Read Maru CAUNG: KHIN" 119 Bible Online

CAUNG: KHIN" 119 - Maru bible

CAUNG: KHIN" 119

¹Yao: yao" apyad mae qo mabo mo,- ASANG: tarha" mae ta" to" ru we' dakhyo: kao so' daui mo, wa ngaui lho" ako".

²Yao" amyin" jham re cao" mung:- yao: re nhag' lam: alhab' yang phug' cao" mo, wa ngaui lho" ako".

³Yao: bam wa khonhae" re: shad' ru makad' ASANG: khyo mae khonhae" re: su" na: ako".

⁴ASANG we"- nao wa ngonhaung" re ni" tarha" jham byid' to: mung: aijham re jhaug' zaug: ru we' cao" ye: nae" ta" to: va".

⁵Ni" mho" shid' dao: jham re jhaug' zaug za: cao" ye: nae" ein: lhaung" taung" myid: lao" na:.

⁶Ni" amyin" dao: alhab' re ngo nyang" za: myid: qu" na: re ngo qho' maphau: nae".

⁷Ni" din:man" ra" dao: kho' rure ngo mho" zhao: yu zo" re" gyang" san: ra" nhag' lam: we' nao re ngo caung:khin" nae".

⁸Ni" tarha" jham re ngo cao" na nae"- ngore khonhae" re: dashapye' to: la,.

⁹Zolau: dayaug wa- yao" apyad re gyang" san sho' khoru: qo" na nae" i? Ni" amyin" jham re phug' cao" yang: gai: na: ra".

¹⁰Nga" nhag' lam: alhab' we' ngo nao re caung da" byid: nae". Ngo re ni" amyin" jham re maphug' cao" lo:sho' dakad' nhao la,-

¹¹Ngo wa ni' tarha" re nga" nhag' lam: khug mae ke' ci va". Aimung: ngo wa nao re qobo maqo" shad' lo nae".

¹²O" ASANG we"- nao re ngo caung:khin" ra". Ngo re ni" khyo jham mho" byid: la,.

¹³Nao byid' to' ra" tarha" jham alhab' re- ngo thoe qi: we' aire dam: paug' ta" nae".

¹⁴Ngo wa jo,nho" myo: sho' qo" ru tho' mae ni" amyin" dao: jham re phug' cao" rure je: ngaui: ra".

¹⁵Ni" pyang dao: jham re ngo ca: zhao: yu mung: ni" mho" shid' khyo jham re ngo myid: ca: qu" ra".

¹⁶Ni' tarha" jham mae ngo myid: ngaui mung:- ni" amyin" jham re ngo mato" myhid' nae".

¹⁷Ni" daui daui yaug ngore gai kad' byid: la,- aire ngo daui: na mung: ni" mho" shid' dao: re cao" na nae".

¹⁸Nga" myo,jid' re phung" byid: la,- aire ngo wa ni" tarha" khug mae" mug' pho: dangman" ra" khyo re qo" the' myao nae".

¹⁹Ngo wa ce: myidgaung dao mae dazab daso' za: li" daui: na:- ni" amyin" jham re ngo mae" danyham" to" pye'.

²⁰Nga" nhag' lam: wa myid: lao" yang: no: lo: kyiva". Ngo wa ni" dao: kho' rure ayo, byang" sho' ba nug: ra".

²¹Nao wa ngad beim: mo, re qeim: mho" byid' ra". Ni" amyin" jham re macao" mo, wa byuxa: voqoe, qhug' ako".

²²Ngo wa ni" tarha" jham re cao" rumung: yao: bam: yang ce: roe" yang: jung" rumae" ngore loe; beim nhao byid: la,.

²³Zug: kho:kham qe wa- phaung: qham mung: ngore yhin" nae" ga: byin phyo: zin" ako". Ngadqere: ngo kam" wa ni" mho" shid' dao: jham re zhao: yu nae".

²⁴Ni" pyang dao: jham wa ngore ngaui bau: nhao: ra". Aijham wa ngore pha,jhi" byid: mo, ngad: ako".

