" khyo" nga: mayeim nhao nae". Naonhaung" wa nga" khyo re yao: we' dakhyo: dangman" ra" khyo" mata" ngad: ako".

⁹Elipha- Bildad we' Zopha wa ASANG: yang yao: bam re kad' nhao: ru we' dakhyo: kad' ako". Aimung: ASANG wa Yoba nho: akyu" mho' dao: re phaug' tau: byid' ra".

¹⁰Aimung: Yoba wa yao" ba nam sam yaug: qhid' mae" akyu" bin: mho' thao- ASANG wa- yao: re dalhang dam: na: dai nhao mung:- qhid' phyao: yao: lhaung" qo" lai: lo: ra" tho' shid' nho" byid' ra".

¹¹Yoba nho: mao:nhaung: qe alhab' yao: nhae mo" qe alhab' we' qhid' phyao: mae" yao" ba nam byin cao: alhab' mo, wa yao: re li" qhug' mung: yao: we' daga" yao" yham mae zo: shaug' poe kad' na: ako". Yao: bam wa ASANG: yang yao: re leim zo: nhao: ra" qug: khai: alhab' mathao mae sho: no myid qhu" byid: mung: nhag' tang" byid' ako". Yaug khao: ngo" wa yao: re ngaui we' qhang lo,pin: dalam: lam: jhaung qhu" li" byid' ako".

¹²ASANG wa Yoba nho: apyad thao mae" dau re sao qhid' dau mae shaman" byid' ra" tho' re: je yang: shaman" byid' ra". Yoba wa yao datug: byid taung- gola:u khyaug' taung- nung: shid' taung we' loze dataung qo" sang: ra".

¹³Yao: wa yauggai zo: nhad' yaug we' myiqe: zo: sam yaug: nho: yao: pho" ngad: ra".

¹⁴Yao: wa bai: mo" yaug re Yemima- bai: le; yaug re Kezia- ngai: thao" myiqe: zo: re Keren Hapug ga: mhang" ra".

¹⁵Mug: myid geim" mae Yoba nho: myiqe: zo: qe qhi" yaung" ra" myiqe: qe dayaug re: mana ngad: ako". Yao: nhae ho' yao: pho" wa yao: bam re yao: bam: yao: maung bam we' dakhyo: za: jo,nho" ma re kho' gae byid' ra".

¹⁶Ceru: mung thao Yoba wa dayo: byid xe zin daui: na mung:- yao: myid: qe- yao" myid: kai: qere myao co' ra".

¹⁷Ai: thao yao: wa- gyai mao: yang: shid: lo" ra".