Read Maru CAUNG: KHIN" 106 Bible Online

CAUNG: KHIN" 106 - Maru bible

CAUNG: KHIN" 106

¹ASANG re caung:khin" byid: ge,- ASANG wa gai: rumung: yao: re jeju beim: so: byid: ge,- yao" jhid'de; myid wa apyad ato mae ngad: ra".

²Yao: kad' lai: lo: ra" mau" zo" qi: alhab' ra" khyo re khag' qo" ta" kyo: genae" i? yao: re khag' yang jab byang" sho' qo" caung:khin" byid: nae" i?

³yao" amyin" jham re phug' cao" ye: mo, wa ngaui lho" ako". Yao: wa khonhae" re: jo: ru za: kad' yaug ngad: ra".

⁴ASANG we"- nao: yang ni" byumyu" qere bao" yu: ra" au: ngore myid: beim: la,- yao: bam re khyad' yu: ra" au: re- ngo rere: bo:ke' yu byid: la,.

⁵Ni" byumyu" qe na: dai: rure- ngore myao nhao la,- aimung: nao: yang sang: ra" mo, ngaui bau: ngaui lho" rumae ni" byumyu" ngaui bau" ru we' daga" ngo rere: bo ngaui bau: nhao la,.

⁶Ngonhaung" wa- ngonhaung" phug' phyid' bam shad' nghung" ruru: qobo shad' bam va". Ngonhaung" wa nhag' lam: kaui mung:- makhyang: mashab mo, ngad: bam va".

⁷Egutu mae" ngonhaung" phug' phyid' qe wa Mao"So: mug' pho: mau" jham re maba: gyo: ngad: ko". Yao: bam wa- yao" yang yao: bam re- myo: sho' lhang yao" jhid'de; myid qhu" byid' rure to" myhid' pye' ako". Aimung: yao: bam wa panglai: ne mae qam: so' qi" thao" ra" ASANG re tau: lhan" ako".

⁸Ngadqere: yao: wa- yao" qi" qhang: ra" kheim: so' re qhu" byid: nae" qhid' mae" yao" yang dao:so: byid' to: va" ru we' dakhyo:- yao: bam re khyad' yu va".

⁹Yao: wa Pang:lai:: ne re amyin" byid' ke' mung: ai:ru wa- Kyaug' ho: lo" ra". Yao: wa yao" byu qere myidgaung ho dao khyo" jhui" lai: lo" ra".

¹⁰Yao: wa yao: bam re nghang: mo; lo, mae" yao: bam re khyad' yu: ra". Yao: bam: gyevo qemae" khyad' yu: ra".

¹¹Ngadqere: yao: bam: gyevo qere kam" wa qid: yang nhai" se' pye' ra". Yao: bam mae" dayaug re: madang ngad: ako".

¹²Ailao" yao" byumyu" qe wa yao" dao:so: re lam" mung: yao: re nghaui" caung:khin" ko" ra".

¹³Ngadqere: yao: bam wa yao: kad' rure ai lao" jao" to" myhid' pye' mung:- yao" yang pha,jhi" byid: nae" rure malao" lo: dam: kad' ako".

¹⁴Yao: bam wa din"pyad' yo mae o: byid khyo qho mung: Mao"So re jham" qu" ako".

¹⁵Aimung: yao: wa yao: bam mho' rure byid' ra". Ngadqere: yao: bam: phaung mae gyaug ci" ja: qam" rere: nhao: ke' byid' ra".

¹⁶Ai: din"pyad' yo mae yao: bam wa ASANG: gyang" lho" ra" daui daui yaug Moshe we' Arun re qu" nhung: li" ako".

¹⁷Aimung: myid gaung go; ho" li" mung: Dathan re myug: pye' va". Abiram we' yao" yham byu qere re: bam" se' pye' va".

¹⁸Yao: bam: thao cao" mo; dao mae myi: shae gyo" lo mung: ai: makhyang" ra" nhag' lam: kaui mo, re nga" pye' va".

¹⁹Yao: bam wa Sina mae qhang: yang nung: jaung lo: nau" lho sheim: mung: ai: nung: jaung nau" lho re caung:pa" byid' ako".

²⁰Yao: bam wa- Mao"So nho: phungbao re mhin: zo" ra" ai: gug'nyhug' nho: alho we' jho" tha" pye' ako".

²¹Yao: bam wa Egutu mae yao" qam: so' qi" ra"- lo, mau" yang yao: bam re khyad' yu: ra" Mao"So re to" myhid' pye' ako".

²²Yao: wa ai: mae khoqhi" mug' pho: mau" jham kad' va" i? Pang:lai:: Ne mae khoqhi" mug' ja: kad' va" i?

²³Mao"So: yang yao" byumyu" qere phyo' qheim" pye' nae" ga: ta" au:- yao" yang khyin: to" ra" daui daui yaug Moshe wa- Mao"So: qhid' kheim: mae to" ye, mung: yao: bam re maphyo' qheim" pye' nae" qhid' mae" nhag' yo" rumae" khyad' yu: ra".

