Read Maru CAUNG: KHIN" 116 Bible Online

CAUNG: KHIN" 116 - Maru bible

CAUNG: KHIN" 116

¹ASANG wa ngore gyo: byid: mung:- yao: rere: ngo jhid'de; ra". Yao: wa nga" akyu" mho' thoe re tae" gyo: byid' ra".

²Yao: re ngo khai: yao khao: ngo" ngore yao: tae" gyo: byid' ra".

³Shidgyan nogyan wa nga" avai: ayae mae gam: sho' lhang" kham" jo; ra". Lab bug mae" gyaug: din ja: wa- ngore kham" lhaung" to" ako". Ngo wa gyai gyaug mung: sang: kho" lai: lo va".

⁴Ailao" ngo wa ASANG we"- ngore khyad' yu la, Ngo mho' yao: ra"- ein: ASANG re khai: yao va".

⁵ASANG wa nhag' khyag' myid bo mung: gai yaug ngad: ra". Ngonhaung" Mao"So wa- jhid'de; sho: no: ru bo: ra".

⁶ASANG wa bao" yu nae" maqo" mo, re gug: gam byid' ra". Ngo gyaug ci" ca" au: re yao: ngore bao" yu: ra".

⁷ASANG wa- nga" dao mae gai mung: nga" alo zo: we"- Gug: gug: myid: lam: na wa,

⁸ASANG wa ngore shid: rumae" khyad' yu: ra". Yao: wa nga" ngug byid re tam" pye' byid: mung:- ngore jeim: nae" rumae"jhui" yu: ra".

⁹Aimung: ngo wa- daui: na mo; mug: myid: dao mae- ASANG: qhid' kheim: khyo" qo" su: va".

¹⁰Ngo wa phyi yao: ngad: byaug va" ein: ta" na: au: re lhao" re:- Ngo wa gyaug yang: khag' rere: magai: lam ein: ta" na: au: re lhao" re: ngo wa xo' yang: khug ngha: na:.

¹²ASANG ngore byid' ra" yao" gai: ru alhab' qhid' mae" ASANG re ngo pe" qo" qhaug' byid: nae" laug i?

¹³Ngo re khyad' yu: ra" mathao mae jeju beim: so" ra" khyo" sabyi qang: ASANG re ngaui" byid: nae".

¹⁴Yao" byumyu" qe- alhab' mo; ham phaung mae yao: re ngo byid' to" ra" dao:so: qhid' mae" qhaug' byid: nae".

¹⁵Yao" byu qemae" dayaug shid: lo" re ASANG khoqhi" sho: no: i?

¹⁶ASANG we"- ngo wa ni" daui daui yaug ngad:. Nga" myhi" caung da" byid' lai: lo: ru we' dakhyo:- ngo nao re caung da" byid' ra". Nao wa ngore shid: rumae" khyad' yu va".

¹⁷Ngo wa nao re jeju beim" ra" xeim: ngaui" byid: mung: akyu" mho' thoe kyo" ke' nae".

¹⁸Ni" byumyu" qe: hamphaung mae- Yerusalem mae" ni" gyang" lho" ra" Caung:pa" Yham mo" mae nao re ngo byid' to" ra" dao:so: qhid' mae" ngo qhaug' byid: nae". ASANG re caung:khin" byid: ge, wo".