Read Maru CAUNG: KHIN" 102 Bible Online

CAUNG: KHIN" 102 - Maru bible

CAUNG: KHIN" 102

¹O" ASANG we" nga" akyu" mho' dao: re tae" gyo: byid: la, Aimung: bao" yu nae" qhid' mae" hug' yao: rure gyo: byid: la,

²Ngo qug: khai: qhug' na: au: re ngo mae" daphao: lo" Ngo re tae" gyo: byid: mung: ngo khai: ra" au: re phyad phyad tau: byid: la,

³Nga" apyad wa myi:khug' we' dakhyo: baui" lo" na va". Nga" gaung khyao wa myi: we' dakhyo: nga" na: ra".

⁴Ngo wa mhin: kyaug' we' dakhyo: be; pye" pye' ru qhug' va". Ngo wa zo:ve re: manug: zo: lo:-

⁵ngo wa thoe qi: ke' mung: nokyang: kyang" na:- ngo wa sho:qug mae sho:qid za: alham: lo".

⁶Ngo wa din"pyad' yo mae" ngho' lae" we' dakhyo: byo; qeim: ra" jo, qo mae" khaung: bab; we' dakhyo: ngad: byaug va".

⁷Ngo wa abeim: zang lang" jo;- ngo wa yham khaung dao mae" ngho' te: we' dau: byaug va".

⁸Nga" gyevo qe wa ngore ba geim" roe" na: ako" ngore jung" mo, wa nga" mang re lao: mung: nhang" na: ako".

⁹Ni" nhag' yo: we' nhag' jam: yo" ruyang myiqe, wa nga" zo:ve boe" va". Nga" ngug byid jham re: nga" shaug' qid we' lhag' byaug va"- nao ngore gaug: yu mung: shapye' pye' ra".

¹¹Nga" apyad wa myi" thao zo" mae" khabao we' dau: ra"- ngo wa mhin: kyaug' we' dakhyo: boe" byaug va".

¹²Ngadqere: O" ASANG we"- nao wa apyad ato mae" kho:kham ngad: ra". Byu daqae: mae" daqae: alhab' mo; yang nao re ceim" myid: beim" na genae".

¹³Nao wa to" li" mung: Ziun re nhag' khyag' yu: li" nae". Yao: re nhag' khyag' byid: nae" ayo, joe" lo va". Ana" ce: ayo, wa jo: ra" ayo, ngad: ra".

¹⁴Yao: wa phyo' pye' ru qhug' ngadqere: ni" daui daui mo, wa yao: re jhid'de; ako". Yao: wa byo; qeim: byaug qere: yao: bam wa yao: re nhag' khyag' ako".

¹⁵Byumyu" qe wa ASANG re gyaug genae"- myid gaung dao mae" kho:kham alhab' wa yao" kheim: so' re gyaug: bam genae".

¹⁶ASANG wa Ziun re dam: te" ra" au: re yao: qi" qhang: ra" khyo re yao" yang qhu" byid: nae".

¹⁷Yao: wa yao" yang shapye' to" ra" byumyu" re gyo: byid: mung:- yao: bam: akyu" mho' thoe re tae" gyo: byid: nae".

¹⁸ASANG kad' va" mau" zo" jham: khyo re tung" xam" to: wa,. Ailao" za: makhau: li" shi" ra" mo, wa yao: re caung:khin" byid: genae".

¹⁹ASANG wa tho"- gyang" lho" ra" yao" jo, qo mae" qu" khyo" ke' ra". Yao: wa mug:gaung mae" myid gaung khyo qu" khyo" ke' ra".

²⁰Yao: wa khyug laung" mo; nho: nokyang: thoe re the' gyo: mung: se' pye' nae" dao: kho' ru qhug' ra" mo, re loe; beim nhao: ra".

²¹Airumung: yao" mang a re Ziun mae ta" hau: byid: yang: Yerusalem mae yao: re caung:khin" byid' li" genae".

²²Ai: au: re kho:kham mung" jham we' byumyu" qe wa ASANG re caung:pa" nae" qhid' mae" phaung: ham: lo genae".

²³Ngo ngai shi" au: re ASANG wa ngore qam: nang: nhao: ra". Yao: wa nga" kao so' re shaung" pye' byid: ra".

²⁴O" ASANG we"- ana" ngo mamao: shi mae" ngore dajhui" yu: pye'- ASANG nao wa apyad ato mae daui: na: ra".

²⁵Ganhae" gaco' yo, mae" nao wa myid gaung re phan" to: mung: nao yao" lo; yang yao: mug:gaung re kad' to" ra".

²⁶Aijham wa baui" lo" byaug: li" genae". Ngadqere: nao wa na: dang; jo, nae". Aijham wa mai bau: xug' jham we' dakhyo: xug' qeim" lo" li" genae". Nao wa aijham re mai bau: jham we' dakhyo: shalhaui" pye' mung: aijham wa byaug: lo" li" genae".

²⁷Ngadqere: nao wa khonhae" re: dakhyo: za: ngad: jo, mung: Ni" kao so' wa khonhae" re: thao" ga" ru majo, ngad: ra".

²⁸Ngonhaung" nho: zo: dau qe wa gug: gam: ru we' qo" na mung:- yao: bam: myid:zo: qe wa ni" gug: gam byid' ra" qao: mae yaug yo gug: gug: za: na li" genae".