Read Maru CAUNG: KHIN" 140 Bible Online

CAUNG: KHIN" 140 - Maru bible

CAUNG: KHIN" 140

¹ASANG we"- makhyang: mashab mo, mae" ngore khyad' yu la, Aqan alan mung mo, mae" ngore gug: gam byid: la,.

²Yao: bam wa khonhae" re:- makhyang" ra" mau" re za: myid: yaung: na: ako". Jho" byo; nae" myan" myo: khyo jham re za: lhau: zhung" na: ako".

³Yao: bam: sho jham wa- daug thin: ra" lhao maui jham we' dakhyo: yao: bam jhau: ra" dao: thoe jham wa- maui no; daug we' dakhyo: ngad: ra".

⁴ASANG we"- makhyang: mashab mo; kheim: so' khug mae" ngore gug: gam byid: la,- ngo byo; qeim: lo" nae" khyo" khug' seim" na: ra" byuqan jham: lo, mae" ngore gug: gam byid: la,.

⁵Ngad beim: mo, wa ngore myhi" nae" vo" kad' to" ako". Yao: bam wa nga" qhid' mae" taui: khyo" to: mung: khyo cao" yang: ngore myhi" nae" qhid' mae" vo" kad' to" ako".

⁶Ngo wa ASANG re- nao wa nga" Mao"So ngad: ra"- ein: ta" na:. ASANG we"- bao" yu nae" ngo mho' yao: rure gyo: byid: la,.

⁷Phungbao qi" ra" ASANG qam: bo: thao" ra" nga" gyevha byid: yaug we"- nao wa ngore gyekhe' ra" jao: mae gug: gam byid' ava".

⁸ASANG we"- makhyang: mashab: ra" mo, re yao: bam o: ru dabyid: wa,- yao: bam yaung: to" rure daaung doe, nhao.

⁹Nga" gyevo qere daaung nhao. Yao: bam: yang ngore kyaug' nhin" ra" rure- yao: bam yao: jhao" dam: tug ke' byid: wa,.

¹⁰Nga" ne: jo; ra" myi:gyoe: yao: bam: dao mae gyo" sheim: vashao:- yao: bam wa dungkhung: khug khyo pye' khyo" ke' ru qhug' mung: khonhae" re: madam: qo" thug' lo vashao:-

¹¹Su re mhug' ra" khyo" qobo zhaug' mo,- maaung doe, geshao:- makhyang: mashab: ru wa byu aqan qere khe' myhi mung: yao: bam re phyo' qeim" pye' vashao:.

¹²ASANG we"- nao wa myaung sho: mo; khyo re gyevha go byid' ru we' maqo" mo; nho: akhang" re gye vha go byid' rure- ngo ba:-

¹³Din:man: mo, wa nao re gaigai: yao: caung:khin" li" genae". Yao: bam wa ni" qhid' kheim: mae qo" na: li" genae".