Read Maru CAUNG: KHIN" 135 Bible Online

CAUNG: KHIN" 135 - Maru bible

CAUNG: KHIN" 135

¹ASANG re caung:khin" byid: ge,- ASANG: yham ngad: ra" ngonhaung" Mao"So: Caung:pa" Yham mae ye; jo, ko" ra" ASANG: daui daui mo, naonhaung" we" yao" mang a re caung:khin" ge,-

³ASANG wa- gai yaug ngad: rumung: yao: re caung:khin" ge,- Yao: wa nhag' khyag' myid bo yaug ngad mung: yao" mang re caung:khin" ge,.

⁴Yao: wa- yao: yao" qhid' mae" Yaku re khyin: yu: ra". Israel byumyu" re yao: yao" qhid' mae" khyin: yu: ra".

⁵Ngonhaung" nho: ASANG qi" qhang: rure ngo ba:- Yao: wa phara" alhab' tho' mae je: qi" qhang: ra".

⁶Yao: wa mug:gaung mae we' myidgaung dao mae panglai: jham: khug mae we' tham: no, khug mae yao: kad' nug: rure kad' ra".

⁷Yao: wa myidgaung thao" mae"- la qam" jham thaui: re jhui" lo: ra". La qam" qhid' mae" lhe' cad' re kad' to" ra". Aimung: yao: wa yao" kug qe, mae" phoe' thug' ke' ra".

⁸Yao: wa Egutu mung" mae yauggai zoqhid' alhab' we' sao qhid' sad' ra" gug'nyhug' alhab' re dakhyo: za: se' pye' ra".

⁹Ai: mae yao: wa- kho:kham we' yao" zug: qere- qobo dae byid: nae" qhid' mae" mug' pho: ve, lho we' mug' pho: mau" zo" jham re kad' qhu" byid' ra".

¹⁰Yao: wa mung"dan: myo: sho' re phyo' qheim" pye' ra". Aimung: qam: bo: ra" kho:kham qere se' pye' ra".

¹¹Amori kho:kham Sihon- Bashan kho:kham Oga we'- Khanan kho:kham alhab' re se' pye' ra".

¹²Yao: wa yao: bam: mug: myid re yao" byumyu" ngad: ra" Israel qere byid' pye' ra".

¹³ASANG we"- nao wa Mao"So ngad: ra" khyo" khonhae" re: ta" hau: byid' ru qhug' li" nae". Byu qae: alhab' wa nao re myid: beim" na: li" genae".

¹⁴ASANG wa yao" byumyu" re gyevha byid' li" nae". Yao: wa yao" daui daui mo, re nhag' khyag' yu: li" nae".

¹⁵Byumyu" qenho: so qe wa ngaui we' qhang: yang kad' to" ru ngad: ako". Yao: bam re xao su byu: lo; yang kad' to" ru ngad: ra".

¹⁶Yao: bam wa nhad' de, qere: maqo" jhau myo,jid' de, qere: mamyao ngad: ako".

¹⁷Yao: bam wa no khye' de, qere: maqo" gyo: ngad: ako". Aimung: yao: bam wa so' lhao" re: maqo" she ngad: ako".

¹⁸Aijham re kad' mung:- lam khug: na: ra" mo, alhab' wa yao: bam kad' to" ra" solho jham we' dakhyo:- boe" lo" vageshao:-

¹⁹Israel byumyu" qe: ASANG re caung:khin" ge, Mao"So: khinjaung naonhaung" we"- yao: re caung:khin" ge,.

²⁰Levi byu qe naonhaung" we"- ASANG re caung:khin" ge, Yao: re caung:pa" mo, alhab' we"- yao: re caung:khin" ge,.

²¹Ziun mae ASANG re caung:khin" ge, yao" yham Yerusalem mae caung:khin" ge, ASANG re caung:khin" ge, wo".