Read Maru CAUNG: KHIN" 141 Bible Online

CAUNG: KHIN" 141 - Maru bible

CAUNG: KHIN" 141

¹ASANG we"- nao re ngo mho' yao: na:- ana" ngore bao" yu byid: la,- nao re ngo khai: ra" au: tae" gyo: byid: la.

²Nga" akyu" mho' thoe re nae pyo"ra" sheim we' dakhyo: lham: yu byid: la,. Nga" lo, to' ci: rure myi" thao zo" mae" ngaui" xeim: we' dakhyo: lham: yu byid: la,.

³ASANG we"- nga" nhad' re khang" byid: la, nga" nhad' qid kham: jham mae- lhaug' zaung" ru to: byid: la,.

⁴Shad' rure ngo makad' nae" qhid' mae" we' makhyang: mashab mo, we' daga" yao: bam: nhag' lam: kaui: ra" mau" mae mabo: be; baung: sho' ngore zam: la,. Yao: bam: zo: shaug' poe mae khonhae" re: mabo: cao: zo: vashao:.

⁵Byugai wa ngore qobo dae byid: mung: nhag' khyag' myid we' yo" re yo: nae". Ngadqere: makhyang: mashab mo, mae" nga: yhe' byid' rure khonhae" re: ngo makhae: yu nae". Pe"mung:ga"re ngo wa yao: bam: makhyang: mashab: lo, mau" jham byo; qeim nae" qhid' mae" khonhae" re: akyu" amho' na:.

⁶Yao: bam: zug: qere- byo, khao: mae" pye' khyo" ke' ra" au: nga" dao: thoe jham dang: rure- mung" byu qe tug: yu: li" genae".

⁷Sag' thaung: jham re kho' mung:- akhao: khao: baug: cad' pye' ru we' dakhyo: yao: bam: sho:qug: jham re lab avai: ayae mae shapye' sin" khyo" li" genae".

⁸Ngadqere: phungbao qi" qhang: thao" ra" nga" ASANG we"- ngo wa nao re xo' yang: za: lam khug: na:- ngo wa nao: yang gug:gam: yu: rure qho: na:- ngore dashad' nhao la,.

⁹Yao: bam ngore kung" ra" taui: mae"- ai: makhyang: mashab: mau" kad' ra" mo; lha" mae"- ngore gug: gam: yu byid: la,.

¹⁰Ngo wa pe" dae made; lo: phao: lo" re nhag'lam: kaui: ra" makhyang: mo, wa yao: bam yao" taui: mae gyo" myi" lo" vageshao:.