Read Maru CAUNG: KHIN" 144 Bible Online

CAUNG: KHIN" 144 - Maru bible

CAUNG: KHIN" 144

¹Nga" gug: gam byid' ra" ASANG re caung:khin" ge,- yao: wa ngore mau" mho" byid' ra". Gye khe' nae" qhid' mae" ngore nyhang" jaung: to: byid' ra".

²Yao: wa ngore gug: gam byid: yaug we'- ngore khe' qhaung: yu yaug ngad: ra". Gug: gam qo" yu nae" qhid' mae" ngo lam khug: na" ra". Nga" khug ngha jo, qo we' khyad' yu: ASANG ngad: ra".

³ASANG we"- nao: yang qu" myao byid' ra" xao su byu- Nao: yang khyao za: myid: beim" na: ra" xao su byu za" ru wa pe" za: angad: ra" i?

⁴Yao: wa la dalhang mad we' dakhyo: za: ngad: ra". Yao" ba na jham wa bao qab we' dakhyo: lai: lo" na: ako".

⁵O" ASANG we"- mug:gaung re lao" cad' mung: gyo" li" wa,- bam jham re tin: byid: wa,- ai: bam jham wa myi:khug' re phoe' thug' li" genae".

⁶Lhe' cad' bao jham re nhao: ke' mung:- ni" gyevo qere khe'sin" pye' wa, Ni" myo:khe' jham re bag: ke' mung: tao" lo" nhao wa,.

⁷Tho' khyo mae" lo, jhoe" khyo" ke' mung:- qid tham: no, khug mae" ngore- phoe' xoe: ru we' khyad' yu la,- Taung bug byu qenho: qam: so' mae" ngore khyad' yu la,.

⁸Yao: bam wa dangman" ru khonhae" re: mata"- Jham lhao" re: mhug' tang" ako".

⁹O" Mao"So we"- ngo wa nao re nghaui" caung: asag' yang caung: nae". Ngo wa tang: be, mung: nao re nghaui" caung: khun: kyo: nae".

¹⁰Nao wa kho:kham qere aung doe, nhao: ra". Aimung: ni" daui daui yaug Davi re khyad' khyui: yu: ra".

¹¹Ngo re gyai lhe" ra" nga" gyevo qe: lo, mae" khyad' yu la, dangman" ru khonhae" re: mata" mung:- jham tang" re lhao" mhug' tang" ra" mo, taung bug byu qenho: qam: so' mae" ngore: khyad' yu la.

¹²Ngonhaung" nho: yauggai zo: qe wa yao: bam: ve, qae" ayo, mae qao" qao" za: yaug: qi" li" ra" sag' zo: jham we' dakhyo:- ngad vageshao:. Ngonhaung" nho: myiqe: zo: qe wa kho:kham yham mae"yham jheim gyo: mae qu" yaung" sho' shaung: to" ra" zang baung: jham we' dakhyo: ngad vageshao:.

¹³Ngonhaung" nho: gaug jhi jham wa gaug zo maui: lam: ashi: aja: ja: byang" jo, vashao: ngonhaung" nho: mhin: gyo, jao: jham mae" yao jham wa yao nau" ataung atug xao: vageshao:.

¹⁴Ngonhaung" nho: nung: jham wa- vin: shoe' pye' ru we'- shid: seim" rure: mabo lo: myo" je" laug: lo vageshao:- ngonhaung" nho: hau" mo" khyo jham mae- kaug' qhui din ci" ngug: hug' yao: ru majo, vashao:.

¹⁵Ceru: boe" ra" byumyu" wa ngaui lho" ako". ASANG re yao: yao" Mao"So khyo" qo" ra" byumyu" wa ngaui lho" ako".