²⁵Ngo wa jeim: mung: phalhug bam mae lang" jo;- nao dao:so: to" ru we' dakhyo: ngore dam: byan" to" lo nhao la,

²⁶Ngo kad' lai: lo: ru alhab' re lhang: yu mung: nao ngore tau: byid: va". Ngo re ni" khyo mho" byid: la,

²⁷Ni" tarha" jham re ba: gyo, sho' ngore bao" thaug' byid: la,- aire ngo wa ni" mug' pho: mho" shid' dao: jham re myid: qu" na nae".

²⁸Kaug' qhui: ru wa ngore aung: byaug: kyiva". Nao dao:so: byid' to" ru we' dakhyo:- ngore qam: bo nhao la,.

²⁹Ngore shad' nghung" ra" khyo malo" sho' zam: la,- Ni" gai shab: ruyang ngore ni" tarha" mho" byid: la,.

³⁰Ngo wa mho dao: gyo: nae" shad' khyo khyin: yu qhug' va". Ngo wa ni" dao: kho' nae" shad' khyo khyin: yu qhug' va". Ngo wa ni" dao: kho' rure myid: qu" va".

³¹ASANG we"- ngo wa ni" pyang dao: jham re cao" va". Ngore qho' daphau: nhao la,.

³²Ngo wa ni" amyin" jham re kao bau taung" cao" ye: nae". Pe"mung:ga"re nao wa ngore laba lajhao je: myo: sho' byid' li" nae".

³³ASANG we"- ni" tarha" jham: nho: lajheim: ngore mho" shid' byid: la,. Ailao" ngo wa ayo, byang" sho' aijham re phug' cao" ye: nae".

³⁴Ngore ni" tarha" sho' kyo: la,- aire ngo wa ai: rure cao" ye: nae". Aire nga" nhag' lam: alhab' yang nga" aung khug mae ke' to: nae".

³⁵Ni" amyin" alhab' qo" cao" sho' ngore zam: la,. Pe"mung:ga"re aijham mae ngo ngaui bau" ru qhug' ra".

³⁶Ngore jo,nho" qo" nhao nae" tho' ni" tarha" jham re cao" ye: nug nae" nhag' lam: yaug: ake' byid: la,.

³⁷Pe" aphug' made; rure mazhaug' qu" nae" qhid' mae" ngore zam: la,- Nao dao:so: to: byid' ru we' dakhyo: ngore gai kad' byid: la,.

³⁸ASANG: daui daui yaug ngore dao:so: dang byid: la,- Ni" mho dao: gyo: mo, re nao to" ra" dao:so: re dang byid: wa.

³⁹Ngo gyaug: na: ra" ceim" roe" rumae" ngore khyad' yu la,- Ni" dao: kho' ru wa khoqhi" mug' pho: ngad: ra" i?

⁴⁰Ngo wa ni" amyin" jham re phug' cao" nug: ra". Ngore kao so' asag' byid: la,- pe"mung:ga"re nao wa din:man" ra" yaug ngad: ra".

⁴¹ASANG nao ngore khoqhi" jhid'de; ru qhu" byid: la,. Aimung: ni" dao:so: jo; ru we' dakhyo: ngore khyad' yu la,.

⁴²Aire ngo wa ngore roe" zo: mo, re qo" phaug' tau: nae". Pe"mung:ga"re ngo wa ni" mungdao: re lam khug: na yaug ngad:.

⁴³Ayo, byang" sho' mae dangman" ru qo" ta" nae" qhid' mae" ngore bao" thaug' byid: la,. Pe"mung:ga"re nga" myid: lao" khyo wa ni" dao: kho' rumae ngad: ra".

⁴⁴Ngo wa khonhae" re: apyad ato mae ni" tarha" re phug' cao" na nae".

⁴⁵Ngo wa ni" mho" shid' ra" khyo re phug' cao" na: rumung: jab byang" sho' loe; beim: rumae daui: na nae".

⁴⁶Ngo wa kho:kham qere ni" amyin" jham hau" kyo: byid: nae". Amung: ngo qho' mathug' nae".

