Read Maru CAUNG: KHIN" 105 Bible Online

CAUNG: KHIN" 105 - Maru bible

CAUNG: KHIN" 105

¹ASANG re jeju beim: so: byid: ge,- yao: qi" qhang: ra" khyo re hau" kyo: ge,- Byumyu" qere yao: kad' ra" mau" zo" ta" kyo: ge,

²ASANG re nghaui"caung: ge, Yao: kad' ra" mug' pho: mau" zo" jham re ta" kyo: ge,

³Yao" yang ngonhaung" re sang: rumung: ngaui bau" na ge, Yao: re caung:pa" byid: mo, alhab' ngaui bau: ngaui lho" na ge,

⁴Bao" yu nae" qhid' mae" ASANG jhao" ye: ge,. Aimung: yao: re abang mabyid lo: caung:pa" ge,

⁵Yao" daui daui yaug Abraham nho: myid:zo: qe we"- yao: khyin: yu: ra" yaug Yaku nho: myid:zo: qe we"- Mao"So kad' qhu" lo: ra" mug' pho: mau" jham re beim: ge,- yao: byid' ra" dao: kho' khyo rere: beim: so: ge,

⁷ASANG wa ngonhaung" Mao"So ngad: ra". Yao" nho: amyin" jham wa mug: myid geim" qhid' mae" ngad: ra".

⁸Yao: wa yao" dao: thang" re apyad ato mae zam" ci nae". Yao" dao:so: jham re byu qae: dataung joe" sho' zam" ci nae".

⁹Yao: wa Abraham we' dang: to" ra" dao: re we' Isag re byid' to" ra" Yao" dao:so: re phug' cao" na: li" nae".

¹⁰ASANG wa Yaku we' dao: thang" to" ra". Ai: dao: thang" wa apyad ato mae dang: jo; ra".

¹¹Yao: wa ngo nao re Khanan mug: myid byid: nae" Aiwa ni" jo,nho" boe" jo, nae"- ga: ta" ra".

¹²Mao"So: byumyu" wa byu mamyo: ngad: ra". Khanan mung" mae byu bang" boe" na: ako".

¹³Yao: bam wa damug: mae" damug:- kho:kham damung" dan: mae" damung" dan: du" phao: lae" qin" ako".

¹⁴Ngadqere: yao: bam re khag' yang deim" zag zo: nae" akhang" Mao"So mabyid: ngad: ra". Yao: wa kho:kham qere ai bam re gug: gam byid: nae" qhid' mae" ta" peim" ra".

¹⁵Ngo: yang khyin: to" ra" daui daui mo, re dae date' ge, nga" lapa qere dathe' zao" ge,

¹⁶ASANG wa yao: bam: mung" mae bao" khug' khug' nhao: ra". Aimung: yao: bam: zo:ve alhab' re yu: pye' byid' ra".

¹⁷Ngadqere: yao: wa yao: bam: qhid' khyo jeim khyo" aung: zo" pye' qhug' ra" yaug Yoseb re nhao: ke' ra".

¹⁸Yao: we' sin: yang: pa: to" ru boe" li" sho' Yao" khyid jham mae jao co: kheim" jham vhe' to: mung: yao" lang zang: mae jo, to' lang koe: vhe' to" ako". ASANG: mungdao: wa yao: mae jo; dang: lo va".

²⁰Ai: thao re Egutu kho:kham wa yao: re nhao: thug' ke' va". Byumyu" qe: kho:kham wa yao: re loe, beim nhao va"

²¹Yao: wa yao: re yao" Asuya mau" zaui: nhao: ra". Yao: re damung" geim" dao mae eib nhao: ra".

²²Kho:kham: nho: zug: qe: dao mae eib nae" kheim: so' we' yao" pha,jhi" byid: nhag' bo qere mho" shid' nae" akhang" byid' to" ra".

²³Ai: thao mae Yaku wa Egutu khyo ye" lo" ra". Aimung: ai: mung" mae ye: te" na: ra".

