Read Maru YOBA 9 Bible Online

YOBA 9 - Maru bible

YOBA 9

¹Ngad va"- ai: gu: alhab' re qhid' phyao: ngo gyo" qu" va". Ngadqere:- byu dayaug wa Mao"So we' mung bo: re khoru: qo" gai: aung nae" i?

³Yao: we' khag' qo" jho" ngag nae" i? Yao: wa- khag' yang maqo" phyid: ra" dao: myid: dataung re qo" myid' ra".

⁴Mao"So wa pha,jhi" gyai bo mung: kheim: so' gyai qi" ra". Yao: re ngag: thaug' yang: khag' maqo" to" ye, ngad: ra".

⁵Yao: wa mata" peim" to: lo: bam jham re qhui" pye' ra". Aimung: nhag' yo" ruyang aijham re phyo' qheim" pye' ra".

⁶Mao"So wa myid lab: lab: nhao: mung: myidgaung re lhaui" nhan" ke' ra". Yao: wa myidgaung re thaug' to" ra" zang baung: jham re lao" lhaui" ke' ra".

⁷Yao: wa ba re mathug' sho' qo" tam" to" ra". Myi" rere: kyi mabao sho' qo" kad' ra".

⁸Mao"So wa- mug: khaung re phyid: lhu: ke' ra" au: khag' mabao" ngad: ako". Pang:lai:: maojaung" nho: dao gaung: mae zab nhae" rure re: khag' mabao"-

⁹Mao"So wa mug: kin mae kyi jham re lhao" to" ra". Kyilo; lakhyan"- Bo" myhung- Cad' myhung we' mug: thao shad' mae" kyi jham re lhao" to" ra".

¹⁰Yao: kad' ra" mau" qi: jham re ngonhaung" matho' ba: gyo:- Aimung: yao" mug' pho: mau" wa thao" gan: lo" ga" ru majo,-

¹¹Mao"So su" lai: lo" ngadqere: yao: re ngo mathe' myao-

¹²Yao: o: rure yao: yu: pye' ra". Aimung: yao: re khag' yang maqo" tam"- yao: re khag' yang re:- nao pe"mung: airu: kad' na: i? ga: mavae" myid: ngad: ra".

¹³Mao"So nho: nhag' yo: wa gang" tang: jo; ra". Yao: wa yao: re ngag: thaug' nae" qhid' mae" panglai: maojaung: Rahab re bao" thaug' byid' ra" yao" gyevo qere khyoe' kad' pye' ra".

¹⁴Aimung: Mao"So re phaug' tau: nae" dao: kheim: jham re ngo khoru: ba: qo" qho nae" i?

¹⁵Ngo wa qobo maqo" ngad sho' ngadqere:- nga" nho: tarha" agyi Mao"So mae" nhag' khyag' yu nae" rure za: aqo" mho' lo"-

¹⁶Airu: ngad sho' qere:- yao" yang ngore dao: qe to" jhau nhao: re- yao: ngore tae" gyo: byid' li" nae" ein: maba: tho' myid: lam-

¹⁷Yao: wa- pe" si: mabo: rumae ngore be; khyad' mung: thaung" cad' pye' nae" qhid' mae" la qam" re nhao: ke' byid' ra".

¹⁸Yao: wa ngore so' tha" she nae" akhang" mabyid: ngad: ra". Yao: wa nga" apyad re kho" ru byang" sho' ke' to: byid' ava".

¹⁹Ngo wa qam: jam: ci: re gai nae" laug? Mao"So re qam: jam" yang jhan: nae" laug? Ngo wa yao: re tarha" yung" gau: nae" laug? yao: re khag' yang qo" lo" nhao nae" i?

²⁰Ngo wa- qobo maqo" mung: ngo wa jhaug' zaug: yaug ngad:- ngadqere: nga" dao: jham wa qobo qo" nhohab mung: ra". Aimung:- ngo jhau: ru ja: khao: ngo" wa ngore qobo zhaug' ra".

²¹Ngo wa qobo maqo" yaug ngad:- ngadqere: ngo pe" shui manho lo: ngo wa na: nghang: va". Pe" akhyag yaug mangad: lo:- qobo qo" qo" maqo"qo" Mao"So wa ngonhaung" re phyo' qheim" pye' li"nae".

²³Qobo maqo" su dayaug nyag din taung" shid: lo" re Mao"So qi: ra".

²⁴Mao"So wa makhyang: mashab nhag' lam: kaui mo, re mug:myid byid' pye' ra". Yao: wa tarha" agyi alhab' re myo,jid nhao: ra". Aimung: aire Mao"So makad' re khag' yang kad' ra" i?

²⁵Nga" ba na jham wa phyad za: tao" lai: lo" ako" aigu: mae" daba re: magai ngad: ra".

²⁶Nga" apyad wa- phyad: thao" ra" qid lha we' dakhyo: lai: lo" ra". Aiwa thao lho re khe' dao" gyo" lo: ra" zeim baung: we' dakhyo: mye; ra".

²⁷Ngo wa qinug sam: su kad' mung: nga" dae khai" nho: rure to" myhid' pye' nae" qam: ke' mung:- nga" dayin dayo: kham zo" ru alhab' wa ngore lodam: tug' kyaug' na: ngad: re wa- Mao"So: yang ngore- qobo qo" ga: qobo zhaug' to" rure ngo ba: ra".

²⁹Ngo re qobo qo" ga: qobo zhaug' ruyang ngo pe"mung: sang: kho: nae" i?

³⁰Nga" qobo jham re- pe" ja" sa:pya" yang re: maqo" cid' san: pye' ngad: ra".

³¹Mao"So wa- ngore maca' majhad' tham: khug khyo shapye' khyo" pye' ra". Aimung:- nga" nho: mai bau: jham lhao" re: ngore ca' pye' ako".

³²Mao"So qe xao su byu angad: re yao: re ngo qo" phaug' tau: nae". Nga" shid' zo" nho: myan" myo" rure dao: qo" phyid' byid: nae" qhid' mae" tarha" yung" khyo qo" gai: ye: naeva" ru-

³³Ngadqere:- nga" shid' zo" agyo: mae vao: jhau byid: nae" byu khag' mana ngad: ra". Mao"So we' nga" shid' zo" gyo: mae dao: kho' phyid' byid: nae" khag' mana-

³⁴Mao"So we"- ngore qobo dae byid' ru to" pye' la, se,- ni" kyaug' tin" rure va: khyo yu: lo" wa,.

³⁵Ngo wa magyaug- ngo wa ngoyao" nhag' lam: re ba mung: ngo dao: jhau naeva".