Read Maru YOBA 7 Bible Online

YOBA 7 - Maru bible

YOBA 7

¹Xao su byu: nho: kao so' wa maqad maqui" gye mau" zaui" ru we' dau: ra". Aqug: akhai: mau" jam: zaui: zo" ru we' re: dau: ra".

²Cae: ngin" ra" ba sham qab re nhag' nghae" na: ra" jeim we' re: dau: ra". Okaung phug' lao" na: ra" mau" zaui: yaug we' re: dau: ra".

³Lho" dakhye' thao dakhye' ngo kao so' daui nae" khyo pe" majo,- damyi we' damyi kaug' qhui: ru wa ngojhao" joe" li" ra".

⁴Ngo yab: lo" re ayo, gyai qhang thoe gyo" ra". Ngo myikhyeim gaung phaug' lhag' mung: mug: bo" nae" rure nhag' nghae" na:-

⁵Nga" gaung dagaung: geim" mae laug daung: byang" jo; ra". Gaung geim" mae dae kye' byang" jo; ra". Ai: myaug: ra" nga" dae jad: khu jham mae" vhag' thug' li" ra".

⁶Nga" nho: ba na jham wa myid: lao" jo, qo mabo: ru lai: lo" ako". Qo,gin: qo; yaug: nho: jao: paug' tho' je: phyad: ra" khyo" lai: lo" ako".

⁷O" Mao"So we"- nga" kao so' wa so' dalhang she za: ngad: rure myid: beim: byid: la,. Nga" ngaui pyo: khyo wa thao" byaug va".

⁸Nao ngore ana" the' myao ngadqere:- khonhae" re: madam: the' myao lo nae". Nao ngore qho: qu" re ngo lo" byaug: li" naeva".

⁹Jo; baui" lo" ra" jham thaui: we' dakhyo: byu wa shid: lo" mung: khonhae" re: madam: tug' lo lo:- Yao: re ba mo, alhab' yang yao: re to" myhid' pye' ako".

¹¹Mangad: nae" ngo wa sae za: maqo" tae" to:- Ngo nhag' yo: mung: alokho" ra". Ngo wa jhau yao: jhau ca" ra".

¹²Nao wa pe"mung: ngore lhaug' zaung" to" i? Ngo re panglai: maojaung: ein: nao myid: jho: i?

¹³Ngo wa lang" jo, mung: dug no" yu nae" seim" ra". Ngo wa nga" dae khai" nho: rumae" dae yo nae" khyo qho: ra".

¹⁴Ngadqere: nao wa- ngore yab mo; yang kyaug' ra". Nao wa ngojhao" qhu" lho we' yab zag re nhao: ke' byid' ra".

¹⁵Aiwa- ce: qug: khai: dayin dayo: byu gaung mae daui: na nae" tho'- lang zang: nai: khyug' se' qhug' ru wa aje: gai nae" khyo: myid: mung sho' ngad: ra".

¹⁶Ngo aseim" byid' pye' va". Ngo wa manug: daui: na lo:- ngoyao: re za: nha: to: la,- nga" kao so' khyo pe" akyu" mabo ngad: ra".

¹⁷Byu wa pe"mung: ni" qhid' mae" taung" akhyag: laug i? Yao: kad' rure pe"mung: akhyag toe' mung: qu" nae" i?

¹⁸Nao wa yao: re ne, seim khao: ngo" ca: qu" byid' na mung:- yao: re ayo, khao: ngo" mae jham" qu" na: ra".

¹⁹Nga" khata: re lhau" qo" myug sho' dazab khalhao" va: khyo nao maqu" lo nae" i?

²⁰Ngo re laug' qu" na yaug we"- nga" qobo: yang nao dae leim zo" i? Ngo re ni" sab' jhi: keim" nae" zai toe' yang: pe"mung: ci: yhung" ra" i? Ngo wa ni" qhid' mae" qola: mo" boe" jo; ra" i?

²¹Nao wa nga" qobo re maqo" khyad' byid: lo nae" i? Ngo kad' shad' rure nao qobo maqo" khyad' byid: lo: i? khomyhao" mamyao" re ngo wa nga" lab mae joe" jo, naeva". Aimung: nao ngore cao" qho: ra" au: ngo wa lo" byaug naeva".