Read Maru CAUNG: KHIN" 108 Bible Online

CAUNG: KHIN" 108 - Maru bible

CAUNG: KHIN" 108

¹O" Mao"So we"- ngo wa jab byang" sho' myid: lam: na:- ngo wa nao re nghaui"caung: mung: caung:khin" byid: nae". Nga" byo we"- Beim" to" lo wa,

²Nga" be, tang: she tang: jham we"- Beim" to" lo ge,- ngo wa ba re nhug' to" ke' nae".

³O" ASANG we"- ngo wa byumyu" qenho: phaung gaung: mae nao re jeju beim: so: nae". Byumyu" qenho: qhid' kheim: mae ngo nao re caung:khin" byid: nae".

⁴Ni" mabaui mabyo; ra" jhid'de; myid wa mug: khaung khyo joe" do, lo" ra". Ni" jhaug' zaug: ru wa mug: kin re the' tin" zao" ra".

⁵O" Mao"So we"- ni" qi" qhang: ra" khyo re mug:gaung mae" qhu" byid: wa,- ni" phungbao re myid gaung byang" sho' mae qhu" byid: wa,.

⁶Ni" qam: so' yang ngonhaung" re khyad' yu la,- nga" akyu" mho' thoe re tau: byid: la,. Aire nao jhid'de; ra" byumyu" qe khyad' yu: ru qhug' genae".

⁷Mao"So wa yao" yham mo" mae"- Shekhem re aung doe; ruyang ngo kho' pyo: pye' nae". Aimung: Sukod lao: khaung: re nga" byumyu" qe: qhid' mae" gae byid: nae".

⁸Giliad wa nga" mae" ngad:- Manashe re: nga" mae" ngad:- Ephrim wa nga" jo, to' maug ngad:- aimung: Yuda wa nga" kho:kham zaung: bao" ngad: ra".

⁹Ngadqere: Moba re nga" jarung: khyo" ci nae". Nga" khyid zhaung: re Edom mae pye' jam nae". Airu: kad' mung: aire ngo sang: ein: ra" aso: re qhu" byid: nae". Ngo wa Philisti mung" re aung doe; pye' mung: hug' nae"- ga: ta" ra".

¹⁰O" Mao"So we"- ngonhaung" re gye khyae kyae" lhaung" to" ra" vogaung: mo" khyo khag' yang jhui" ye: nae" i? Ngo re Edom: mug: khyo khag' yang jhui" ye: nae" i?

¹¹Nao ngonhaung" re gaigai: yao: shapye' pye' va" i? Nao wa ngonhaung" gyetab we' daga" gyekhe' mathug' ye: lo nae" i?

¹²Ngonhaung" nho: gyevo qere khe' zin: nae" qhid' mae" ngonhaung" re bao" yu la,- xao su byu: yang jho" bao" ru wa pe" aphug' made,.

¹³Ngonhaung" shad' mae Mao"So bo mung: aung doe, nae". Yao: wa ngonhaung" nho: gyevo qere aung: pye' byid' li" nae".