Read Maru CAUNG: KHIN" 139 Bible Online

CAUNG: KHIN" 139 - Maru bible

CAUNG: KHIN" 139

¹ASANG we"- nao ngore ca: qu" mung: ngore ba byid' ra".

²Nao wa ngo kad' ru alhab' re ba byid' ra". Nao wa ngo myid: ru alhab' re gyai va" mae" ba: gyo: byid' ra".

³Ngo mau" zaui" na: laug- thang: na: laug ga" rure- nao myao byid' ra". Ngo sab' lab: ru alhab' re nao ba: ra".

⁴Ngo majhau shi:mae" lhao" re:- ngo pe" ta" ke' nae" rure nao bin: ba: to: gau ngad: ra".

⁵Nao wa nga" avai: ayae gam: sho' mae na: ra". Nao wa ni" qam: so' yang- ngore lhang" kham" to" ra".

⁶Nao ngore ba: ru wa gyai yao: no, sho' ngad: ra". Aiwa ngo ba: gyo" ru tho' lai sho' ngad: ra".

⁷Ngo wa nao mae" khai: khyo qo" phao nae" i? Ni" qhid' kheim: mae" khai: khyo qo" phao: lo" nae" i?

⁸Mug: khaung khyo ngo do, lo" re nao wa ai: mae na: jo, nae". Movo: mug: mae ngo lang" jo; re nao ai: mae na nae" ngad: ra".

⁹Ba thug' shad' mae" lai: ye: sho' dao" lo" mung:- mangad: lao"- ba vao shad' mae" va" thao" jo, qo mae ngo ye:na: jo, ngadqere:

¹⁰Nao wa ngore khyo qhid' au: she nae" qhid' mae" ai: mae na: jo, lao: nae". Nao wa ngore bao" nae" qhid' mae" ai: mae na lao: nae".

¹¹Ngo re nyham" to: la, ein: mug: cad' re ngo qo" mho' ra". Mangad: lao" nga" lhang" gam: mae mug: bo" re myi" boe" lo" wa, ein: ngo qo" mho' ra".

¹²Ngadqere: mug:cad' lao" re: ni" qhid' mae" no, sang: kyid mangad: ngad: ra". Myi" wa na" we' dakhyo: bao: jo; ra". Mug: cad' we' mug: bo" wa ni" qhid' mae" wa dakhyo: za: ngad: ako".

¹³Nao wa nga" gaung dau khao: ngo" re phan" to: byid' ra". Nao wa nga" myhi" aung mae ngore xo' zham: to: byid' ra".

¹⁴Nao wa gyaug phug' tho' yaug we' nao kad' gu: alhab' gyai mug' pho: ngad: ruyang nao re ngo caung:khin" ra". Aire nga" nhag' lam: alhab' yang ba: ra".

¹⁵Nga" sho:qug: jham wa akhyao kad' to" ru qhug' mung:- nga" myhi" aung khug mae nyang" za: xao" ke' to: byid' au:- ai: khug mae anyham: avho' khyo" ngo qi" li" na: au: re- ai: mae ngo na: jo; rure nao ba byid' ra".

¹⁶Ngo makhau: li" shi:mae" nao ngore myao: ava". Nao ngore byid' to" ra" ba na jham- lhao" majo; boe" li" shi:mae"- ni" mugsug' paug' khug mae alhab' tung" xam" to" ava".

¹⁷O" Mao"So we"- nao myid: rure qhug' myao byid: nae" khoqhi" qug' ra" i? Aijham wa khonho" yao: myo" ra" i?

¹⁸Aijham re ngo nghe' qu" ngad: re ma coe je, jham tho' je: myo: genae" ngad: ra". Ngo beim" so" li" re- ngo wa nao we' daga" ana: jo, shi:nhaung

¹⁹O" Mao"So we"- Nhag' lam: kaui: ra" makhyang: mo, re- nao: yang qo" se' pye' byid' qa: we"- Aqan alan kad' mo,- ngo yao: re za: to: co' ko" qa: we" ein: lhaung" myid:.

²⁰Yao: bam wa ni" khyo re magai: ra" khyo" ta" ako". Yao: bam wa- ni" mang re makhyang" ra" khyo" ta" ako".

²¹O" ASANG we"- nao re nghang: mo, re ngo nghang" kyiva" lhe". Nao re tau: lhan: mo, re ngo qu" ca' va" lhe".

²²Ngo wa yao: bam re- lo" thao" sho' nghang" pye' mung:- yao: bam re nga" gyevo jham khyo" ngo sun" pye' va".

²³O" Mao"So we"- ngore ca: qu" mung:- nga" myid re ba byid: la, Ngo re jham" qu" mung:nga" aung khug: myid re le; qu" wa,

²⁴Ngo mae makhyang: mashab: ru daja: ja: bo: laug- mabo: laug qho: qu" byid: la,. Aimung: mathao" magan: ra" khyo mae ngore jhui" shid' byid: la,.