Read Maru CAUNG: KHIN" 103 Bible Online

CAUNG: KHIN" 103 - Maru bible

CAUNG: KHIN" 103

¹Nga" alo zo: we"- ASANG re caung:khin" byid: wa, Nga" gaung khyao alhab' we"- yao" gyang" lho" mang re caung:khin" byid: wa,

²Nga" alo zo: we"- ASANG re caung:khin" byid: wa, aimung: yao: khoqhi" nhag' khyag' myid bo: rure dato" myhid' pye'.

³Yao: wa nga" qobo alhab' re khyad' pye' byid: mung: nga" nobug: phyo:bug: alhab' re gai byid' ra".

⁴Yao: wa ngore lab khug mae" jhui" yu mung: jhid'de; myid we' nhag' khyag' myid: yang ngore shaman" byid' ra".

⁵Ngo wa maba: mao" lo" ra" zeim baung: we' dakhyo: qam: bo: jo, nae" qhid' mae" yao: wa- nga" pyad mae gai: ra" ja: jham: yang ke' pyang" to: byid' ra".

⁶ASANG wa deim" zag zo" ru kham zo" na mo, shad' khyo dao: phyid' byid: mung: yao: bam re tarha" din: nyang: ru byid' ra".

⁷Yao: wa Moshe re yao" myid: yaung: to" ru qhu" byid' ra". Aimung: Israel byumyu" qere yao" qam: so' mau" zo" re myao nhao: ra".

⁸ASANG wa nhag' khyag' myid we' jhid'de; myid bo yaug ngad: ra". Nhag' lam: myan mung: mabaui mabyo; jhid'de; myid byang" jo, yaug ngad: ra".

⁹Yao: wa qeim za: qeim: na: ru mangad: apyad ato mae nhag' yo" na yaug mangad:.

¹⁰Yao: wa ngonhaung" re ngonhaung" phau: zo: nae" man: qi" khyo" qobo dae mabyid:- ngonhaung" shad' ra" qobo we' man: qi" ra" khyo" lage, maphaug'.

¹¹Mug:gaung wa myidgaung tho' myhao: ru we' dakhyo: yao: re nga: yhe' byid: mo; dao mae yao" jhid'de; myid qi" qhang: jo; ra".

¹²Ba thug' shad' wa ba vao shad' we' va" ruru: yao: wa ngonhaung" qobo jham re ngonhaung" mae" yu: pye' byid' ra".

¹³Yao: pho" wa yao: zo: qere nhag' khyag' ru we' dakhyo: ASANG wa yao: re nga: yhe' byid: mo, re nhag' khyag' byid' ra".

¹⁴Ngonhaung" re pe" yang kad' to" rure yao: ba: ra". Ngonhaung" wa phalhug ngad: rure yao: myid: beim" ra".

¹⁵Ngonhaung" apyad kam" wa mhin: zo: we' dakhyo: ngad: ra". Ngonhaung" wa seyo mae" bin: bu" re" ru: yaug: qi" li" mung:-

¹⁶Ai: dao mae la hug' hug' lo lao"- ai wa byaug: baui" lo" ra"- aire khag' madam: myao lo: gengad: ra".

¹⁷Ngadqere: Asang re nga: yhe' byid: mo; qhid' mae" yao" jhid'de; myid wa apyad ato mae ngad: ra". Yao" nho: gai: rure: byu daqae: we' daqae: ajo; jo; ra".

¹⁸Yao" dao: thang" dao mae jhaug' zaug mo, we' yao" amyin" dao: jham re jhaug' zaug mung: cao" na mo; dao mae jo; jo; ra".

¹⁹ASANG wa yao" zaung tao" re mug: khaung mae to" to" ra". Yao: wa alhab' dao mae kho:kham ngad: ra".

²⁰ASANG: amyin" dao: re phug' cao" mung: yao: ta" rure tae" gyo" ra" mo, wa- qam: bo mung: qam: so' qi" ra" mug: lagyo: qe we"- ASANG re caung:khin" byid: ge,.

²¹Mug:gaung mae" kheim: so' qi" ra"mo, alhab' we"- ASANG: myid cao" ra" yao" daui daui mo, we"- ASANG re caung:khin" byid: ge,.

²²ASANG eib: na: ra" jo, qo alhab' mae" yao" gug'nyhug' alhab' mo, we"- ASANG re caung:khin" byid: ge,. Nga" alo zo: we"- ASANG re caung:khin" byid: wa,.