²⁴ASANG wa yao" byumyu" re myid:zo: myo: sho' byid' ra". Aimung: yao: bam re yao: bam: gyevo tho' yao: bam re qam: je: bo nhao: ra".

²⁵Yao: wa Egutu byumyu" qe:yang yao: bam re nghang: nae" khyo: kad' va". Aimung: yao" daui daui mo, re mhug' pyag' ra" khyo" zam" khug nhao: ra".

²⁶Ai: thao mae yao: wa yao" daui daui yaug Moshe we' yao: khyin: yu: ra" Arun re nhao: ke' ra".

²⁷Yao: shid' nhae wa Egutu mung" mae Mao"So: qam: so' bo: ra" lo, mau" we' mug' pho: ve, lho jham kad' qhu" ako".

²⁸Mao"So wa ai: mung"dan: mae cad' no; rure nhao: ke' byid' ra"- ngadqere: Egutu byu qe wa yao" amyin" re magyo: byid: ngad: ako".

²⁹Yao: wa yao: bam: qid gyaung: jham re sa: boe" nhao: ra". Aimung: yao: bam: ngo: alhab' re se' pye' ra".

³⁰Yao: bam: mung"dan: mae pohaung byang" byaug: ra". Kho:kham kho" mae lhao" re: byang" byaug: ra".

³¹Mao"So amyin" byid ke' mung: yao khaung: jham we' mho' jham damung" geim" mae dao" qin" ako".

³²Yao: wa yao: bam: mug: myid dao mae Mug: qid atha" lagqu we' lhe' cad' re nhao: ke' ra".

³³Yao: wa yao: bam: sabyi naui jham we' pho' ham" gae jham re phyo' qheim" pye' mung: sag' gae alhab' re gyug' gyo" byaug nhao: ra".

³⁴Yao: amyin" byid ke' mung: matho' nghe' lo:sho' ra" khyag' phaung" jham bai bai mung: na: thug' li" ako".

³⁵Aijham wa ai: mug: myid mae" agae jham alhab' re zo" pye' ako". Yao: bam wa qho:vo: gae alhab' re zo" pye' byid' ako".

³⁶Yao: wa Egutu yham khaung alhab' mae" yauggai zoqhid' qere se' pye' byid' ra".

³⁷Ai: thao mae yao: wa Israel byumyu" qere jhui" thug' lo: ra". Yao: bam wa ngaui we' qhang re ci: thug' lo: ako". Aimung: yao: bam alhab' mo, wa qao" zin" mung: qam: bo: ako".

³⁸Egutu qe wa yao: bam re gyaug mung: yao: bam phao: thug' lo" re ngaui bau" ako".

³⁹Mao"So wa yao" byumyu" qe: dao mae jham thaui: nghoe' to: byid: mung: myi" re yao: bam myo, myao nae" qhid' mae" myi: bao byid' ra".

⁴⁰Yao: bam mho' gelao" yao: wa ngho' jham re nhao: khyo" byid' ra". Yao: wa- yao: bam gyi" zo: nae" qhid' mae" mug:gaung mae" zo:ve khyo" byid' ra".

⁴¹Yao" yang laug bam re phung" ke' mung: qid baug: thug' li" ra". Aiwa din"pyad' yo mae qid gyaung: zang we' dakhyo: yug: li" ra".

⁴²Yao: wa- yao" daui daui yaug Abraham re to: byid' ra"- Gyang" lho" dao:so: re myid: beim" ra".

⁴³Aimung: yao: wa yao" byumyu" qere jhui" thug' yu mung: yao: bam wa ngaui bau: ngaui lho" nghaui"caung: ru we' hug' ako".

⁴⁴Yao: wa yao: bam re su gaje: byumyu" qenho: mug: myid byid' ra". Aimung: yao: bam: yothaung: jham re sang: yu nhao: ra".

⁴⁵Airumung: yao" byumyu" qe wa yao" tarha" jham re cao" mung: yao" amyin" alhab' re zam: mung: cao" ye: genae" ngad: ra". ASANG re- caung:khin" byid: ge,.