⁴⁷Ngo wa ni" amyin" jham re cao" rumae ngaui bau" ru qo" yu: ra". Pe"mung:ga"re aijham re ngo jhid'de; yang: ngad: ra".

⁴⁸Ngo wa ni" amyin" jham re phug' myao: mung: jhid'de; ra". Ngo wa ni" mho" shid' khyo jham re myid: qu" na nae".

⁴⁹Ni" daui daui yaug ngad: ra" ngore nao byid' to" ra" dao:so: re myid: beim: wa,- ai wa ngore myid: lao" nae" ru byid' ra".

⁵⁰Dayin dayo: kham zo" na: ra" au: lhao" re:- ngo wa nhag' tang" ru qo" yu: ra". Pe"mung:ga"re ni" dao:so: wa ngore kao so' byid' ra".

⁵¹Ngad beim: mo, wa khonhae" re: ngore qu" jung" na: ako". Ngadqere: ngo wa ni" tarha" mae" magao: malin: lo".

⁵²Ganhae" gaco' mae" ni" dao: kho' rure ngo myid: beim" na:. Aimung: O" ASANG we"- aijham wa ngore nhag' tang" byid' ra" wo".

⁵³Nhag' lam: kaui: ra" makhyang: mo, ni" tarha" re lhoe" pye' ko" rure ngo myao lao" ngo nhag' jam: yo" ra".

⁵⁴Myid gaung dao mae ngo daui: na: au: re ngo wa ni" amyin" jham we' sin: yang: nghaui" caung: jham thug: to".

⁵⁵ASANG we"- Myi" re ngo nao re myid: beim" na:- aimung: ngo wa ni" tarha" re myid: qu" na: ra".

⁵⁶Ni" amyin" jham re phug' cao" rumae nga" ngaui bau: ngaui lho" khyo re qhug' myao: yu: ra".

⁵⁷O" ASANG we"- nao wa ngo o: ru alhab' ngad: ra". Ni" tarha" jham re phug' cao" nae" ngo dao:so: to: va".

⁵⁸Nao dao:so: byid' to: va" ru we' dakhyo: ngore nhag' khyag' yu nae" qhid' mae" nao re nga" nhag' lam: alhab' yang mho' ra".

⁵⁹Nga" ave, re ngo bin: myid: qu" mung: nao mho" shid' ra" khyo re cao" ye: nae" qhid' mae" dao:so: re ngo byid: va".

⁶⁰Ni" amyin" jham re phug' cao" nae" qhid' mae" mayam" na lo:sho' ngo hin hin seim" na va".

⁶¹Nhag' lam: kaui: ra" makhyang: mo, wa nga" qhid' mae" lha" khae: to" ako". Ngadqere: ngo wa ni" tarha" re mato" myhid' pye'.

⁶²Gae gaung: myi: re ngo beim" so" li" mung: ni" din:man" ra" dao: kho' ru: mathao mae nao re ngo caung:khin" ra".

⁶³Ngo wa nao re caung da" byid: mo, alhab' nho: ba nam ngad:. Ni" tarha" jham re phug' cao" mo, alhab' nho: ba nam ngad: ra".

⁶⁴ASANG we"- myid gaung wa ni" mabaui mabyo; jhid'de; myid byang" jo; ra" ni" amyin" jham ngore mho" byid: la,.

⁶⁵ASANG we"- nao wa ni" dao:so: re zam" to" ava". Amung: nao wa ni" daui daui yaug nga" dao mae gai yaug ngad: ra".

⁶⁶Ni" amyin" jham re ngo lam khug: rumung:- ngore pha,jhi" we' laba lajhao byid: la,.

⁶⁷Nao: yang ngore qobo dae mabyid: shi:re ngo lhaung" shad' nghung" lo:. Ngadqere: ana" wa ni" dao: re ngo phug' cao" na:.

⁶⁸Nao wa khoqhi" gai: i? Khoqhi" nhag' ba: khyag' i? Ni" amyin" dao: jham ngore mho" byid: la,.

