Read Maru CAUNG: KHIN" 115 Bible Online

CAUNG: KHIN" 115 - Maru bible

CAUNG: KHIN" 115

¹ASANG we"- Mabaui mabyo; ra" ni" jhid'de; myid we' jhaug' zaug: ru: mathao mae ngonhaung" re mangad:- nao re za:- nao dayaug re za: phungbao byid; vageshao: wo".

²Byumyu" qe wa pe"mung: yang:- naonhaung" Mao"So khai: mae i? ga: ngonhaung" re gai: qo" myid: genae" i?

³Ngonhaung" nho: Mao"So wa mug:gaung mae na:. Yao: wa yao: o nug: rure kad' ra".

⁴Yao: bam: so jham wa- ngaui we' qhang: yang kad' to: mung:- xao su byu: lo; yang kad' to" ra" lo, mau" ngad: ako".

⁵Yao: bam wa- nhad' de, qere: maqo" jhau- myo,jid' de, qere: mamyao ngad: ako".

⁶Yao: bam wa no:khye' de, qere: mathe' gyo:- nho de, qere: sheim maqo" nae ngad: ako".

⁷Yao: bam wa lo, de, qere: maqo" zaui:- khyid de, qere: maqo" su:- thoe re: maqo" kad' thug' ngad: ako".

⁸Yao: bam re kad' to: mung: yao: bam re lam khug: na mo, alhab' wa- yao: bam kad' to" ra" solho jham we' dakhyo: boe" vageshao:.

⁹Israel byumyu" naonhaung" we"- ASANG mae khug ngha ge,- Yao: wa naonhaung" re gug: gam byid: mung: bao" thaug' byid' na: ra".

¹⁰Mao"So: khinjaung qe we"- ASANG re lam khug: na ge,. Yao: wa naonhaung" re gug: gam byid: mung: bao" thaug' byid' na: ra".

¹¹Yao: re caung:pa" na: ra" mo, alhab' we"- ASANG re lam khug ge,- Yao: wa naonhaung" re bao" yu mung: gug: gam byid' ra".

¹²ASANG wa ngonhaung" re myid; beim: mung: shaman" byid' ra". Yao: wa Israel byumyu" re we' Mao"So: khinjaung alhab' re shaman" byid: nae".

¹³Yao: wa yao: re nga: yhe' byid: mo, aqi: angai yaug khao: ngo" re shaman" byid: nae".

¹⁴ASANG wa naonhaung" we' naonhaung" myid:zo: qere zo: dau khyid lo; byid: vashao:,

¹⁵Myid gaung we' mug:gaung re phan" to" ra" ASANG wa naonhaung" re shaman" byid: vashao:.

¹⁶Mug:gaung wa- ASANG yao: za: sang: ru ngad: ra". Ngadqere: myid gaung re wa xao su byu: qhid' mae" byid' to" ra".

¹⁷Shid: lo" va" mo; yang ASANG re maqo" caung:khin" ngad: ako". Cae: jhug tag movo: mug: khyo gyo" lo" mo; yang Mao"So re maqo" caung: byid: ngad: ako".

¹⁸Ngadqere: daui: na mo, ngonhaung" kam" wa- ana" re: apyad ato mae re:- yao: re jeju beim: so" na: bam nae". ASANG re caung:khin" ge,.