Read Maru CAUNG: KHIN" 107 Bible Online

CAUNG: KHIN" 107 - Maru bible

CAUNG: KHIN" 107

¹ASANG wa gai: rumung:- yao: re jeju beim: so: byid: ge,. Yao" jhid'de; myid wa apyad ato mae ngad: ra".

²Ai: dao: kheim: jham re paug' ta" mung:- ASANG re caung:khin" ge,. Yao: wa naonhaung" alhab' mo, re khyad' yu yaug ngad: ra". Yao: wa naonhaung" alhab' re naonhaung" gyevo qe: lo, mae" khyad' yu va".

³Aimung: naonhaung" re- su gaje taung bug: mang: mae" ba thug' shad' ba vao shad' mug: am: shad' we' mug: thao shad' mae" jhui" tug' lo va".

⁴Damyo" wa khyo madung: ra" din"pyad' yo mae du" lae" qin" ako". Aimung: yao: bam wa- vintang: na nae" vomo" maqhug' myao ngad: ako".

⁵Yao: bam wa vae: moe; qid shab' mung: myid: lao" jo, qo alhab' ci: phyaug' pye' avako".

⁶Ailao" yao: bam wa yao: bam: qug: khai: khug mae" ASANG re hug' yao: ke' ako". Aimung: yao" yang- yao: bam re yao: bam: qug: khai: mae" khyad' yu byid' ra".

⁷Yao: wa yao: bam re- yao: bam vintang: te" na nae" vomo" khyo din" ra" khyo khyo" jhui" lo" ra".

⁸Yao: bam wa ASANG: mabaui mabyo; ra" jhid'de,myid we' yao: bam re ASANG: yang kad' byid' ra" mug' pho: mau" jham: mathao mae ASANG re jeju beim: so: ca" ako".

⁹Yao: wa qid shab' ra" mo, re nhag' dag nhao mung: vae: moe; mo, re gai: ra" ja: jham: yang gyi: nhao: ra".

¹⁰Damyo" wa nhag' lam: ngai: ru we' cad' no, khug mae na mung:- jao co: jham: yang taui" to" ra" kyam: byu boe" na: ako".

¹¹Pe"mung:ga"re yao: bam wa- qam: so' bo: thao" ra" ASANG: amyin" dao: jham re tau: lhan" pye' mung:- yao" mho" shid' khyo jham rere: ngag: ha: pye' ako".

¹²Yao: bam wa mau" jam: zaui: mung: myaung" gyi" shid: lo" na: ako". Yao: bam gyang: lang" lo" re bao" tau: to" yu nae" byu mana genae".

¹³Ailao" yao: bam wa- yao: bam: qug: khai: khug mae" ASANG re hug' yao: ako". Aimung: yao: wa- yao: bam nhag' lam: ngai: rumae" khyad' yu va".

¹⁴Yao: wa yao: bam re- myid myo: mung: cad' no; jo; rumae" phoe' thug' yu: ra". Yao: bam: jao co: jham rere: adau atam" phyid' pye' byid' ra".

¹⁵Yao: bam wa ASANG: mabaui mabyo, gang" tang: ra" jhid'de; myid: mathao mae- yao: bam re ASANG: yang kad' byid' ra" mug' pho: mau" jham: mathao mae jeju beim: so: byid: ca" ako".

¹⁶Yao: wa gyid: ne kham: mo" jham re phyo' pye' mung:- jo, to' khyaung: jham re khyug' pye' ra".

¹⁷Damyo" wa nhag' magyang" ko:pyad' qe ngad: ako". Yao: bam wa yao: bam: qobo jham: mathao mae- yao: bam: makhyang: mashab: ra" mathao mae dayin dayo: dae kham zo" ako".

¹⁸Yao: bam wa zo:ve re qu" nghang: mung:- shid nae" jhao" avako".

¹⁹Ailao" yao: bam wa yao bam: qug: khai: khug mae" ASANG re hug' yao: ke' ako". Aimung: yao: bam: qug: khai: khug mae" khyad' yu: ra".

²⁰Yao wa yao: bam re yao" amyin" yang no gai byid' ra". Aimung: yao: bam: lab khung: mae" khyad' yu: ra".

²¹Yao: bam wa- ASANG: mabaui mabyo; ra" jhid'de; nhag' lam" mathao mae- yao: kad' ra" mug' pho: mau" zo" jham: mathao mae yao: re jeju beim: so: ca" ako".

²²Yao: bam wa yao: re- ngaui" xeim: jham: yang jeju beim: so: ca" ako". Aimung: yao: bam re yao" yang kad' byid' ra" mau" alhab' re ngaui bau: ngaui lho" nghaui" caung: jham we' jeju beim: so: ca" ako".