⁶⁹Ngad beim: mo, wa nga" khyo re mhug' ta" ako". Ngadqere: ngo wa nga" nhag' lam: alhab' yang ni" mho" shid' dao: jham re phug' cao" na:.

⁷⁰Byu cebam wa ba: gyo" ra" myid mabo ngad: ako". Ngadqere: ngo wa ni" tarha" mae ngaui bau: khyo qhug' myao: yu va".

⁷¹Nga" qobo dae wa nga" qhid' mae" gai: ra". Pe"mung:ga"re airu wa ngore ni" amyin" dao: jham qo" mho" yu nhao: ra".

⁷²Nao byid' ra" tarha" wa nga" qhid' mae" mug: myid geim" mae jo; ra" ngaui qhang alhab' tho' je: phug' de; ra".

⁷³Nao ngore phan" to: mung: gug: gam byid' ra". Ni" tarha" jham re qo" cao" sho' ba: gyo" ra" myid ngore ke' byid: la,.

⁷⁴Nao re gyaug phug' na mo, wa ngore the' myao lao" ngaui bau" li" genae". Pe"mung:ga"re ngo wa ni" dao:so: re lam khug: na:.

⁷⁵ASANG we"- ni" dao: kho' ru wa din:man" rure ngo ba:- Aimung: nao wa jhaug' zaug yaug ngad: ruyang nao ngore qobo dae byid: va".

⁷⁶Ni" daui daui yaug ngore nao: yang dao:so: byid' to" ru we' dakhyo:- ni" gang" tang: ra" jhid'de; myid: yang ngore nhag' tang" byid: la,.

⁷⁷Ngo qo" daui: na sho' ngore nhag' khyag' yu la,- Pe"mung:ga"re ngo wa ni" tarha" mae ngaui bau" na:.

⁷⁸Ngad beim: mo, wa ngore mangad' khyo" qobo zhaug' ko" ra" mathao mae qho' phau: geshao:- ngo kam" wa ni" mho" shid' khyo re myid: qu" na nae".

⁷⁹Nao re gyaug phug' mo, alhab'- ni" amyin" jham re ba mo, alhab'- ngojhao" li" lo geshao:-

⁸⁰Ni" amyin" dao: jham re ngo: yang jab byang" sho' cao" na mung:- jeim" lo" ruyang qho' phau: nae" rumae" loe, vashao:.

⁸¹ASANG we"- ngo wa nao: yang li" khyad' yu nae" rure lao" yang: qam: shan: lo" na va". Ngo wa ni" mungdao: mae lam khug: na:.

⁸²Ngo wa- nao ngore khonhae" bao" yu nae" i? ein: myid: na: au:- ni" dao:so: re lao" mung:- nga" myo,jid' jham kyam: byaug va".

⁸³Ngo wa su: yang shapye' pye' va" ra" sabyi thaung we' dakhyo: pe" aphug' made, lo:ngadqere: ni" amyin" jham re mato" myhid' pye' shi:.

⁸⁴Khomyhao" myao" sho' ngo xo' lao" ca" shinae" i? Ngore yhin" mo, re nao: yang khonhae" qobo dae byid:nae" i?

⁸⁵Ni" tarha" re macao" ra" ngad beim: mo, wa ngore kung" yu nae" ga: dungkhung: dau" to" ako".

⁸⁶Ni" amyin" jham alhab' wa lam ga" ru ngad: ra". Byu jham wa ngore mhug' dao: khyo" yhin" na: ako". Ngo re bao" yu la,.

⁸⁷Yao: bam wa ngore alaug qo" se' pye' ako". Ngadqere: ngo wa ni" amyin" jham re malhaui" pye'.

⁸⁸Mabaui mabyo; ra" ni" jhid'de; myid: mathao mae ngore gai kad' byid: la,. Aire ngo wa ni" tarha" jham re cao" phug' na nae".

⁸⁹O" ASANG we"- ni" mungdao: wa apyad ato mae jo; jo, nae"- ai wa mug:gaung mae apyad ato ngad: jo; ra".

