Read Maru YOBA 5 Bible Online

YOBA 5 - Maru bible

YOBA 5

¹Yoba we"- Hug' yao: ke' wa,- Dayaug yaug qe phaug' tau: genae" laug qu" wa,- Nao lhang: qu" nae" mug: lagyo: dayaug yaug na: ra" i?

²Nhag' yo: mung: naoyao" gaung naoyao: shid sho' myid myo" ru wa lajheim: mabo: ra" ako" asho: mau" ngad: li" nae".

³Gug: gam: na nhohab qu" mung: ra" nhag' magyang" byu qe ngo myao: qu". Ngadqere:- yao: bam: yham jham mae ngoyang nhang: kheim: khai: khyo" byid'-

⁴Yao: bam: yauggai zo: qe wa khonhae" re: gug:gam maqo" yu ngad: ako". Yao: bam re tarha" yung" mae ta" vha byid: nae" dayaug re: mato" li" ngad: ako".

⁵Vae: moe; mo, wa nhag' magyang: yaug: gaug zo re zo" li" genae". Zau: kyi yo mae yaug: ra" gaug zo re lhao" zo" pye' li" genae". Qid shab' mo, wa yao" jo,nho" re o: qu" byid: li" genae".

⁶Myid xau mae makhyang: mashab: ru magai yaug ngad: ra". Myidgaung khug mae" re: qug: khai: mayaug: thug' li" ngad: ra".

⁷Ngad yao: mangad nae". Myi: mae" myijhang: zin: dao" lo" ru we' xao su byu wa yao: yao" dao mae qug: khai: kad' yu: ra".

⁸Ngo qe nao ru: ngad: re- nga" mau" zo" re Mao"So jhao" ciye: byid: nae".

⁹Ngonhaung" wa yao: kad' ra" qi" qhang: mau" zo" jham re maqo" ba: gyo:- Aimung: yao" mug' pho: ve,lho jham wa thao" ga" ru majo,

¹⁰Yao: wa myidgaung khyo mug: qu re nhao: ke' mung: qhovo: yo jham re qhid sheim: byid' ra".

¹¹Ngad va"- nyham: khyo" mo, re tau: to' mung: kaug' ngug mo, alhab' re ngaui bau: ngaui lho" ru byid: yaug wa Mao"So yao: ngad: ra".

¹²Yao: wa apyag' avhan" byu qe: myid: yaung: rure yao: bam kad' ra" mau" zo" maaung doe, nae" qhid' mae" pha,jhi" bo mo, re yao: bam yao: kyae: to" ra" mau" mae myhi" pye' ra".

¹⁴Na" gaung ba khaung tau yo, mae lhao" re: yao: bam soe' yam: qin" ako".

¹⁵Ngadqere:- Mao"So wa myaung mo, re shid: rumae" khyad' yu: ra". Yao: wa jo,nho" maqo" mo, re su: yang deim" zag zo" rumae" khyad' yu: ra".

¹⁶Yao: wa myaung mo, re myid: lao" jo, qo byid: mung: makhyang: mashab mo, re sae za: tae" lo" nhao: ra".

¹⁷Mao"So: yang mho" kyang" ru qhug' yaug wa ngaui lho" ra". Yao" yang nao re qeim: ra" au: nhag' dayo:-

¹⁸Mao"So wa- yao" yang te' ra" dae khu re phacug' yang dae thab' byid' ra" yao" lo; yang nao re dae no nhao mung: yao" lo; yang dae gai byid' ra".

¹⁹Dalhang: bin dalhang yao: wa nao re dae de' nae" rumae" khyad' yu: li" nae".

²⁰Bao" khug' khug' lo: ra" au: yao: wa nao re daui: na nhao: li" nae" aimung: gye poe mae" yao: wa nao re gug:gam byid' li" nae".

²¹Mao"So wa nao re mhug' vhan" zo: mo; lo, mae" khyad' yu: li" nae"- byo; qeim: ru joe" lo: au: re yao: wa nao re khyad' yu: li" nae".

²²Nao wa aqan alan mau" we' moe, shab' rure qi: jung" pye' li" nae". Amung: gug'nyhug' lhe: jham re magyaug ca" nae".

²³Nao phaug' ra" yo mae laug zang majo, nae" gug'nyhug' lhe: jham wa nao re khonhae" re: gye makad' genae".

²⁴Ailao" nao wa ni" zaung khug mae ngaui pyo: yaug yo: ru we' qo" na: li" nae". Ni" yao jham re nao qu" ke' re yao jham gug:gam: na: ru the' myao: li" nae".

²⁵Nao wa- mhin: gyo, jao: mae" vohau: vho' jham nho" myo" ra" myid:zo: qe qo" li" nae".

²⁶Gaug yad yo, joe" sho' mhang" ra" jung: gaug we' dakhyo: nao wa au: phyu zaui nae sho' daui: na: li" nae".

²⁷Yoba we"- ngonhaung" wa gyai myao" sho' mho" yu mung: cere ba: ru ngad:. Airu wa dangman" ru ngad: ra" rumung: ana" aire khae: yu wa,-