Read Maru CAUNG: KHIN" 104 Bible Online

CAUNG: KHIN" 104 - Maru bible

CAUNG: KHIN" 104

¹Nga" alo zo: we"- ASANG re caung:khin" byid: wa, O" ASANG nga" Mao"So we"- nao wa khoqhi" qi" qhang: ra" i? Nao wa kho:kham kheim: so' we' phungbao re ve; ci: ra".

²Nao wa nao yao" gaung re bo" bao: yang nghoe' ci: ra". Nao wa mug: khaung re zaung we' dakhyo: mug' myhung" to" ra".

³Nao wa ni" yham re qid jham: dao mae te" to" ra". Nao wa jham thaui: jham re ni" myao: lhin" we' dakhyo: ci mung: la: nho: daung jham: dao mae zaung: qin" ra".

⁴Nao wa la hug' re ni" daui nhao lagyo: jham re" ru: ci: ra". Lhe' cad' bao jham rere: ni" daui daui mo, we' dakhyo: ci: ra".

⁵Nao wa myidgaung re yao" aqao: mae tang sho' zhaug' to" ra". Aimung ai:ru wa khonhae" re: malab malaui: nae" ngad: ra".

⁶Nao wa ai: dao mae nammugdara re mai qhang bau: qhang re" ru: nghoe' to" ra"- aimung: bam jham re qid jham: yang nghoe' nhai" jo; ra".

⁷Nao: yang qid jham re qeim lao" aijham wa phao: lo" ako". Nao: yang hug' ke' ra" amyin" re the' gyo: gelao"- yao: bam hin hin phao: lo" ako".

⁸Yao: bam wa nao kad' to: byid' ra" jo, qo bam jham mae"yug: gyo" lo" mung: lao: khaung: jham khyo yug: gyo" lo" yang: yao: bam: qhid' mae" ASANG jaung: to" ra" jo, qo khyo yug: gyo" lo" ako".

⁹Ai: qid jham wa myid gaung re madam: qo" nhug' lo: genae" khyo" nao: yang yao: bam re yao: bam khonhae" re: maqo" lai nae" ra" mug: kyo: kad' to: byid' ra".

¹⁰Nao wa lao: khaung: jham mae qid baug: gyaung: nau" jham re yug nhao mung: bug gaung jham: agyo: khyo" qid gyaung: mo" jham re yug: gyo" nhao: ra".

¹¹Aijham wa seyo: gug'nyhug' jham: qhid' mae" shaug' qid boe" byid' ra". Ai: mae loze lae" jham yao: bam qid shab' ru gai: lo" ako".

¹²Avai: ayae mae" sag' gae jham mae ngho' jham wa yao: bam: asad' sad' mung: nghaui"caung" ako".

¹³Nao wa mug:gaung mae" mug: qid jham re bug gaung jham: adao mae gyo" nhao: ke' ra". Aimung: myid gaung wa ni" shaman" jeju we' byang" jo; ra".

¹⁴Nao wa nung: jham: qhid' mae" mhin: re yaug nhao: ra". Aimung: xao su byu: yang qho:vo: qo" qho: nae" qhid' mae" byu zo: nae" qho:vo: gae jham re phan" to: byid' ra".

¹⁵Aimung: xao su byu wa yao: yao: re pyo: nhao nae" qhid' mae" sabyi re we' yao: ngaui bau" nae" qhid' mae" zhanlun xau re kad' yu: ra". Yao" gaung re qam: bo nhao nae" qhid' mae" mug re kad' yu: ra".

¹⁶Lebanon mae" shaug' gae jham wa mug: qid laug sho' qo" ako". ASANG wa yao: qho" to" ra" sag' vo: jham re sang: na: ra".

¹⁷Ai: mae ngho' jham asad' sad' mung: qid ngho' jham wa qhoje; gae jham: dao mae ngho' sad' sad' ako".

¹⁸Yo: jham wa myhao: ra" bam jham: dao mae na: ako". Aimung: jalha: jham wa laug byo, laug qan" jham mae na: ako"

¹⁹Nao wa lho" re- lho" khye' nghe' nae" qhid' mae" phan" to" ra". Ba wa yao: vao nae" ayo, re ba: ra".

²⁰Nao wa myi" ayo, re kad' to: mung: mug: cad' yo re seyo: gug'nyhug' alhab' thug' li" ako".

²¹Khangkhyi nau" jham wa sho: khe' zo" re" kyid' na: ako". Yao: bam wa Mao"So: yang byid' ra" zo:ve re qho zo" ako".

²²Ba thug' li" lao" yao: bam wa yao: bam: khyaung khug khyo dam: vao lo" mung: ab' jo; ako".

²³Ailao" xao su byu qe wa su" thug' li" mung: yao: bam: mau" zo" mae myi" thao joe" sho' mau" khao" na: ako".

²⁴ASANG we"- nao wa myo: sho' ja: re kad' to" ra". Nao wa aijham re khoqhi" pha,jhi" bo: khyo" kad' to" ra" i?

²⁵Matho' nghe' lo:sho' ra" gug'nyhug' aqi: angai na: ra" qi" ru we' lu: ra" nammugdara jo; ra".

²⁶Ai: dao mae qid sang pho gau" qin" mung: nao phan" to" ra" panglai: mao jaung: Levithan wa sab' jhi: na: ra".

²⁷Yao: bam alhab' wa yao: bam zo:ve o: ra" au: re nao: yang byid: nae" rure myid: lam mung: nao re khug ngha: na: ako".

²⁸Nao wa yao: bam re zo:ve byid: mung: yao: bam aire zo" na: ako". Nao: yang yao: bam re zo:ve zho: mung yao: bam zo" gyi" na: ako".

²⁹Nao phaug' lo" lao" yao: bam gyaug: ako". Nao byid' ra" ni" kao so' re nao dam: yu: pye' byid: lao" yao: bam shid: lo" mung: yao: bam re phan" yu: ra" phalhug khyo dam: tug' lo" ako".

³⁰Ngadqere: nao: yang yao bam re kao so' byid: lao" yao: bam wa daui: na: ako". Nao wa myid gaung re kao so' asag' byid' ra".

³¹ASANG nho: phungbao wa apyad ato mae gang" tang: jo, vashao:- ASANG wa yao: kad' to" rumae ngaui bau" na vashao:

³²Yao: wa myid gaung re qu" lao" ai: myid gaung wa lab: nin" ra"- Yao" yang bam jham re tin" ke' mung: ai: bam jham mae" myikhug' mad: thug' ke' ra".

³³Ngo wa nga" pyad geim" mae ASANG re caung:khin" byid: nae". Ngo adaui: na na wa nga" Mao"So re nghaui"caung: byid: nae".

³⁴Nga" nho: nghaui" caung: thoe re yao: myid: ngaui vashao:- pe"mung:ga"re nga" ngaui bau: ngaui lho" ru wa yao: mae" joe" li" ra".

³⁵Qobo byu qe wa myid gaung dao mae" phyo' qheim" pye' qhug' vageshao:- Nhag' lam: kaui: ra" makhyang: mashab mo, madaui: na lo: geshao:- nga" alo zo: we" ASANG re caung:khin" byid: wa,- ASANG re caung:khin" byid: ge, wo".