Read Maru YOBA 6 Bible Online

YOBA 6 - Maru bible

YOBA 6

¹Nga" qug: khai: jham we' kaug' qhui: ru jham re jao mae qe lag: ngad: re-

³Aijham wa- panglai: mae" ma coe jham tho' je: la: genae". Aimung: nga" dao: thin wa nao re magai: mug' nhao nae".

⁴Qam: so' bo: thao" ra" Mao"So wa yao" myo: jham: yang ngore bag: zao" ava". Aimung: aijham: myono; wa nga" gaung geim" mae byo: lo" va". Mao"So wa yao" gyaug din ja: re nga" qhid' mae" daja: bin daja: jaung: to" ava".

⁵Loze wa vohau: zo" na: au: nhag' dag: ra". Nung: jaung zang re: khovho zo" na: au: sae za: tae" to" ra".

⁶Ngadqere: min mabo xo: mangae: ra" zo:ve re khag' qo" zo: nae" i? Qo, au" au" shae mae pe" min bo: ra" i?

⁷Airu" zo:ve re ngo nhad' myho' thoe magyo:- Aimung: ngo zo" ru ja: khao: ngo" wa ngore nhag' no nhao: ra".

⁸Ngo mho' ja: re Mao"So pe"mung: ngore mabyid: nae" i? Nga" akyu" mho' dao: re pe"mung: yao: matau: byid: nae" i?

⁹Yao" yang shi" ngore se' pye' qa: we"-

¹⁰Yao: airu: kad' nae" ngo qe ba: ngad: re ngo khoqhi" no: na qere:- ngo wa ngaui bau: ngaui lho" athug' jhu" qin" nae" ru- Mao"So wa Gyang" lho" rure ngo ba: ra". Yao: amyin" byid' rure ngo khonhae" re: mangag: thaug' pye' qu"-

¹¹Ngo xo' daui: na nae" qhid' mae" ngo mae pe" qam: o: qo" i? Ngo mae myid: lao" nae" khyo majo; ru- pe"mung: ba: xo' daui: na nae" i?

¹²Ngo re laug zang: yang kad' to" i? Nga" gaung khyao wa gyid: bo" ngad: i?

¹³Ngoyao" gaung re khyad' yu nae" qam: o: ngo mae mabo lo:- ngore bao" yu nae" qhid' mae" lhang: ye: nae" jo, qo majo,-

¹⁴Mao"So re ngo shapye' pye' va" ru ngad ngad mashapye' ngad: re ngad- Ceru" ru qug: khai: qhug' ra" au: re ngo wa- jhaug' zaug: ra" ba nam qe qo: ca" ra".

¹⁵Ngadqere:- nga" ba nam qe naonhaung" wa- mug: maqu lao" kyaug' ho: lo" ra" qid zo: gyaung: we' dakhyo: ngore mhug' pyag' zo" ako".

¹⁶Qid zo: gyaung: jham re gyu: we' gyukhai" jham byang: jo, ngadqere:-

¹⁷Laung: li" lao" aijham baui" lo" ako". Aimung: qid zo: gyaung: kao" jham wa myid cin kyaug' ho: jo; ako".

¹⁸Phaga: gyaung: qhang su: mo, wa qid re qho: qin" mung: khyodae: dae" ako". Yao: bam wa du" lae" qin" mung: din"pyad' yo mae shid: lo" ako".

¹⁹Sheba mung" we' Tema mung" mae gyaung: qhang su: mo, qho: qin" ako".

²⁰Ngadqere:- kyaug' ho: jo; ra" qid zo: gyaung: nhae mae yao: bam: myid: lao" khyo thao" byaug: ako".

²¹Naonhaung" wa- nga" qhid' mae" ai: qid zo: gyaung: jham we' dau: ako". Naonhaung" wa nga" au: pa lo,kyo' re myao mung: gyaug: ru we' naung zad: zad' phao: lo" ako".

²²Ngo wa naonhaung" re jhaung qhu" byid: gela, ein: mho' qu" i? Mangad: lao"- dayaug yaug re nga" gaung tha" khyo" khug vag: jhaung qhu" byid: nhao: qu" i?

²³Mangad: lao"- gyevo dayaug yaug la, zag zo" ra" zug: dayaug dayaug: lo, mae" la, ngore khyad' yu nae" mho' qu" i?

²⁴Gai va"- ngore mho" shid' gela, nga" qobo jham re ceim" shid' gela,- Ngo sae za: tae" jo; mung: naonhaung" dao: re tae" gyo: nae".

²⁵Din:man" ra" dao: jham wa lam ga" ra". Ngadqere:- naonhaung" wa pe" lajheim: mabo: ru ta" na: ako".

²⁶Naonhaung" wa ngore la za: mad: na: ra" ga: myid: jho: ako". Airu: ngad: re- pe"mung: yang: nga" nhag' lam: thao" ra" dao: kheim: jham re tau: byid: ko" i?

²⁷Naonhaung" wa- Cug' zo: nau" jeim qe: qhid' mae" lhao" re: pha" ce' khyo" ako". Aimung: naonhaung" te" thao" ra" ba nam qe: dao mae lhao" re" jo,nho" qo" sho' kad' zo" li" genae".

²⁸Nga" myo,khung: re zhaug' qu" gela, ngo mamhug' nae".

²⁹Naonhaung" dao: saung" jhau: lai: avako". Matarha" rure thang: to: gese,. Ngore dao: daphyid' gela,- ngo wa jo: yaug ngad:.

³⁰Ngadqere:- naonhaung" wa ngo mhug' na: ra" ga: myid: jho: ako". Naonhaung" wa ngore- jo: ru we' shad" rure maba: ta" yaug ngad: ra" ga: myid: jho: ako".