⁹⁰Ni" jhaug' zaug: ru wa dapyad we' dapyad mae gang" tang: jo; ra". Nao wa myid gaung re yao" jo, qo mae to: mung: ai wa airu: yao: jo; jo; ra".

⁹¹Acao jab wa ni" amyin" khyo" ana" ba joe" sho' jo; bam: ako" Pe"mung:ga"re aijham alhab' wa ni" daui daui mo, ngad: ako".

⁹²Ni" tarha" wa nga" qhid' mae" ngaui bau: khyo ajhaung ko mangad: re wa ngo wa dayin dayo: dae no yang: shid: byaug naeva".

⁹³Ngo wa ni" mho" shid' khyo jham re khonhae" re: malhaui" pye' nae". Pe"mung:ga"re nao wa ngore ai: gu" yang daui: na nhao: ra".

⁹⁴Ngo wa ni" byu ngad:- ngore khyad' yu la,- ngo wa ni" amyin" jham re phug' cao" nae" qam: ke' na:.

⁹⁵Nhag' lam: kaui: ra" makhyang: mo, wa ngore se' nae" ga: lao" na: ako". Ngadqere: ngo wa ni" tarha" jham re myid: qu" na nae".

⁹⁶Ngo wa ja: khao: ngo" mae yao" kyodam: jo; rure the' zhao: yu va". Ngadqere: ni" amyin" wa jab byang" ra" wo".

⁹⁷Ni" tarha" re ngo khoqhi" jhid'de; i? Ngo wa aire ba geim" myid: qu" na:.

⁹⁸Ni" amyin" wa yo, byang" sho' ngo we' daga" ngad: jo; ra". Aimung: ngore nga" gyevo qe tho' pha,jhi" je: bo nhao: ra".

⁹⁹Ngo wa ni" mho" shid' khyo jham re myid: qu" rumung:- nga" mho" pho" qe alhab' tho' je: ba: gyo".

¹⁰⁰Ngo wa ni" amyin" jham re cao" rumung:- phug' mao: qetho' pha,jhi" je: bo:.

¹⁰¹Ngo wa ni mungdao: re cao" nug mung: makhyang" ra" ave, alhab' re jao" pye' va".

¹⁰²Nao yao: nga" mho" pho" ngad: rumung: ni" mho" shid' khyo jham re ngo malhaui" pye'.

¹⁰³Ni" mho" shid' khyo jham wa khoqhi" cug: ra" i? Byoyhid tho' lhao" je: cug: ra".

¹⁰⁴Ngo wa ni" tarha" jham mae" pha,jhi" qo" yu mung: magai: ra" ave, alhab' re ngo nghang" ra".

¹⁰⁵Ni" mungdao: wa ngore khyoshid' byid: nae" myikaug' ngad mung:- nga" khyo qhid' mae" bo" bao ngad: ra".

¹⁰⁶Ngo wa ni" din: nyang: ra" mho" shid' khyo jham re cao" nae" qhid' mae" gang" tang: ra" dao:so: byid: nae".

¹⁰⁷ASANG we"- ngo kham zo" na: ra" dayin dayo: dae jham wa gyai xo: ra". Nao dao:so: to" ru we' dakhyo: ngore daui: na nhao la,.

¹⁰⁸O" ASANG we"- nga" jeju beim: so" ra" akyu" mho' thoe re lham: khae: yu byid: la,. Aimung: ngore ni" amyin" jham mho" byid: la,.

¹⁰⁹Ngo wa kao alaug laug lhaung" thao" byaug va". Ni" tarha" re ngo mato" myhid' pye'.

¹¹⁰Nhag' lam: kaui: ra" makhyang: mashab mo, wa nga" qhid' mae" lha" khae: to" ako". Ngadqere: ngo wa ni" amyin" jham re mangag: pye'.

¹¹¹Ni" amyin" jham wa apyad ato mae" nga" jo,nho" ngad: ra". Aijham wa nga" nhag' lam: ngaui bau: khyo ngad: ra".

¹¹²Ngo wa ngo shid: ra" ba joe" sho' ni" tarha" jham re cao" nae" qhid' mae" myid: phyid' to: va".