²⁴Aimung: yao: bam wa- Mao"So: yang dao:so: byid' to" ra" mug: myid re yao: bam ha: lhaui" pye' ako".

²⁵Yao: bam wa yao: bam yao" zaung yham khug mae laung" jo, mung: nyhung: gaui: na: ako". Amung: ASANG re matae" gyo: byid: ngad: ako".

²⁶Aimung: yao: wa- yao: bam re din"pyad' yo mae shid: dam: nhao nae" ga: yang:- gang" tang: ra" ta" peim: thoe ke' pye' ra".

²⁷Aimung: yao: bam: myid:zo: qere Mao"So re maba: ra" taung bug byumyu" qe: phaung khug khyo khe' sin" pye' ra". Aimung: yao: bam re taung bug: mang: mae shid: dam: nhao: ra".

²⁸Ai: thao Peora mae Mao"So: byumyu" qe wa Bala so re bocaung:pa" gemung: kao so' mabo: ra" so jham re qhaug' byid' ra" xeim: re zo" ako".

²⁹Yao: bam kad' ra" lo, mau" khyo" yang ASANG: nhag' yo: myid re lhau: zhung" ke' ako". Aimung: yang:yao: bam: phaung gaung: mae gyaug ci" ja: no boe" nhao: ra".

³⁰Ngadqere: Phineha to" ye; li" mung: qobo qo" mo, re qobo dae byid' ra". Aimung: qam" no wa dam: byaug va".

³¹Ai: au: mae ceru: boe" rure- yao" shad' khyo de, mung: ba: gyo: byid: geyang: ce:thao: ne, ayo, byang" sho' xam" ci: li" genae".

³²Meriba qid thug' mae ai: byumyu" qe:yang ASANG re nhag' yo: nhao mung: Moshe wa yao: bam: mathao mae qug: khai: qhug' va".

³³Yao: bam wa yao: re nhag' phin" yo: nhao mung: yao: wa lhao" mamyid: qu" lo sho' jhau: ke' va".

³⁴ASANG: yang yao: bam re amyin" byid' to" ru we' dakhyo: Mao"So re maba: ra" taung bug byu qere mase' pye' ngad: ako".

³⁵Yao: bam wa ai: byu qe we' myi: byid: myi: yu mung: yao: bam: taung bug thung" re bo:cao" lo" ako".

³⁶Mao"So: byumyu" qe wa solho jham re caung:pa" mung: ai wa yao bam yao" byo; qeim: khyo boe" lo va".

³⁷Yao: bam wa- Khanan so sulho jham: qhid' mae" yao: bam yao" yauggai zo: we' myiqe: zo: qere xeim: ngaui" pye' ako".

³⁸Yao: bam wa ai: qobo maqo" ra" zoshao qere se' pye' mung:- ai: mug: myid re byuse' mau" yang maca' majhad' boe" nhao: ako".

³⁹Yao: bam wa yao: bam yao" maca' majhad' ave; yang mayaung" malho" kad' yu: ako". Aimung: Mao"So re jhaug' mazaug boe" ako".

⁴⁰Aimung: ASANG wa- yao" byumyu" re nhag' yo: mung: yao: bam re ca' pye' ra".

⁴¹Yao: wa yao: bam re Mao"So re maba: ra" taung bug byu qenho: kheim: so' khug mae shapye' to: va". Aimung: yao: bam: gyevo qe wa yao: bam re eib: ako".

⁴²Yao: bam: gyevo qe wa- yao: bam re deim" zag zo: mung: yao: bam: agyid' mae pye: pye: laung" jo; ako".

⁴³ASANG wa yao" byumyu" qere myo: sho' lhang khyad' yu: ra". Ngadqere: yao: bam wa- yao: re tau: lhan: nae" khyo khyin: yu mung: yug: no qobo khug khyo je: nab: vao lo" ako".

⁴⁴Ngadqere: yao: bam hug' yao: ke' re ASANG wa yao: bam re gyo: byid: mung:- yao bam phau: zo" na: ra" dayin dayo: nhag' ngai: rure myao byid' ra".

⁴⁵Yao: wa yao: bam: akyu" qhid' mae" yao" dao: thang" re myid: beim" ra". Aimung: yao" qi" qhang: ra" jhid'de; myid: mathao mae yao: nhag' yo: gyo" byaug: ra".

⁴⁶Yao: wa yao: bam re deim" zag zo: mo, alhab' nho: aung khug mae shad' beim: nhao: ra".

⁴⁷O" ASANG ngonhaung" Mao"So we"- ngonhaung" re khyad' yu la,- Aimung: ngonhaung" re byumyu" qe: phaung gaung: mae" dam: jhui" yu la,- aire ngonhaung" wa nao re jeju beim: so: mung: ni" gyang" lho" ra" mang a re qo" caung:khin" byid: nae".

⁴⁸Israel byumyu" nho: Mao"So ASANG re caung:khin" byid: ge,- ana" ngadqere: apyad ato mae ngadqere: yao: re caung:khin" byid: ge,. Yaug khao: ngo" wa- Amen- ga: ta" vageshao:. ASANG re caung:khin" byid: ge, wo".