²³Damyo" wa panglai: jham: dao mae lha jham khyo" qho zo: qho shaug' qin: ako".

²⁴Yao: bam wa- panglai: jham: dao mae- ASANG kad' ra" mug' pho: mau" jham re myao: ako".

²⁵Yao: amyin" byid' ke' re- qam: so' thin: ra" la hug' hug' li" mung:- bang: lhung" jham re lhau: zhung ke' ra".

²⁶Qid sang pho jham re myhao: ra" khyo vin: to' yu mung: no; ra" tham: kao" khyo- khyo" nhab' pye' ra". Airu" ra" gyaug pho: khug mae sang pho kau" ra" mo, wa- byo lae" byaug: ako".

²⁷Yao: bam wa yhid yid mo, we' dakhyo: khyid au: thaung: mung: apyi anhaung mung: qin" ako". Yao: bam ba: jhao: ra" pha,jhi" wa pe" akyu" mabo lo:.

²⁸Aimung: yao: bam wa yao: bam: qug: khai: khug mae" ASANG re hug' yao: ke' ako". Aimung: yao wa- yao: bam re yao: bam: nhag' lam: ngai: ra" qug: khai: mae" khyad' yu: ra".

²⁹Yao: wa la qam" hug' na: rure- jo; yo: lo" nhao mung: bang: lhung" jham re: tae" lo" ako".

³⁰Yao: bam wa jo; yo: tae" lo" ra" mathao mae ngaui bau" na: ako". Aimung: yao: wa yao: bam re yao: bam lo" nug: ra" sang pho gau: khung: khyo gug: gam taung" jhui" lo" ra".

³¹Yao: bam wa ASANG: jhid'de; myid: ra" mathao mae ASANG re jeju beim: so: byid: ca" ako". Yao: bam: qhid' mae" yao" yang kad' byid' ra" mug' pho: mau" jham: mathao mae jeju beim: so byid: ca" ako".

³²Yao: bam wa yao" byumyu" phaung khug mae yao: qi" qhang: ra" khyo re ta" hau" kyo: byid: ca" ako". Aimung: au: jhaung zug: ade, qe: phaung qham mae yao: re caung:khin" byid: ca" ako".

³³ASANG wa qid gyaung: mo" jham re sad za: kin" ho: lo" nhao: ra". Aimung: qid baug: jham re jhid' tam" pye' ra".

³⁴Ai: mae na: ra" makhyang: mashab: ra" byu qe: mathao mae- yao: wa myid xau gai: ra" myid gaung re xo: pyad myid gao: boe" lo" nhao: ra".

³⁵Yao: wa din"pyad' yo re qid tham: jham kad' pye' ra". Aimung: kyaug' ho: jo; ra" myid gaung re yug: thug' na: ra" qid baug: gyaung: boe" lo" nhao: ra".

³⁶Yao: wa vae: moe; mo, re ai: jo, qo mae byaung" na: bam nhao mung: yao: bam wa aimae na nae" vomo" te" ako".

³⁷Yao: bam wa yo kad' mung: sabyi khyae qho: zo" ako". Aimung: magan: mago" phyo' yu: ako".

³⁸Yao: wa yao" byumyu" qere shaman" byid: mung:- yao: bam wa myid:zo: myo: sho' myhung: ako". Yao: wa yao: bam khau: ra" gug'nyhug' jham mayeim manang" lo" nae" qhid' mae" lhaug' zaung" byid' ra".

³⁹Mao"So: byumyu" qere- deim" zag zo: mung: dayin dayo: boe" ruyang jeim" lo" mung: gyoe; gyo" lo" li" genae".

⁴⁰Yao: wa yao: bam re deim" zag zo: mo, re manug: ru qhu" byid: mung:- khyo madung: ra" din"pyad' yo mae du" lae" qin" nhao: ra".

⁴¹Ngadqere: yao: wa myaung sho: mo, re yao: bam: dayin dayo: qug: khai: mae" khyad' yu: ra". Aimung: yao: bam: yham byu qere nung: kyaung"- cad' kyaung" gug'nyhug' kyaung" we' dakhyo: myo" je" li" nhao: ra".

⁴²Din:man: mo, wa ce:rure myao mung: ngaui bau" ako". Ngadqere: nhag' lam: kaui: ra" mo, makhyang: mashab mo, alhab' re kam" wa sae za: tae" byaug nhao: ra".

⁴³Pha,jhi" bo mo, wa ce:rure myid: qu" geshao:- yao: bam wa ASANG: gang" tang: ra" jhid'de; myid re myid: ca: qu" na geshao: wo".