¹¹³Nao re bin sho' jhaug' mazaug mo, re ngo nghang" ra" ngadqere: ngo kam" wa ni" tarha" re jhid'de; ra".

¹¹⁴Nao wa ngore gye vha byid: yaug we' gug: gam byid: yaug ngad: ra". Ngo wa ni" dao:so: mae myid: lao" na:.

¹¹⁵Qobo byu qe we"- ngo mae" va: khyo phao: lo" ge,- ngo wa nga" Mao"So: amyin" jham re phug' cao" nae".

¹¹⁶Nao dao:so: to" ru we' dakhyo: ngore qam: o: byid: la,- aire ngo qo" daui:na nae". Ngo re nga" myid: lao" rumae qam: dashan nhao la,

¹¹⁷Ngo re zaui" ci byid: la,- aire ngo gug: gam: na nae". Aimung: ngo wa ni" amyin" dao: jham re khonhae" re: myid: qu" na nae".

¹¹⁸Nao wa ni" tarha" jham re maphug' cao" mo, re kang" pye' ra". Yao: bam: mhug' pyag'ra" byin phyo: mau" wa pe" akyu" mabo ngad: ra".

¹¹⁹Nao wa nhag' lam: kaui: ra" makhyang: mo, alhab' re basad re we' dakhyo: qu" to" ra". Aimung: ngo wa ni" pyang dao: jham re jhid'de; ra".

¹²⁰Ni" mathao mae ngo gyaug: ra". Ni" dao: phyid' ra" ruyang ngo gyaug: byaug va".

¹²¹Ngo wa jo: ru we' gai: rure kad' va". Ngo re nga" gyevo qe:ra" lo, khyo dashapye' to: la,.

¹²²Ni" daui daui yaug re bao" yu nae" qhid' mae" dao:so: byid: la,- ngad beim: mo; yang ngore dadeim" zag zo: nhao la,.

¹²³Nao: yang bao" khyad' yu nae" ru we' loe; beim nhao nae" ga" dao:so: to" rure lhaug' qu" na mung: nga" myo, myaung" byaug va".

¹²⁴Ni" mabaui mabyo; jhid'de; myid khyo" ngore mho" shid'byid: la,. Aimung: ngore ni" amyin" dao: jham mho" byid: la,.

¹²⁵Ngo wa ni" daui daui yaug ngad. ngore:- laba lajhao byid: la,- aire ngo wa ni" mho" shid' rure ba: gyo: nae".

¹²⁶ASANG we"- nao lo, mau" zaui: nae" ayo, joe" va" ra". Pe"mung:ga"re byu qe wa ni" tarha" jham re maphug' cao" ngad: ako".

¹²⁷Ngo wa ni" amyin" jham re qhang tho' mae"- gyang" thao" ra" qhang tho' mae" je: jhid'de; ra".

¹²⁸Airu: mung: ngo wa ni" pyang dao: alhab' re cao" ra"- shad' ra" khyo jham alhab' re ngo nghang" ra".

¹²⁹Ni" mho" shid' ru jham wa mug' pho: ngad: ra". Ngo wa aijham re nga" nhag' lam: alhab' yang phug' cao" ra".

¹³⁰Ni" mho" shid' dao: re sho' kyo" ru wa bo" bao byid' ra". Aimung: pe" maba mo, re pha,jhi" byid' ra".

¹³¹Ni" amyin" jham re ngo myid: o: na mung:- ngo wa nhad' ho" ci yang: so' kho' na:.

¹³²Nao re jhid'de; ra" mo, alhab' re kad' ru we' dakhyo: ngojhao" lhang: lo mung: ngore nhag' khyag' yu la,.

¹³³Nao dao:so: to" ru we' dakhyo: ngore magyang: lang" lo" sho' zam: byid: la,. Ngo re makhyang:mashab: ra" ruyang daaung: pye' nhao la,.

¹³⁴Ngo re deim" zag zo: mo; lo, mae" khyad' yu la,. Aire ngo wa ni" amyin" jham re qo" phug' cao" nae".

