Read Maru CAUNG: KHIN" 143 Bible Online

CAUNG: KHIN" 143 - Maru bible

CAUNG: KHIN" 143

¹ASANG we"- nga" akyu" mho' thoe re gyo: byid: la,. Ni" jhaug' zaug: ra" khyo: mathao mae- nga" mho' yao thoe re tae" gyo: byid: la,. Ni" dao:so: dang mung: kyid: ra" mathao mae ngore tau: byid: la,

²Ni" daui daui yaug ngore- qug: khai: mae dajham" qu"- ni" qhid' kheim: mae khag' dayaug re: qobo maloe,.

³Nga" gyevo wa ngore khe' kung" mung:- ngore bin sho' jeim: nhao: ra". Yao: wa ngore cad' no; ra" thaung: khug mae ke' to: mung: ngo wa ganhae" mae" shid: byaug va" mo, we' dakhyo: ngad: jo;-

⁴aimung: ngo wa alaug laug aseim" byid: pye' va". Ngo wa nhag' lam: gyai thao" byaug va".

⁵Lai: lo" va" ba na jham re ngo myid: beim" ra". Nao kad' lai: lo: ru alhab' re ngo myid: qu"- ni" lo, mau" alhab' re ngo myid: beim" ra".

⁶Ngo wa nga" lo, re tau: to' mung:- nao jhao" akyu" mho' ke' ra". Kyaug' ho: jo; ra" myid gaung we' dakhyo: nga" alo zo: wa nao re moe, shab' na:.

⁷ASANG we"- ngore ana" tau: byid: la,- ngo mae myid: lao" nae" ru alhab' byaug va". Nao yao" gaung re ngo mae" davho' nyham" byaug- mangad: re ngo wa movo: mug: khyo gyo" lo" mo; phaung mae bo:bo: lo" li" nae".

⁸Ngo re ne, seim khao: ngo"- ni" mabaui mabyo; ra" jhid'de; myid re- myid: beim: nae" peim: byid: la,- pe"mung:ga"re- nao mae ngo lam khug:na: ru ngad:. Nga" akyu" mho' dao: jham wa- nao jhao" joe" sho' do, lo" mung:- ngo ye" lo" ang: ra" khyo re qhu" byid: la,.

⁹ASANG we"- ngo wa gug:gam: ru qo" yu nae" qhid' mae"- nao jhao" ye" lo" ra". Nga" gyevo qe: lo, mae" ngore khyad' khyui: yu la,.

¹⁰Nao wa nga" Mao"So ngad: ra". Nao myid: o: ru kad' nae" qhid' mae" ngore mho" byid: la,. Nga" dao mae gai byid: mung:- gug:gam: ra" khyo mae jhui" shid' byid: la,.

¹¹ASANG we"- nao dao:so: byid' to" ru we' dakhyo: ngore khyad' yu la, ni" gai: ra" mathao mae ngore nga" qug: khai: jham mae" khyad' yu la,

¹²Ngo re nao jhid'de; ra" mathao mae nga" gyevo qere se' pye' byid: la, aimung: ngo wa ni" daui daui yaug ngad: ra" mathao mae ngore deim" zag zo: mo, alhab' re phyo' qheim" pye' byid: la,.