¹³⁵Nao ngo we' na mung: shaman" byid: la,- ngore ni" tarha" jham mho" byid: la,.

¹³⁶Byu qe ni" tarha" re maphug' cao" gemung: nga" ngug byid wa qid gyaung: we' dakhyo: yug: na: ra".

¹³⁷ASANG we"- nao wa din:man" ra"- ni" tarha" jham re: din" ra".

¹³⁸Nao byid' ra" tarha" jham wa jab byang" sho' din: nyang mung: jo: ra".

¹³⁹Nga" gyevo qe wa ni" amyin" jham re pe" xan: masun: gemung: nga" nhag' yo: wa myi: we' dakhyo: ngo mae laung: na: ra".

¹⁴⁰Ni" dao:so: wa khoqhi" dang: ra" i? Aire ngo khoqhi" jhid'de; ra" i?

¹⁴¹Ngo wa pe" akhyag yaug mangad: mung: qu" ngai: pye' ru qhug' ra". Ngadqere: ngo wa ni" mho" shid' dao: re malhaui" pye'.

¹⁴²Ni" dangman" ru wa apyad ato dang: jo, nae"- aimung: ni" tarha" wa khonhae" re: dangman" ra".

¹⁴³Ngo mae qug: khai: we' sang: kho" ru byang" jo; ra". Ngadqere: ni" amyin" dao: jham wa ngore ngaui bau: ngaui lho" nhao: ra".

¹⁴⁴Ni" pyang dao: jham wa khonhae" re: din: nyang: jo; ra". Ngo re ba: gyo: nae" ru byid: la,- aire ngo qo" daui: na nae".

¹⁴⁵Ngo wa nga" nhag' lam: alhab' we' nao re yao: ra". ASANG we"- ngore tau: byid: la,- aire ngo wa ni" amyin" dao: jham re qo" phug' cao" nae".

¹⁴⁶Nao re ngo yao: ra". Ngo re khyad' yu la,- aire ngo wa ni" tarha" jham re qo" zam" ci nae".

¹⁴⁷Ba mathug' shi:mae" ngore bao" yu nae" qhid' mae" nao jhao" mho' yao: na:- ago wa ni" dao:so: re myid: lao" na:.

¹⁴⁸Ngo wa damyi khyeim gyang: yang: lang" jo, mung: ni" pyang dao: jham re myid: qu" na:.

¹⁴⁹O" ASANG we"- ni" jhid'de; myid wa mabaui mabyo; ru ngad mung: ngore gyo: byid: la,. Ni" nhag' khyag' myid re qhu" byid: mung: nga" kao so' re daui: na nhao byid: la,.

¹⁵⁰Ngo re se' da: be, khyad' kad' mo, wa jhao" li" na: ako". Yao: bam wa ni" tarha" re khonhae" macao" ra" mo, ngad: ako".

¹⁵¹Ngadqere: ASANG we"- nao wa ngo we' te' te' na: ra". Aimung: ni" amyin" dao: alhab' wa khonhae" re: jo: jo; ra".

¹⁵²Ganhae" yo, mae" ni" pyang dao: khyo re ngo zhao: yu: lo va". Nao wa aijham re apyad ato mae dang: jo, nhao: ra".

¹⁵³Ni" tarha" re ngo malhaui" pye' rumung: ngo kham zo" ra" dayin dayo: dae re myao byid' ru we' ngore khyad' yu la,.

¹⁵⁴Nga" mau" zo" re bo:ta" byid: mung: ngore loe; beim: nhao la,- nao dao:so: to" ru we' dakhyo:- ngore khyad' yu la,.

¹⁵⁵Nhag' lam: kaui mung: makhyang: mashab mo, wa khyad' yu: ru maqhug' genae". Pe"mung:ga"re yao: bam wa ni" tarha" jham re maphug' cao" ngad: ako".

¹⁵⁶Ngadqere: ASANG we"- ni" nhag' khyag' myid wa qi" qhang: ra". Ni" nhag' khyag' myid re qhu" byid: mung: ngore khyad' yu la,.

¹⁵⁷Ngo mae gyevo myo: sho' we' deim" zag zo: mo, gyai bo: ra". Ngadqere: ngo wa ni" tarha" jham re manghung: lo: cao" na:.

¹⁵⁸Phaug' lhag' lo" mo, re ngo qu" mung: nhag' qu" no: ra". Pe"mung:ga"re yao: bam wa ni" amyin" jham re maphug' cao" ngad: ako".

¹⁵⁹ASANG we"- ni" pyang dao: jham re ngo khoqhi" jhid'de; rure qu" qu" wa,. ni" jhid'de; myid wa khonhae" re: malai:- aimung: ngore khyad' yu la.

¹⁶⁰Ni" tarha" nho: akao" wa din:man" ru ngad: ra". Aimung: ni" dangman" ra" dao: kho' ru alhab' wa apyad ato ngad: ra".

¹⁶¹Kheim: so' qi: mo, wa ngore matarha" khyo" khe' zin" ako". Ngadqere: ngo wa ni" tarha" re phug' myao" ra".

¹⁶²Ni" dao:so: jham: mathao mae ngo khoqhi" ngaui bau" na: i? Ngaui qhang jo,nho" myo: sho' qo" yaug we' dakhyo: ngaui bau" na:.

¹⁶³Mhug' ta" ru alhab' re ngo nghang" ru we' ca' ra"- ngadqere: ngo ni" tarha" re jhid'de; ra".

¹⁶⁴Ni" din:man" ra" dao: kho' ru jham: mathao mae ngo wa daba re nhad' lhang nao re jeju beim: so" na:.

¹⁶⁵Ni" tarha" re jhid'de; mo, wa jab byang" ra" gug: gam: ru qo" ako". Aimung: yao: bam re gyang: gyo" nae" khyo qo" kad' ru pe" majo,.

¹⁶⁶ASANG we"- ngo wa nao: yang bao" yu nae" rure lao" na:- aimung: ngo wa nao amyin" byid' to" rure kad' na:.

¹⁶⁷Ngo wa ni" mho" shid' khyo jham re phug' cao" mung: nga" aung khug nhag' lam: alhab' we' aijham re ngo jhid'de; ra".

¹⁶⁸Ngo wa ni" amyin" jham we' ni" mho"shid' ra" khyo jham re phug' cao" na:- nao wa ngo kad' ru ja: khao: ngo" re myao byid' ra".

¹⁶⁹ASANG we"- bao" yu nae" qhid' mae" mho' ra" nga" thoe wa nao jhao" joe" vashao:- nao: yang dao:so: byid' to" ru we' dakhyo: ngore ba: gyo: nhao la,.

¹⁷⁰Nga" akyu" mho' dao: re tae" gyo: byid: la,- aimung: ni" dao:so: we' dakhyo: ngore khyad' yu la,.

¹⁷¹Nao ngore ni" tarha" mho" shid' byid' ru mathao mae ngo wa nao re khonhae" re: caung:khin" na nae".

¹⁷²Ni" amyin" jham wa din: nyang: rumung: ngo wa ni" tarha" we' sin: yang: Nghaui"caung: caung: nae".

¹⁷³Ngo wa ni" amyin" jham re cao" ra" mathao mae ngore bao" yu nae" qhid' mae" khonhae" re: jin" jin" seim" ci byid: la,.

¹⁷⁴O" ASANG we"- ngo wa nao: yang khyad' yu: ra" bao" thaug' rure khoqhi" nhag' nghae" na: i? Ngo wa ni" tarha" mae ngaui bau khyo qhug' yu: ra".

¹⁷⁵Nao re qo" caung:khin" nae" qhid' mae" ngore kao so' ke' byid: la,- ni" mho" shid' khyo jham wa ngore bao" yu vashao: wo".

¹⁷⁶Ngo wa byaug: lo" ra" yao we' dakhyo: du" lae" qin" ra". Aimung: ni" daui daui yaug ngore li" qho: yu la,- pe"mung: ga"re ngo wa ni" tarha" jham re malhaui" pye' yang: ngad: ra".